So min erschte Morge in de Gunmapräfektur. Die isch verwirrend für mini Planig, wills e relativ churzi Hauptachse het mit de langwilige Städt und die spannende Sache sehr verzwiigt id Bärge füährt. Gunma isch au berüähmt für sini Onsen. Ich han eigentlich wellä go, aber die Ryokan ligget augenblicklich nöd i mim Budgetplan. Also werdi wohl diä Ort au vermide. I de Stadt Shibukawa bini no go Vorrät poschte und Sunnecrème-Nachschub. Denn gohts mit em Zug zwei Statione ines Wiilerli namens Ubashima. De Zug het ganzi 10 Minute Verspötig gha. Nächli fräch, gäll. Bin eleige dett usgstige. Es isch grad no eine dett gsi wo für sBahnunternehme oder Gmeind Föteli macht. Ich bin au no druf cho. Wahrschinli schribets drunder: Auch Ubashima muss touristenfreundlich sein. Jedefalls hani min Iichauf no verstaut und bin losgloffe. Zersch de Hauptstrass entlang wo wahrschinli in nächschter Ziit dur ä Autobahn abglöst wird. Si sind grad anere grosse Brugg dra. Nacher ischs id Japanische Romantische Strasse gange. Das isch im Fall würkli so uf düütsch gstande. SFöteli bewiists. Aber han nüt so Romantischs entdeckt. Einigi Waldränk villicht. Aber die sind au nöd bsunders gsi. Underwägs sind mer einigi Schmättervogel begägnet und en mega schöne Salamander. En chline, vo Schwarz über blau is orange überlaufendi Farbe und no zwei Längsstrich obe. Aber das gsend ja die uf de Strass nöd.
Min nächli überrascht worde vo de Azahl Reisecär wo mer entgäge cho sind. Während zwei Stund über es Duzend. Nach äs Ziitli hani denn gseh, dass es es Onsen-Dorf het mit riisige Hotelbaute. Nüt schöns. Ich möcht jetzt gar nüm wüsse, wie de berüämt Onsen-Ort vo Gunma usgseht. So zum Reläxe wärs wohl schwär gsi.
Min erschte Zeltplatz isch relativ nöch. Han denkt ich überspring en, aber bin rätselhafterwiis nonig fit. Die acht Strassekilometer hend sich agfühlt wie driisg. Am Zeltplatz hani zersch müässä e Halbstund usruähbä bevor is Zält ufgstellt han. Es gseht nächli luschtig us. Die Flickete vo de Manne hebt glich nöd ganz so guät wies denkt hend. Wie ich dene versuächt han klar mache, müsst mer doch zersch die abbrochne Ände mit em Hammer gäg ine stubse, damit sKlebband hebt. Und was isch passiert: Heimwärkerprofi-Jasmina hets vorusgseh: SKlebband hets igrisse. Mä muäss ebe immer zersch sSystem alluägä, gäll Dädi. Jedefalls tuät dStange jetzt me destabilisiere als das wo es sött. Wird bi starchem Räge und Wind wohl Müäh ha, einigermasse ufrächt zbliibe. Aber nöi Stangene goni sicher nöd go poschte. Vorallem will ja dSaison teil Ort scho färtig isch.
Ich han vom Hotel und Zeltplatz einigi Charte gsammlet und bin die no rächt go studiärä. Han per Zuäfall gse, dass die gross Seerose woni in Akita-Stadt gseh han wohl kei Seerose isch sondern ä Lotusblüätä. Uf das muäss mer zersch Mal cho. Ich han vorher no niä live ä Lotusblüäte gseh. Aber mer gseht si au vill me abbildet, als in ächter Grössi. Apropos Pflanze. Em We entlang hüt hets vill bewirtschaftiti Fälder gha. Da hets Pflanze woni kei Ahnig han was devo gwünne wänd. sEinte ganz härzigi 40cm höchi Bäumli - nei kei Bonseis.
Es isch eigentlich rächt warm, sitze aber mit Jagge am Picknicktisch. Nachere guätä Stund früüre sind no füf Jungs uf em Tennisplatz nebetra go spilä. Luschtigerwiis hends zersch mal en Schluck Biär gno. Spöter bini no en Spaziergang go mache, damit i wenigstens wieder es paar Kilometer gsammlet han. Unterdesse isch ä Lagergruppe im Waldpark acho. Die isch allerdings ame andere Ort verfrachtet worde.
Chum bini nachem dDusche is Zält ghocket, häts afange rägnä. Aber nonig fescht, sZält sötts wohl überstoh. De Verwalter isch bim Fyrabig no verbi cho zum sägä, dass wenn diä Lagergruppe zluut seg, sell ichs go sägä. Und es het no komischi Lüüt von parkiert händ, aber nonig zahlt. Naja i bednä Fäll würdi sowieso nüt sägä, aber er hets ja liäb gmeint. Da ich im Autocamp bin, chani Steckdose nutze und no nächli quizzle uf äm Natel. Und dänn gohts au wieder undere. Bin fix und foxy vo nüt.

ZFuäss: 23800, 21.5km, Zug 7km