Wow. Drüü Wuche nöd brichtet. Verruckti Sach=). Mal bini Chrank gsi, denn hani mini Bewerbige versuecht und gluch no versuecht Gägend azluegesusch.

ZFuess: 115km, 153900 , Zug: 658km

Natürli weissi nüm jedi Einzelheit aber da en chronologische Ablauf:

10月31日 Tierischi Halloween

Vom Onsenstadtteil vo Yonago us, e Stadt i de Präfektur Tottori, sölls hüt zur präfekturial Hauptstadt go. Es isch no öppe 100km entfernt und so wird no recht Zug gfahre. Aber zersch wird zum übernächschte Bahnhof gloffe. Underwägs bini grad anere AEON Shopping Mall verbi cho und han mi iideckt mit zMorge. Bi de Tierabteilig hets mi fasch verputzt. Einige Gstelle voll mit Halloweenkoschtüm natürli für de liäbschti Fründ vom Mensch. Wie wärs miteme Geischtli uf vier Pfote oder en Chürbis?

Ich han mit em Zmorge verusse uf dBank gsetzt. Bin no agsproche worde, öb i nöd zchalt heg im Tshirt. Erscht denn isch mer ufgfalle, dass sich alli scho uf Herbscht igstellt hend, obwohl es immerno so 22 Grad isch. Tottori isch berüehmt für Sanddüne, aber die wirdi nöd go aluege. Au uf em Weg hani einigi schöni Sandstränd gseh und das langet mir ja scho. Interessanterwiis hani e Grupoe vo zwölf Milan gseh, wo sich am Strand vom Flussdelta vergnüegt hend. Han serschmol gseh, dass sich Milan im Wasser selber putzet.

Denn bini zersch no dur schön gpflegti Strassepromenade cho und denn no dur diversi Nebetstrasse a Hüser und Felder verbii cho. Interessanterwiis hani gseh, dass dFrüeligszwible und de Chohl in Sand abaut hend. Ich han mir das bis anhin gar nöd überleit.

Zum Bahnhof ischs no dur chlini alti Gasse gange mit einige schöne alte Hüser. Uf de Zug hani denn no länget müesse warte, aber es wär ziitlich nöd drin gläge zum nächschte Bahnhof zlaufe. Erschtens hani no e längeri Fahrt vor mir und si fahred nur all zwei Stund.

Tottori isch so nächli es Animeland. Han zwar kei Ahnig öb vill det entwicklet werdet oder wieso si sich so nännet. Jedefalls hani denn uf en Detektiv Conan Zug dörfe umstiige. E Anime, wo au uf dütsch synchronisiert worde isch. Zumindescht die erschte 300 vo aktuell 799 Folge. Aber ussert en Ort in Tottori-ken, wo Konan heisst und sich us Marketinggründe Conan nennt, gsehn ich au da kei Verbindig.

Naja irgendwänn bini denn i de Stadt acho und zum Hotel gloffe. Tottori-Stadt isch zimli interessant, da si nonig so international isch, wie anderi.