Tja... ich bin total wieder us mim Schlafrhythmus. Mis Natel het über Nacht nächli vill Akku brucht und het mi drum nöd rechtziitig gweckt. Bin ersch am sibni verwachet und das wär für min Plan zspat. Also gits hüt en Sunntig und morn e Waldwanderig. Also bin mit allem Kartematerial nach Yasumiya und ines Kafi ghocket. Ganz es urchig gstaltetes Marine-Kafi mit Stüürrad, Schifflaterne, alti Schiffsrute und dSunneschirm natürli in blau-wiis. Öppe 100m wiiters het e Frau usgrüäft wie nüt. Si isch gad am Vorbereite gsi, dass dChind chönd go bade und die hend natürli druf blanget. Selbstverständlich ischs kei Japaneri gsi sondern Amerikaneri, wo nächli überfordert gsi isch. Au überfordert het si damit die japanische Spaziergänger nebetra. Das verhalte goht natürli gar nöd i de asiatische Kulture.
Mir isch nonig so ganz klar, wie ich am beschte zu mim nächschte Zeltplatz chum. Muäss es wohl mit de Tourischtinfo da aluägä. Aber wahrschinli hends au kei Ahnig, obwohl es wiederemol zum gliche Nationalpark ghört.
Zersch gohts aber zumene Dorfspaziergang. Glichzittig hani dLäde abklapperet. Es isch unglaublich alles voll Souvenirläde aber nirgends chasch normali Sache poschte. Will ja Aomori für ihri Öpfel so bekannt isch, sind die Läde voll mit verarbeitete Öpfel. Acht Läde und kein einzige frische Öpfel. I eim Lade nächli usedra hani doch no Tomate und Banane gfunde. Aber für das machi keis Füür. Ja de Plan isch wohl au wieder id Hose. Olma-Bratwuscht, Brätbrötli und Waldfondue hends da ja sowieso nöd. Wieder öppis woruf ich mich dehei fröie.
DHauptattraktion nebscht em See isch de Schrein inmitte vomene Zederwald. Wunderschön isch es. Natürli bini wieder en Stempel go mache lo. DFrau het mi churz bitte zwarte und ich ha gantwortet: Keis Problem. Ich han Ziit. Irgendwie het die guäti Frau verstande ich heg kei Ziit. Ha se versuächt zkorrigiere. Si het nämli so es Gsicht macht, als ob i wieder so e blödi Touristin bi, wo schnällschtmögli alles gseh möchti. Sisch mer gar nöd rächt gsi. Die ander Dame isch nächli fründlicher gsi. Hinderem Schrein hets no e Stäge ufe gha zumene andere chline Schrein. Au ganz schön gläge. Wiiters bini denn zum Dorfsymbol, ä Statue mit zwei Fröleins. De Seeweg zrugg zum Zentrum isch scho rächt gschäftig gsi. DAmis sind schlussendlich glich zum Bade cho. Niämert het ine anschinend gseit, dass mer das nöd dörf.
Im Tourischtebüro hani versuächt min Plan zerchläre. Die erscht Antwort: Das seg scho Iwate-Präfektur. Also indirekt erchlärt, dass es si nüt agoht. Luschtigerwiis fangt scho en Kilometer wiiters dAkita-Präfektur a, also me müssti scho nächli über de Tellerrand denke chönne. Zuädem hend die beide sich zu eim Nationalpark zämägschlosse. Ich han denn glich no chönne entlocke, dass die Strecki wo ich denkt han 45km isch und kein Bus fahri. So bini wieder bi null gstande i minere Planig. Die witere zwei Stund hani versuächt irgend e schlaui Lösig zgfinde. Huärä schwär gsi. Mini erscht Variante wär glich di Strecki richtig Süde durab zgo. In Google zeigts nämli nur 32km a. Denn mit em Zug bis nach Morioka. Dett ime Hotel übernachte und am nächschte Tag hetti super Ziit und Verbindig gha zu mim nächschte Campingplatz. Leider hets kei einzigs Zimmer frei ime zahlbare Priisrahme gha. Ich hans entlang de ganze 2-stündig Zugfahrt im Radius vo 5km gsuächt. Nix. Also isch Plan definitiv gschriche. Denn blibt mer nur no dWahl zrugg über Hachinohe zgo. SPositive: Ich chan wohl wiedermal e Stund mit em Shinkansen mitfahre. Plan vorläufig geritzt.
Nachem Blog update, bini mir no en Öpfelwii, Öpfelringli und Riiswaffle zum zNacht poschte. Da ich ja scho fasch zwei Monet nüt alkoholhaltiges gha han, wird dä guär ifahre und ich sött äntli wieder ruhig pfuse chönne. Ich befürchte allerdings, die eint oder ander Famili da wird wohl no Füürwerch ablo...a und weder Öpfelring, -wii no dRiiswaffle sind guät. All so süäss.
No en Tipp a Familiäcamper: Gib niä e Insektspray id Händ vomene Chind. Da hets en 10-jährige, wo ab jedem Viich verschrickt und es beneblet. Die riise Spraydose isch sicher ine Viertelstund läär.

ZFuäss: 18700, 15km