Es rägnet wieder emol. Eigentlich störts mi gar nöd im Rege zlaufe, sofern mer am Obig irgendwo warm und troche het. Aber ich bi sooo müäd. Wahrschinli hani scho Entzugserschinige vo frische Frücht und Gmüäs. I dere Abeleeretr isch es nöd so luschtig a de Strass nazlaufe. Da hets immer Spezialischte, wo extra no es bizzeli schneller in Gunte fahret. Also nimi halts Schiff ab Yasumiya und chaufe defür grad no sBillet für die morgig Abfahrt nach Hachinohe.
Scho 20 Minute früähner als Schiff abfahrt, bini drin gsässe. Die i de Tourischtoffice het mi druf ufmerksam gmacht, dass Schiff jetzt parat wär. Also si het mi fasch scho gnötiget scho fure zgo=) Si chenntis wohl nöd verantworte, falls i zspat chemmti. DSchiff da sind nöd so de Hit. I dem wo i gsässe bin het wenigschtes e Form wien es Schiff, aber dBrugg isch vorne im Erdgschoss. SAndere isch en drüü-stöckige Katamoran wo irgendwie shindere Drittel abgschnitte worde isch. Nüt schös. Aber bin ja au verwöhnt. Mer chan süsch ja au guät Lüüt beobachte. Zum Bispil die wo ufs Schiff seklet, obwohls ersch i 10min abfahrt. Die andere laufet miteme Türkisch-Flagge T-Shirt ume. Würd mi wunder nä, öb em ächt eifach de Mond und Stärn gfalle het oder öb er würkli det gsi isch. Tja Schiff fahrt denn mal los und ich ha Ziit zum Schriibe. DErchlärig verstohn ich ja chum und me als bewaldeti Hügel gseht mer nöd us de verrägnete Fänschter. Aber es bringt mi entspannt zum Uusgangsort vo dem schöne Wäg. Leider chanen wohl nur eifach mache, da ich Schlafmütze ja wieder spat dra bin. Han scho Koffein und Teein gha und chönnt glich wieder schlafe.
Es isch soo schös Flüssli und sooooo schöne Wanderwäg nebetra. Ach wär das doch toll wenn ich zu meh so bequeme Weg chemmti. Nacheme Kilometer oder zwei chunnt de erscht Wasserfall. Es isch de gröscht mit 7 Meter Fallhöchi und 17/18 Meter Breiti. Au wenni binere Schätzig die Agabe nächli chlinner gmacht hetti. A dem Wasserfall isch grad e Busgruppe am fotographiere. DLeiterin in Azug und Stöggelischuäh. Die Arm. Uf mit wiitere Wäg hesch ab und zuä öppert droffe. Meischtens jedoch bi dene Haltepünkt - sprich i de nöchi vo de Wasserfäll. Die meischte sind drum höchstens 2 Kilometer gloffe. Ich chas meh und meh verstoh. Es het so vill Guntene, dass ich mich fescht uf de Wäg muäss konzentriere und dSchönheit vo dem Ort fasch verpass. Es plätscheret so schön dur die Stei dure und teilwiis hets fasch chlini Insle drin. Denn Brüggli und Bäum - soooo schön. Es sind denn laufend die andere drizäh Wasserfäll cho. Es het denn aber so fescht afange abeläre, dass ich sNatel han müässä is sichere Trockene verstaue. DGunte sind grösser und grösser worde und ich han bald diä Lüüt mit Stiefel benidet. Meine ich han ja guäti Schuä. Aber es isch teilwiis keis Durchkomme gsi und me het eifach mit abschätze, wo de Gunte jetzt am flachschte isch, und de Schritt mache. Teilwis isch mer denn halt uf unstabilem Bode cho und het rasch müässä wiiters. Ich han denn irgendwänn müässe Brülle abnä, wills si mir agloffe isch. Ab denn hets mi afange nervä. Han mi es paar mal verschätzt - vill zwar Glück gha, aber schlussändlich Wasser im Schuä. Pflutsch - Pflutsch. Zu allem Übel dezuä het mi jedesmal wenn de Weg wieder an Strasserand gfüährt het, es Auto auno mini Hose hüfthöch nass und dräckig gmacht. Ich ha denn eigentlich scho beschlosse min Plan wieder zvernichte und bi de nächschte grosse Raschthütte, also denn wänn alli Wasserfäll dure sind ufzhöre. Det acho, han i e feini Udon Suppe gha und sogar no chönne es Onigiri poschte für morn Zmorge. Denn bini richtig wieder ufgwärmt gsi. ST-Shirt isch scho fasch wieder troche gsi und dHosd tja die cha nüm schlimmer wärde. Also hani entschide glich no die letschte 5 Kilometer zlaufe und vo det de halbi Vieri Bus zrugg ab See znä. Irgendwiä hani denn dummerwiis en falsche Abzwiiger no und so nach vier Kilometer definitiv entschide, dass das nöd de richtig Wäg cha si. Es wär aber en wunderschön, ebefalls als Wanderweg bezeichnete, Wäg gsi. Also bini zrugg gschnällt. Will am Vieri fahrt de letscht Bus ufe und ich chas knapp gschafft. Sischmer zwar nächli peinlich gsi mit sonere Dräckhose izstiige, aber han ja kei zweiti Hose debii gha. Am See obe hani ghofft no churz i eis vo dene Restaurants go öppis warms zNacht zässe. Leider hend nur no die chicä Hüüser offe gha und det chani chum mit dere Hose ine. Wenigschtens gani underdesse obetra zu trochene Sache gwächsler und han mi ufgmacht zum Zeltplatz. Die vier Kilometer simmer au scho chürzer vorcho, aber bin den glich heil det glandet und han grad no de Verwalter verwürscht, woni um alti Ziitigd bätte han. Nach Dusche, Wösche und Tröchne gohts denn au is Bett. Ach übrigens schlafi offiziell i de Akita-Präfektur. In Yasumiya isch Gränze.

Zfuäss: 35800, 29km; Schiff 14km, Bus 16km