Bin churz nach de Drüü verwachet. Komischerwiis hani rein vom Liächt her kein Unterschiid gmärkt, da am drüü oder am Sibni. Denn hani nämli alles zämägpackt gha und bi los.
Aja de geschtrig Blogitrag fählt. Bin praktisch de ganz Tag im Zält mit Fiäber gläge. Am Morge het mer de Verwalter no überraschenderwiis Sandwich und heissi Kafidose bracht. No niä gseh, dass mer die au heiss cha poschte. Am Namittag ischs nächli besser gange und so bini an Empfang zum no diä zuäsätzlich Nacht szahle. Die het mir gad au erloo. Mir hend no es Wiili gredt, han aber schnell müässä än Stuähl hole, wills mer Schwarz vor Auge worde isch. Zrugg im Zält hani mich usgruäbt und willi usnahmswiis mal kei Chopfweh gha an, hets e rächtlangi Japanisch Wörtlilern- und Quiz-Ziit ghä. Und denn isch min absolut spannende Tag zänd gange.
Also ebe zrugg zum 7. - ach schon dä siebt...
Bi zersch die drü Kilometer zrugg zur Hauptstrass gloffe und denn det wiiters ufwärts. Es het die ganz Nacht duregrägelet und das isch au jetzt de Fall. Drum gits wiederemol kei Föteli. Aber de Wäg duruf. Soo astrengend. Gäch wie nüt. Aber dur das i nonig rächt fit bin isch no me e Qual. Eigentlich sinds nur drü Kilometer gsi. Aber die intensiv. Han zersch am Morge gfrore und han müäsä dRägejagge ablegge, wie diä nöd richtig 'schnuft'. Woni äntli mal irgendwo was Passendes und trochnes zum Anesitze gfunde han, bini scho im Iigang vo dem Tourischtedorf gsi. Es heisst Ikaho und isch eis vo de vier gröschte, beschte Onsenort vo Gunma. Ich ruäbä nimene chline Park us, wo em ehemalige Tramverbindig vo Shibukawa us gwidmet si. Die muäss wohl i de 60er abgrisse worde si, da es Föteli vom 54-59 het. Interessant isch, dass scho zu dere Ziit dLäde in Katakana, also Fremdwortalphabet gschribe worde isch. Und Übergangsschranke isch uf Änglisch agschribe gsi. Hetti nöt dänkt. DRegion heisst au Shibukawa und wird uf Japanisch als Bauchnabel der Nation bezeichnet. Also es müässt glaub dMitti vo allne Insle si.
Dana ischs wiiters gange. Es söll no 12 Kilometer bis zum Haruna-See go. Die Strecki goht au ufwärts hät aber Passstrass. DHauptattraktion vo Ikaho isch ä elend langi Steggä duruf zum Schrein, verbii a Restaurants und Souvenirläde. Aber das tuäni mir nöd a. Si gseht cool us, da es no en chline Stägewasserfall het mit de Heisswasserquelle.
Ich möcht nächli vorwärts mache, bevor die Reisecar wieder chömmet. Es paar vo denä
möchtet ja sicher au gäre zum See. Also bini wiiters. De Wäg dana het churz en Fuässgängerbereich gha, dana aber nüt. Nach knapp zeei Kilometer bini aber a de Nebel-Wulche-Gränze acho. Han so 50 Meter wiit no gse. Es het nöd so usgseh, als würd sich die wiis Wand bewege. Aber e Passstrass bi Näbel, zFuäss ohni Trottoir und no selber nonig ganz 100 wegem geschtrige Fiäber, isch mir das ritütig zgföhrlich gsi. Also retour nach Ikahoonsen. Im Busterminal hani gluäget, öbs dn Bus zum See hetti. Leider bini nöd fündig worde und so hani beschlosse zu mim nächschte Ziil zreise und hat de Harunaser fallä lo. Bin den in Bus nach Shibugawa gsässe und am Bahnhof zur Tourischtinformation. Eigentlich hani nur gfröget, öbs in Numata au e Tourischtinfo heg. Will dö Wasserfall woni will gse, isch i de nöchi vo det. Er het das zwar bejaht und denn mir zig andere Bispil vorgleit het, woni doch anechönnt, wo i sim Terrain isch. Isch mer nächli zvill gsi, will ich das ja gar nöd han wellä. Er het mi aber glich überzügt, won er amerke loo het, dass es doch en Bus vo Ikahoonsen zum Haruna-See het. De Bus fahri aber ersch am halbi zwei. Somit hani hüt uum viärte Mal de Plan gänderet und bin halt wieder zrugg und mit em nächschte Bus no meh id Höchi. DNäbeldecki isch dasmal scho fascht zoberscht gsi. Aber es währet einigi Kurve uf mich zuächo. Mit em Bus hani fascht e ganzi Rundi gmacht bis ad Endstation. Grad näbetra isch es Onsen gsi und nöd wiit vo der de Zeltplatz. Respektiv er het sölle det si oder er isch det im Juli/ Auguscht. Aber ich gfinde gar kei Installatione. Und ohni Wasser und WC möchti nöd zälte, bsunders wänni nonig ganz zwäg bin. Also ischs wiiters id Höchi gange, wo de Autocampingplatz sött si. Ich hoffe, dä isch offe und nimmt mich arme Zeltler uf. Im schlimmschte Fall hets ja au no Hotel da, aber langsam wirds meh zur Hoteltour als Zeltvergnüägä. Jedefalls bini den no drü Kilometer gloffe. Im Wald sinds grad am Bäum a de Strass am Absage gsi. Natürli wie immer mit doppelte Sicherheitspersoneisatz und jenschtes Geblinke. Churz dana bini bim Campingplatz gsi. SHaupthuus isch rächt gross und si gend jenschtes Usrüschtigsmaterial vo Coleman. Han wider de Höchschtbetrag vo Zältplatz zahlt und das ohni Strom. Defür chani wohl no dWöschmaschine benutze. Und zwar kei Münz. Ich sött no nächli laufe, also packi de MP3 und laufe no an See. Um de See langz Ziitlich scho wieder nüm. Es hät e chlini Seilbahn ufs Bergli und es wär wohl im Summer es riise Gaudi. Wer seit, dass es immer normali Velos zum Vermiätä muäss gä? Irgendwiä erinneret mi die an Fred Feuerstein...siehe Foto.
Im Zeltplatz zrug hets snormale Abigritual gä, eifach wiederemol ohni Handwösche. Bini gar nöd bös.

ZFuäss: 30200, 24km, Bus 26km