Profile
Blog
Photos
Videos
Han relativ schlächt gschlafe und bin drum am morge nöd so ziitig unterwägs wie i denkt han. Dusse sinds wieder an Muschle sammle und bade. Für mich gits hüt nur en chline Spaziergang am Ogawara-See. Han zu minere Fröid en Wäg gfunde, wo zimli am See nache goht. Also einmal bini wieder inere Sackgass glandet. Natürli erscht nacheme Kilometer und es paar Spinnenetz im Gsicht. Wänns am Wägrand nöd alles voll Riisfälder hetti, chönntis grad so guet i de Schwiiz sii. Alles voll Schilf, Pfiffeputzer, Kleewiese, Reiher, Taucherli, und und und. Guät ahand vo de Höger wohl eher im Schwiizer Flachland. Ganz überrascht, hani anere 30-köpfige Milangruppe zuägluägt. Öppe drü Bussard hets au no gha. Ha no nie so vill ufs Mal gseh. SBeschte am Spaziergang isch wohl en Iisvogel gsi. Genau...han min erschte Iisvogel im Freie gseh. So schön ischer gsi und au schnäll weg. Ja, wenn so wenig Lüüt da verbii chämtet, wäri wohl au verunsichert wenn mi öppert so lang aluägät. Nach acht Kilometer bini denn umkehrt und han imene chline Schatteplätzli es Päusli gmacht. Äs isch richtig gmüätlich da und wär perfekt für es Sunntigsvelofährtli. Nur de enorm Fluglärm stört. Im Rückweg bini no emene Schrein verbii und e Koi-Farm.
De See het e ganz grüssligi Legende. Wahrschinli um dChind devo zbeware elleige zum See zgo. Aber si isch nächli verwirrend. Also ich chum nöd würkli drus, was dMoral söll si. Um de ganz See sind dere Gschicht Schrein und Statue gwidmet.
Zrugg bim Zeltplatz hani eigentlich wellä no öppis im Dorf go poschte. Han mi denn glich entschide zersch no öppis im Restaurant go trinke. Bin drum so gäg di drüü nachemene chline Dorfspaziergang vorem Restaurant gstande, das so was vo zuä gsi isch. Blöd. Also han mer halt usem Getränkeautomat öppis uselo. Grad den hets afange Chatze schträtze wie nüt. De ganz Badeplatz und Parkplatz isch innert e Minute leergrumt gsi. Nach 2min bini im Zelt khocket und nass gsi trotz em Schirm. Han mi gschnääll wieder warm agleit und grächnet, dass dä Gwitterrägä wie süsch au nach es paar Minute verbii isch. Us dene paar Minute sind vier Stund worde. Ich ha würkli scho demit grächnet ufeme natürliche Wasserbett zschlafe. Zersch sinds nebet em Zelt nur Gunte gsi und die sind grösser und grösser worde. Naches Ziitli isch den sZält ganz mit Wasser unterloffe gsi. Erstunlicherwiis hets immerno ghebt. Han alles in Rucksack packt, was nöd wasserfescht isch und de mitem Rägeschutz usgrüschtet. Ich han mi denn selber mit Rägejacke in Schlafsack uf dLuftmatratze gsetzt und de Rucksack uf dChnüü gno. Es muäss absolut behämmert usgseh ha =) Zu allem übel isch mini Luftmatratze sit es paar Täg nüm ganz dicht. Han zwar en Flick poschtet, han aber no kei Glägeheit gha zums repariere. Ja, es isch nüm so luschtig gsi. Han a minere Abentüürluscht würkli zwiiflet. Ich ha kei Ahnig gha, ob es so die ganz Nacht tuät oder irgendwänn es End hät. Die vier Stund sind wie e Ewigkeit dure. Han zwar mich mit Japanisch lerne abglänkt, aber es het huärä nöch donneret. Das het mer nöd nur dur dChopfhörer ghört sondern au gspürt. Am sächsi isch de Luutsprecher a. Da schreit es Chind dri, dass jetzt 6i isch und mer schnäll müässi hei go ässä. Mal was anderes. I andere Ort hends meischtens Musig.
Woni am 7ni de Chopf usem Zält gstreckt han isch Unwetter dure und de See und Himmel gsend us als segets immer friedlich so gsi. Wänni nächli umegluägt han, hani no Schwein gha. Um mis Zelt ume sind Gunte fasch wieder versickeret. Rechts vo mir sind drü riise Zelt imene füf cm tüüfe See gstande. En andere es bizzeli me rechts het en eigene See um sich ume. Uf all Siite mindeschtens 4 Meter Wasser und Zält stoht 15cm tüüf. Aber die hettet alli es Auto gha zum sich in Sicherheit bringe. Dä Konfort hetti nöd gha.
Leider hani realisiert, dass es ziitlich wohl zum Poschte nüm langt. Aber ich han ja no Vorrät. Also no die Halbstund Liächt nutze, um mini Matratze im See versenke und zrepariere. Han zwar drüü Löcher gfunde, aber wahrschinli het die füächt Luft nöd ghulfe, dass die Chläber richtig haftet. Am Abig hend no es paar rundumme so blödi Knallfüürwerch ablo.... und ich bin so au nöd zum Schlafe cho...
ZFuäss: 26100, 20.8km
- comments