Profile
Blog
Photos
Videos
Am Nüni bini parat dusse uf de Hotelschwelle gstande und mich zu de Hauptstrass bewegt. E Halbstund spöter hani den min Konbini-Zmorge gnosse. Sprich: Drinkjoghurt für Kalzium, Vitamin c-Drink und Lachsonigiri für de Gnuss und Energie. Die erschte zwei Laufstunde sind nöd speziell gsi. Teils dur Industrie, dana dur vill Wohn-und Chliibetriebsgebiet. Aber da alles guet mit Trottoir versehe gsi isch, hani de mp3 usegholt und Hörbüecher glost. Aber dank am Herr Map Google hani nöd a de Schnellstrass entlang müesse. Au nach dene Wohngegende hani uf e Nebetstrass chönne uswiche. Sie fuehrt meh oder weniger em Gleis na. So chani flexibler Planänderige vornä. So fern es flexibel cha si, wenn nur rund all zwei Stund en Zug fahrt.
Natürli hets schnell keis Trottoir meh gha. Da es jedoch e nöi breiti Strass gsi isch, wo praktisch kei Verkehr gha het, hanichs gnosse. Paarmal isch es chlines Wägli vo de Strass abdriftet, en nöd markierte Velo-Fuess-Wäg. Aber da de ersch is nirgends gloffe isch, hani bi de anderne mich für die sichere Variante entschide. I dem Moment hani es Zuggehupe ghört. Han no gstudiert öb i sell churz ahalte zum es Foti mache. Has den aber lo si, da es ja wohl e de Gegezug isch. Also bini scho chli wiiters gsi, als de Zug duregfahre isch. Da es mich komisch dunkt het, dass es vo Nagatoshi her chunnt han mi umdreht. Da fahrt doch eifach de Twilight Express dure. Wenni mi entschide het churz zwarte, hetti en schönnere Schnappschuss vom Zug gha, als dTrainspotter vom Vortag. De Twilight zmittst im Grüene. Schad. Aber chönnds no schönner si? Zmittzt i de Natur, praktisch autofrei und en schöne Zug?
Es isch au dana dur richtig schöni Waldhügellandschafte dure. Nach drü Kilometer ischs uf e Eibahnbreiti reduziert worde. E kurverichi Strass wo mich über es paar chlini Hügel gfüehrt het. Es paar Mal hets no e Ussblick ufs Meer gä. Ich bin grad recht in Ii acho, en Ort mit Bahnhof, als au scho sZügli naht. Da ich ja nonig würkli Internet gha han, bini zum Bahnhof und han ghofft, dass de nächscht nöd erscht i drü oder meh Stund fahrt. Ich han Glück gha und knapp 1.5 Stund bis zum nächschte Bahnhof. Luftlinie im internetlose Googlemap zeigt knapp 4km a. Da dStrass ja nöd grad isch...aber wer nicht wagt, dr nicht gewinnt.
Rund zwei Kilometer nach II isch dStrass wieder breiter worde. Trotz em änge Ziitplan, hani mir nöd lo, ines schline Nebetströssli abzbüge. Wenns e grossi Berg und Tal Strass isch, wirds wohl knapp. Aber ich bin gad recht ums Egg cho und scho dBelohnig becho. Es isch es normals ängs Strössli wie in Japan hüfig und ich ungern miteme andere Auto als en Smart würd durefahre. Die reschtliche zwei Kilometer hani dNatur ganz für mich gha. Wunderschöni, interessanti Buchtene, Felsformatione und villi chlini Inslene. Denn isch numol churz dur de Wald. Dä hani aber weniger chönne gnüsse. Es het plötzli afange huere Ziie i de nöchi vo de Chnübügi. Bin froh gsi in Sammi gli drufabe acho zsi. Ganz liäbi Lüüt dettä. Vill hend grad im Garte gschaffet. Ha denn no 10 Minute uf sZügli gwartet, wo mich nach Hagi bracht het. Det hani wieder Internetempfang gha und somit es Hotel buecht. De nächschti Zug fahrt inere Stund. Zwenig zum dStadt aluege. Es chlises Spaziergängli mit Bsuech vomene Schrein und Lade hets glanget. Au wenns imere nächli komische Gangart het müesse si. Nach übere Stund im Zug bini denn zMasuda acho. E Stadt i de Shimane-Präfektur. Det hani numol es Stündli uf min Aschluss gwartet. Mer het aber scho relativ früeh chönne in Zug sitze.
Aber Lüüt beobachte isch göttlich. En Herr im andere Zug het sisch Spiegelbild abfotografiert. Schiint aber nöd recht zfride gsi si mit sim Lache. De Zug Richtig Oschtküschte nach Yamaguchi-Stadt het nur Mittelschüeler drin. Weniger interessant. Ussert, dass die eint ihri Huusi mit rotem Chugi glöst het. Interessant i dem Sinn, dass es mines Wüssens de Schüeler da nur erlaubt isch mit Bleistift zschriibe. Drum sind die mechanische Bleistift da so beliebt. Au i minere Schuel hends das wellä durebringe. Isch sogar uf de Prüefig gstande. Aber rebellisch wien ich halt i de Schuel so bin, hani konzequent alles mit grüenem und pinkigem Stift gschribe. Ich wird no drü-Viertel Stund drin si. Ines Kulturdörfli, woni imene Business Hotel iquartiert bin. Es isch grad so seinzig i de Umgebig, wo en Computer vermuete loht und no freii Zimmer het. Interessant isch au, dass es e überus höchi Bewertig het. Denn müends ja fasch en Compi mit Word ha - bitte, bitte, bitte.
Zum zNacht gits no es Sandwich. De Konbini in Hagi het nüm vill Uswahl gha und so gnüssi eis mit Salat und rassige Napoli. Es schmöckt fasch wie Pizza. Naja... Wahrschinli nur für öppert wie ich, wo sit letscht Jahr kei richtigi Pizza gha het...
Unterdesse isch es stockdunkel und nur ab und zue loht sich es Dorf erahne. Churz nach de halbi Achti hanis gschafft. Ich bin in Tsuwano acho. Liecht hets nöd gross. Aber so e wiisi Schiibe am Himmel het es paar Hügelkulisse lo erschine. DLuft seit mit aber irgendwie, dass mir das Plätzli gfallt.
ZFuess: 34600, 25km, Zug 95km
- comments