Am 8i gässe und grad no gWöschet. Mit em erschte Nöd-Pendlerzug ischs denn nach Izumo zrugg gange. Zgliche het au e Klass vo Chindrgärtner dänkt und isch es paar Statione mitgfahre - nach em obligate Föteli uf em Bahnsteig mit em sichtlich peinlich berüerte Stationsbeamte. Immerwieder hets verstohleni Blick gä zum Uusländer. E Stund spöter bin au ich bim Hauptbahnhof acho. Vo det us bini rund 10 Kilometer nordweschtlich gloffe. Überrascht bini gsi, wie gli seigentliche Stadtzentrum gsi isch. Ich bin recht schnell uf de Hauptstrass glandet mit de typische Industrieläde. Es isch schös Wetter, aber meischtens schattig, chüel mit Wind. Zur Sicherheit e Jagge ipacke, wär nöd schlecht gsi. Aber solangs nöd chälter wird.
Irgendwenn sind denn grossi Feldalage vo Gmües, Riis und Rebe cho. Au e Werbig für de Rhabarber-Bäcker hets gha. Obwohl i nirgends Rhabarbere gsichtet han. Also nöd falsch verstoh - die vermissi nämli gad gar nöd.
Drü Jungs sind no mit em Velo verbii gfahre und da hani no es Schwätzli ghalte mit em einte. Brasilianer isch er. Ich vermuete, mä hät da au (wie in Minoota) vor Jahre brasilianischi Wanderarbeiter für e Firma inegholt und so sind au hüt no einigi da. Will die ander beide Jungs hend au en brasilianisch-weschtliche Ischlag gha. Er het denn müesse die andere wieder ihole, aber han müesse lache, wohni sin Kommentar zu mir ghört han de andere mitzteile. Si sind nächli perplex gsi, woni si 500m wiiters bim Konbini wieder igholt han.
Irgendwänn bini denn bim grosse Schrein acho. Da ich chum Internet gha han, hani de Schrein nächli unvorbereitet beträte. Ich weiss, er isch alt, berüehmt und eine vo de wichtigschte in Japan. Usserdem het es riisigs Riisstrohtau, die typischi Schreinzierde, wo die göttlich Welt vo de hiesige trennt. Da das da usnahmswis im Gegeuhrzeigersinn dräit isch, bringts Glück, wemmer es Münzstuck schafft ufezschüsse und es stecke bliibt. Dem Vorwüsse entsprechend hani mega druf gfreut und bin umso meh enttosche gsi. Si hend nöierdings es Drahtgitter une anetue, damit mer ebe kei Münz me cha ufeschüsse. Truuuurig. Naja dSchrein sind mega schön gsi. Es sind drü Hauptschrein und sicher 20 chlini im ganze Park verteilt. De Schrein het ganz en spezielle Stil und isch guet erhalte. Nachem bete und Goshuin hole, ischs die risig Parkallee zrug gange. Es isch sicher e 600m langi Strecki zum Schrein füehrend. Im Park hets no verschidenschti Statue und en Häslipark. En Teil mit überall Häsli us Stei. Sooooo süess. Natürlich hets wieder es japanischs mythologischs Drama dezue. Aber mir ischs zimli glich, da jedes einzelne Häsli eifach so stimmigserhellend und fröidig isch. Bim einte Föteli isch mer sogar gad no en schöne Schmetterling zwüschet dHäsli und Kamera. Es hettet nur no richtigi Häsli gfählt wo umehoppset.
De Zuefall hets wellä, dass es e chlini Chrysantheme-Usstellig gha het. Wieder öppis weniger uf de to-do Lischte. Ich weiss vomene Dokumentarfilm, dass die Züchter, jede Morge jedes einzelne Blüeteblatt mit eme Spiessli-artige Hölzli i die richtig Position bringet. Nur so bringets die spektakuläre Formene ane. die Geduld isch mal wieder typisch japanisch.
A de Hauptstrass vorne bini wieder emol vor dFernsehlinse cho. Aber es isch recht peinlich gsi, da ich ja nöd vill über de Schrein gwüsst han ( us Internetmangel). De Moderator het versuecht mir zerchläre, dass die de Schrein zwei Gottheite ehrt, wo anschinend es Paar gsi isch. Aso er hets au kompliziert beschribe. Richtig druscho bini erscht, woni im Starbucks gsässe bin und im Internet nachegüggslet han. Jedefalls het mich de Interviewer gfröget, öb ich um en Fründ betet hegi. Ich han sLache fasch nöd chönne verkneife. Wenni wohl a jedem Ort in Japan, wo die gross Liebi verspricht, würd mich drum kümmere, müssti wohl all Wuche die 'gross Liebi' wieder uswechsle. Weiss nöd öb de Witz acho wär, also hani mi halt anders chönne drusrede. Churz drufabe sinds wohl zfriede gsi mit minere Antwort und sind wiiters. Ich han denn nöd amene Häslilade chöne verbiilaufe, ohni öppis zposchte und bin den es Stündli is Starbucks. Denn isch zum nächschte Bahnhof gange. Also isch eher so Stadtbahn ähnlich ghalte. Mit eme Wechsel inen Zug im Shimaneko-Design bini denn bis zum Bahnhof zrugg in Izumo gsi und denn wieder Richtig Yasugi. Shimaneko isch sMaskottchen vo de Shimane-Präfektur. Es het ja jedi Präfektur eis. Aber das isch wieder en bsundere Schügel.
Unterdesse isch es da zJapan scho am halbi Sechsi stockdunkel.

ZFuess: 20100, 15km, Zug: 116km