DBsitzeri vom Ryokan het mir unbedingt no welle zeige, wiemer en Chranich in Origami macht. Han die ja scho es paar mal gmacht, aber no noe miteme 6cm Blatt. Am Schluss het si mir grad no die ganz Packig Papier gschenkt. Guet sinds kei A4 Blätter. Aber ich chan ja nöd täglich Kranich falte, damit ich die Blätter verbruche...

Am 10ni bini los. Churz hani no a dere Seebucht entlang laufe, bevors den vo chline Industrie zunere langwilige Hauptstrass worde isch. Nur dBambuswälder hend mi hüt bsunders imponiert. Es gseht us, als wärends es kuschigs Bett für en Riis. Die andere Laubwälder zeiget meh und meh ihri Farbepracht. DTemperatur schiint jetzt definitiv au uf Herbscht igstellt zsi. Es isch 16 Grad und hüt isch ebeso serschmal sit ich zGunma gsi bin (Mitti Sept), dass ich de Rucksack mit em Schutz bedecke. Es fagt grad nach öppe emene Stündli laufe, afange rägne. Aber churz dana isch es es uf und zue mit em Schirm, bis es schliesslich ufghört het. Underwägs isch ächt nüt spannends gsi. Han mi meischtens uf dNatur konzentriert, die isch aber nur begrenzt unverbaut gsi. Nach 8 Kilometer hani e Raschtstätt erreicht. Ich weiss gar nüm wie lang isch scho a keinere verbii cho bin. Drum bini schnurstrax go feini Tomätli poschte und grad no es feins Riis-Guätsli, Mochi. Ich han mi churz im Ufenthaltsruum usgruebt, da es zum Pause mache zchüehl isch verusse. Reschpektiv ich zfuul bin, dJagge fürd Pause usem Rucksack zhole.

Denn ischs wiiters gange. Churz druabe hane dPrefekturgrenze vo Shimane zu Tottori überquert. Im nächschte Dörfli hani chöne uf en Flussspazierwäg uswiche, wo mich fascht zum Bahnhof vo Yonago bracht het. Det i de nöchi hani mir es Curry zum zMittag, oder zum zHalbizwei gönnt. E Stund spöter bini nach Kakeionsen gloffe. En Ort zu Yonago ghörend am Meer. Mis Hotel gseht vo Meersite recht schäbig us. Aber drin isch e ganz anderi Wält. Ich han es riisigs Zweibettzimmer mit risige Fenschterfront zum Garte. Ivh bin recht kaputt gsi. Da ich anschinend sPölschterli zwüschtet de Zeihe nächli ungünschtig plaziert han, isch dLauge hüt nöd agnähm gsi. Am nüüni hani denn umso meh en Bsuech im Onsen verdient. Es isch es schös gsi, aber nöd usergwöhnlich und au nöd würkli herzlich. Aber villicht isch sandere Becki, wo a dem Obig de Manne ghört, grösser. En andere Teil chönnt mer sich no privat miete und het sogar en Whirlpool. Es het hüt eher schiggi-miggi Fraue drin. Die eint het nachher langer gha, ihres Gsicht mit diverse Reinigungsöl und Cremene zverziere, als ich gha han zum mini Haar föne. Aber wer dGeduld het. Ich jedefalls, bin zrug is Zimmer und han herrlich gschlafe.

ZFuess: 25800, 19km