Profile
Blog
Photos
Videos
Am Morge ufgstande, hani gmerkt, was das für en schöne Platz isch. Wunderschön ufere Ahöchig über em Meer gläge und sogar no Bungalows wommer het chönne miätä. Es isch en hitzige Tag vorusgseit worde also hani alles packt und bini am halbi 8i los. Underwägs bini vo öppe 500 Velofahrer überholt worde. Sisch grad es Familieevent gsi mit Polizei, Luutsprecherwäge, Effektelaschti und de Putzcharre am Schluss. Das het mi die erschte paar Kilometer abglänkt. Dana ischs immer unangnähmer worde. Wieder e Strass ohni Trottoir oder Uswichmöglichkeit und verbiiflitzendi Holzlieferante. Irgendwie hanis denn doch noch nach Okuppe gschafft. DAutoraschtstellt isch wieder richtig härzig zwäg gmacht miteme still gleite Zug und fasch so es Art Buurelädeli. Ich han es feins Joghurt und es Milchglacé gha. Hokkaido söll ja die Bescht Milch vo Japan ha. Ich chan das jetzt bestätige. E sooooo fein isch es gsi - wie frisch ab Hof. Nebetra hets no en Gmüäshändler gha. Ich bin grad a mim 3.- Pfirsich (de erscht woni frisch gseh in Japan) am zahle gsi, als dSirene wieder loshüült. Sicher e Minute lang. DVerchäuferi (oder Verchäufer - mä chas nöd so gnau sägä) het nüt de Gliche tuä und het au nach minere Nachfrag gseit, es seg alles in Ornig. Wie weiss ich jetzt eigentlich, dass en Alarm isch wo ä Reaktion verlangt?
Au Gegenüber hets no es kreativs Kafi gha. Leider het mer aber dZiit nüm glangt. De Bus isch nämli gad churz vo de Abfahrt gstande und het mi nach Monbetsu bracht. Det im Terminal hani numol chönne sWIFI nutze und han eigentlich scho richtig Hotel wellä go... als ich uf em Nebeplatz e Verastaltig gsichtet han. E Tanzuffüärig vo allne Mittelschüäler vo Monbetsu. Klasswiis hends zu traditionelle Musigg tanzet, teilwiis mit traditionelle Chleidig (oder adütigswiis) und es paar wenige Mal au en Mix mit modernere Musig. Die hend sich richtig all Müäh gä und es hät Spass gmacht zuäzluägä... Sogar de Lehrer het dFahne gschwunge. Das het mi wieder dra erinneret, wieso ich eigentlich zFuäss underwägs bin und nöd mit em Zug - um gnau soo öppis herzlichs gseh.
Aber ich muäss ja no sWLan und Steckdosene im Hotel go usnütze. Uf em Weg zum Hotel sind mer dLüüt wieder so komisch distanziert vor cho. Einmal hani öppertem usversehe de Weg abgschnitte und han mich drufabe höflichscht uf Japanisch entschuldiget. DAntwort isch uf Änglisch cho: Er seg Chines kein Japaner. I dem Moment wünschti ich wär schlagfertiger (also ich meine verbal - s'andere chämmt reaktionsschnäller). Ich hetten den nämli gere gfröget wieso er mit mir denn Änglisch redi - ich bin ja schliesslich au weder Amerikaner no Brit. Sorry aber so Mänsche chönnd eim ufrege.
Im Hotel bini zuäfälligerwiis uf en Blog gstosse, wo eine verzellt wie er in Mombetsu keis Bier becho heg, will mer ihn anschienend als Russ verwächslet het. Sogar teils Bar seget da uf Russisch agschribe : nur für Japaner. Aber woher die Verachtig chunnt, isch nöd gstande. Muäss das unbedingt mal recherchiere. Es gseht so us als hend mich dIiwohner als Russin verwächslet, so wien ich halt au nöd de Chines vom Japaner han chönne unterscheide.
ZFuäss 22300; 17.5km, Bus 24km
- comments