Am drüü het mi so e blödi Möve gweckt. Die het sich usgrechnet zwei Meter näb mim Zelt müässä kund tuä. Ich chan nöd so früäh los. Han nämli kei Proviant und wer weiss, woni wieder lande.. Aber ich bin au nöd wahnsinnig motiviert hüt zlaufe...Uf die 9i bini denn no churz i de Poscht verbii. Han wohl mit de Geburtstagscharte-Wahl wieder für Arbet gsorgt. Si müänd zersch abkläre, öbs Chartene mit Grüsch dörfet id Schwiiz importiere. Mer hends aber dere Ziit no glatt gha und schlussendlich het alles klappet.
Nacher bini ines Lädeli go poschte. Isch nächli komisch gsi, dAthmosphäre drin. Bin denn min Zmorge am Hafe go ässe. Bim wiiters laufe, bini no vill Chind begägnet. Alli mega fründlich. Gar nöd so reserviert, wie die Erwachsene da im Dorf. In Ooma hets no e grossi Betonfabrik gha und da hani dGussforme für die Wellebrecher gseh. Bi mim witere Wäg hets es riisigs Trottoir gha. Han mi scho gfreut uf en agnähme Lauf. Leider het das Trottoir irgendwo i de Pampa ufghört und ich han wieder i de Strass müässe laufe. Die het dur etlichi chlini Fischerweiler gfüährt, aber au det keis Trottoir und no engeri Strass. Im Verglich zu Hakodate vill unruhiger. Also vill Buchtene und Höger. Dörfer hend au relativ eifach usgseh - teils us Schwiizer Sicht gar verwahrlosd. Meischtens no sehr ähnlichi Hüsli. Da au nöi Brugge gha het, nimi a, dass det letschtens en deftige Taifun verbi isch.
Im Weiler vor Sai ( dem nächscht grössere Dorf) hani no e chlini Pause igleit, da es wieder zum Verzwiifle düpig isch. So bini no mit zwei ältere Herre is Gspröch cho. Uf em nächschte Hoger het mi denn e Dame no abgfange und mich mit em Auto zum Zeltplatz chauffiert. Da de Campingplatz au no nächli wiiter südlich gsi isch, bini froh gsi, dass si grad gwüsst het wo. Ich han den vo ihre erfahre, dass zum dem schöne Wasserfall ane, wo min nächschte Plan gsi wär, kein Bus fahrt. Au zu min Plan-B-Ort Wakinosawa nöd. Dass heisst, ich chum irgendwie nüm us dem Dorf use und die nächschte Zeltplätz südlich sind 40km und meh entfernt.
DPlatzverwalter het mir den versuächt zhälfe und het mir au no e richtig guäti Reisebroschüre über die ganz Halbinsel ghä. Han ersch nachher gseh, dass die sogar alli Zug-, Bus-, und Schiffplän drin gha hetti. Aber dank de Charte hani usegfunde, dass regelmässig es Schiff vo Sai nach Wakinosawa füährt. Super, das söll es si. DAlternative wär e Busfahrt zrugg nach Ooma und wiiters über dOschtküschte nach Mutsu. Det hets au cooli Ort gha, aber kein einzige Zeltplatz und allem mit em Bus verbii zfahre, isch nöd mis Ding. De Verwalter het denn no id Tourischtinfo aglütet und mir dFahrziit usegschribe. Es gseht dana us, als müässti früä wiiterszie. Keis Problem bin ja momentan imeneguätä Rhythmus für das. Bin den no nächli go umespaziere. De Zeltplatz isch relativ chli, het aber no vier Hüttene zum vermiete. Mer isch uf e liächte Ahöchig und gseht vo Süd- bis Nordweschte übers Meer. Im Dunkle het mer denn au Liächter vo Schiff gseh. Das sind Fischer vo Tintefisch gönd go fische. Im Südweschte hets no zwei Felsformatione mit je ämene Schrein druf gha. Eine isch a Fraue gwidmet, de ander a Manne. Detwüschet hends äs Gitter ufgstellt, wo Päärli chönd Schlösser befeschtige und denn happy-ever-after zämä sind. De Platzverwalter het mir das ganz stolz verzellt.
I bin druf abe zrugg is Zält und han eigentlich welä pfuuse, damit i morn fit bin. Überraschenderwiis isch denn plötzli dFrau womi vorher an Zeltplatz gfahre het uftaucht. Si het mer selbergmachti Sändwich bracht. Die Frau schafft als Sekretärin i de Schuäl. Mer hend no nächli gredt, bis si sich denn verabschidet het. Chum hanis mir wieder bequem gmacht, isch de Verwalter mit de Taschelampe ( also me en Schiiwerfer) und emebe Gascht cho. Es isch e Amerikanischi Famili, wo grad cho isch und i de Hütte übernachtet. De Verwalter cha kei Änglisch, also han ich dörfe übersetzte und erchläre, wos am 9i no Lebensmittel chönd poschte. Ich bi zmüd gsi, zum dene no arate, sich nächli vorzbereite. Hend nämli huärä Schwein gha, dass das Dörfli en Konbini gha het, wo bis am 10ni offe het. Aber mit Auto sinds ja flexibler als ich. Nachher hends mi denn glich no schlafe loo...

ZFuäss: 24300, 19.6km; Auto 8km