Äntli hani mal chönne go laufe ohni Gepäck. Mich hets drum zu e Attraktion öppe 2h Laufziit entfernt glockt. Es natürlichs Bluämäreservat. Die meischte Blüämli hani zwar underwägs scho gseh, es isch aber glich en schöne Ort, wommer sogar uf richtige Feldwäg dörf laufe. De ganz Rundgang goht öppe 3.5 Kilometer. I de Hälfti häts plötzli en Sirene afange lüüte. Natürli bini ufgschreckt und sofort an Tsunami denkt. Im Informationshüüsli het sich aber nüt da und dSirene nur churz ufghüült. Anschinend alles in Ornig. Villicht en Tescht.

Im Städli bini no gschein bim Schrein verbii und ha sogar Glück gha. De erscht Schrein, wo sich i mim Goshuinbüächli verewiget het. Denn hani numol mis Glück herusegforderet a eim vo de Glücksspiel am Schrein. Jetzt begleitet mkch en Edelstei imene Glögglisäckli und söll luägä, dass mer a nüt fehlt.

Am Abig hani mi denn zu äs spaar Camper gsellt wo no bis am Sunntig zum Füürwerchfäschtli bliibet. E luschtigi Rundi vo überall vo Japan. De warm Pfluumeschnaps hets vollkomme gmacht. De eint, än Fischer, het denn no so irgend was Ässbares vom Meer uftischet. Wie immer folgi mim Prinzip da, zersch probiere, denn fröge was es isch. Es het recht gschlüdrig gschmöckt. Luut Wörterbuäch Seescheide, was immer das isch. Aber ich hans jetzt emol gha. De zweit Sunneuntergang isch nöd so grandios gsi und han nur so 2-3 lebendigi Schwän gse.

ZFuäss 27900; 22.38 km