Profile
Blog
Photos
Videos
DNacht isch relativ unruhig gsi. Bin de ganz Ziit ufgwacht sit em 1. Denn hets au schön mal no abegleert. Aber i ha mit dem scho grächnet gha und sZelt wiedermal vo Afang a zuägmacht. Irgendwänn am 8i bini glich us en Zelt drollet au wänni mi alles andere als erholt gfühlt han. SWätter isch hüt super zum Laufe. Kei Sunne und kei Rege. Natürlich glich tüpig wienemore. Hüt hani scho gschwitzt nur vom Sitze. Müähsam. Ich ha usegfunde, dass ich die ganz Strecki hüt uf Landwirtschaftsstrasse chan mache. Also die glichet öppe üsere Überlandstraas.
Nebet em Camping sind scho fliessig am Parkgolf spile. Es schinnt luschtig zsi. Dana isch so zimli nüt gloffe am Strasserand. Aber si het nur us Höger bestande. Nebetra alles Wald - teilwis bewirtschafteti Riis- und Mailsfelder. Drum isch mer dStrecki hüt wieder e Ewigkeit vorcho. So am Mittag hani realisiert, dass ich ja zum Zmorge nur e Iisschoggimilch usem Automat gha. Da ich aber mis Ziel scho gli erreiche sött, hani abgwartet und entschide, mir defür äs Curry i de Stadt zgönne. Irgendwie gets no afange Dunnere, aber de Himmel isch meh wiis als grau gsi. Komisch.
DStrass het mi direkt zum Bahnhof gfüährt und det häts so e typische Imbissbude, wo natürli au mis gschätzte Curry gha het. Nach dem göttliche Mal undeme Bananeshake han mi den zum Zeltplatz ufgmacht. Defür muäss i es bizzeli zrugg.
Oder doch nöd. Han überrascht müässä erchänne, dass de Zeltplatz woni is Aug gfasst ha, gnau de glich isch wie dä woni usgschlosse han wiener zwiit ewäg isch. Die glich Strecki so lang retour hani echt kei Bock gha und es wär denn au definitov zwiit für mini geplant Tour am morge. Also churzerhand umplant und zum nächschte Zeltplatz mit em Zug. De isch nur zwei Kilometer vom Bahnhof wäg und liegt am Ogawara-See. Es dunklet scho rächt i. Woni Zält fertig ufgstellt han, hani fasch nüt me ohni Taschelampe gseh. Es liit wohl au dadra, dass en chline Waldpark isch.
ZFuäss: 34900, 28km; Zug: 20km
- comments