Profile
Blog
Photos
Videos
Am füfi am Morge het de Wecker gschället und gnau jetzt hets au wieder afange rägne. So doof. SZelt isch scho dräckig-nass mit Waldbode bekleischteret vom Vortag und das no nass zämäzpacke wird e Fröid. Han de fängs zganze Interieur zämägrummt und mit chli abwarte ghofft, dass es ufhört. Ich muäss spötischtens am 9ni uf de Zug wiiters und hoffe, dass ichs wenigstens chli cha putze. Geg di halbi Achti hets denn uf risle reduziert und ich ha alles müäsam zämägrumt. Richtig grüslig zum alange. Abe gschiits Bürschteli hani nöd. Nur so blödi Füächttüächli. Han demit sgröbschte eliminiert, aber has denn glich relativ dräckig müässä zämäpacke. Hoffe, denn am Abig nächli troche und en Schluch zur Verfüägig ha. Nach dere Büäz bini no gschwind zum Strassebahnhof mir es Zmorge pöschtele und den wiiters zum Bahnhof. Vo det bini zur Grossstadt Hachinohe gfahre. Am Bahnhof sGepäck kurz glageret, i de Touristinfo erfahre, dass ich uf en andere Campingplatz muäss uswiche. Denn schnäll no mit em Bus id Innestadt. Han eigentlich ghofft, länger Ziit i de Stadt zverbringe. Es het nämli schöni Pärk und Schrein da. Vo eim hani letschtens en Bricht gseh, dass es wieder ufbaut hend nachem grosse Tsunami. De goni no gschwind go bsuäche. Dana langets no für min erschtä Zmittag im Mosburger. Dä isch weniger guät gsi als erwartet. Han bis jetzt Lob vo Mosburger nur i de höchschte Töne ghört. Eigentlich bini nur det ine, wills dettä e Steckdose gha het und ich no es bizzli News öi schuldig bin. I de Stadt hani ebe entli Internetempfang.
Dana isch schnäll wieder zrugg zum Hauptbahnhof gange, wo de Bus au scho bald acho isch. Zwei Stund hani der drin dörfe verbringe. Aber dRegion Towadako söll sich lohne. Die letschte 20 Minute hend das scho bestätiget. E sooooooooo wunderschöns Flüssli i Stei, Moos und Waldlandschaft. Und sBeschte Nummer 1: Es het en Wanderweg wo meischt nöd teert isch und über härzigi Brüggli füährt. SBeschte Nummer 2: Ich gseh äntli mini langersehnte Wasserfäll. Mini Route für de morgig Tag isch also scho vorbeschtimmt. Han voller stolz mini Charte woni vom Aomori- Mont Bell-Lade han füre gno. Leider het mi das völlig verwirrt. Will de Campingplatz dadruf sind irgendwie ganz andersch verteilt. Denns grosse Aha. DKarte vom Mont Bell isch über de Tazawako und ich go ja zum Towadako. Wiemmer die nur cha verwächsle... Zu minere Verteidigung: dSeeforme gsend gar nöd so verschiede us und zwei vo vier Kanjis sind glich. Naja trotzdem bini denn in Yasumiya ( usgsproche fasch wie Jasmina=) ) no is Bsuächerzentrum. Yasumiya heisst wörtlich Usruähheim. Schön hä. Scho fühlt me sich usgruäbt. Wieder so gross wie das am Toyasee in Hokkaido. Denn bini no die vier Kilometer zum Campingplatz gloffe. Ich seg öi ei Fröid hani. DStrass bestoht nur us natürliche Waldallee und es het vill es Trottoir oder gar es Waldwägli. Drum hani grad entschide, dass ich drüü Nächt da blibe. Es isch denn Blitzschnell gange bis zum Zeltplatz. Dett nächschte Juheee. En riise Platz im Wald. Wunderschön gmacht. Da ich so lang bliebe hani sogar en eigene Autozeltplatz becho statt die herkömmlich Zältwiese. Ich han jetzt also fasch e Moosmatte. Däzuä no e eigeni Füürstell. Jetzt hani so richtig Luscht zum Brötle. Hans ja müässe jetzt fasch dn Monet zuäluägä und träge Zundhölzli au sit em Jänner mit mir ume. Hoffe, ich gfind was feines im Dorf morn und schaffs rechtziitig zrugg zum Holz poschte. Denn hets no Duschene, richtigi WC's, Wöschmaschine, en Ufenthaltsruum - alllerding nur bis halbi Füfi und Steckdose. Es Bäseli hani au no gfunde und cha mit dem mis Zält abbäsele. Es gseht nöd ganz meh so schlimm us und jetzt chas ja guät tröchne.
So Fröid hani a eem Ort, dass i mi grad uf mach, all mini Broschüre durezachere.
Ich liese so dCamping Broschüre und gseh under Punkt Siebe vo de Platzordnig: Schwimme nicht im See. Es ist GEFÄHRLICH. Nimmt mi wunder was da sich wieder usdenkt hend. Ächt au s'chalte Wasser? Oder allefalls sKursschiff, aber das het ja en Kurs. Mal luägä öb ich öppert chan fröge.
Ich gseh, das de Tazawakosee ( also ebe nöd de woni jetzt bin) grad zwüschet em Hachimantai-Gebiet (mis nächschte Ziel) und Akita (mis Ziel am 20.8.) liit. Supper. Fröi mi.
Die ander Charte vo mim mörgige Lauf zeigt 14km a mit 14 Wasserfäll. Sooo schön. Das cha nur Hammer wärde morn.
ZFuäss: 16600, 13.4km; Zug: 35km, Bus: 65km
- comments