Profile
Blog
Photos
Videos
Fascht hetti sZmorge verpasst. Bin so spat igschlafe, dass ich schlaftrunke nächli meh gsnoozet han, als realisiert. SZmorge isch gmacht worde vo de Bsitzeri. Sehr ähnlich wie mini Hostmother in Kyoto zMorge parat gmacht het: Toascht, Omelette, Gmüesli, Früchtli und es Würschtli mit Ketchup. So wie halt dJapaner international chochet. Zrugg im Zimmer bini fasch wieder igschlafe. Bin glich no churz anegläge, i de Hoffnig sChopfweh verschwindet. Gäge Mittag bini denn uf Dorfexkursion. Es het es Kapelleli, eine vo de füf gröschte Inari Schreins und es schöns Altstädtli. Natürli hani am Morge nöd us em Fenschter gluegt und bin völlig überrumplet worde vomene bewölkte Himmel und chüele Wind. Än Traum. Äntli. Mini Fröid isch vo churzer Duur gsi. Anschinend dörf ichs nödemol gnüsse, da sich wieder mis Bei mäldet. DKapelle ind de Schrein sind bedi uf verschidene Höger mit öppe e Viertelstund Ufstig. Das heisst, ich muess mich für eis entscheide. Natürli isch dWahl uf de Schrein gfalle. Chum bini am grosse Tor gstande hets afange rägne. Natürli hani de Schirm im Hotel lo. Wer rechnet au nach drüü Wuche Hitz no mit Rege? Tja luschtigerwiis, hends die ville typische Shintotorweg no überdacht. So bini nöd würkli so nass worde. Uf em Ufewäg hani no en Zug pfiife ghört. Han agno, dass es eifach de normal Pendlerzug isch. Aber dur mini verpassti Chance geschter, hanni glich aghalte und min Blick übers Dorf schweife lo. Ich han nöd chönne usmache, wo sGleis verlauft. Doch denn hani en plötzli gsichtet: d' SL Yamaguchi. D'japanisch dAudrey Hepburn uf Schine: eleganti Schönheit, schwarz gekleidet und rauchend. Naja isch nöd ganz zgliche en Zug mit de Audrey zvergliche. Aber irgendwie isch mer grad si in Sinn cho bi dene Eigeschafte=). Au wenn d'SL Yamaguchi für üs vo afangs letschte Jahrhundert schiint, isch die Dampflok grad emol 36. Leider ischs Gleis so dur dHüser dure verloffe, dass i nöd würkli es Föteli han chönne mache. Ach... Villicht muess ich mir glich no es Zugabentür nebsch em Shinkansen iplane.
De Schrein isch riisig gsi und leer. Interessant, da mer öis amene wichtige Shintofiirtig nöcheret und es wohl e wichtigi Pilgerstetti sött si. Aber anschienend het isch nöd e Rägewetterattraktion. Ich find en wunderschön. Überblickt au no sHügeltal und de ander Shintoshrein uf em Hügel gägenüber. Durab isch scho fasch e Qual gsi. Trotzdem hani de Wäg zrugg dur die alt Hauptstrass gno. So herzig hends es hergrichtet. SDorf wird au Kyoto vom Weschte gnännt. Was eigentlich absurd isch, will Kyoto isch im Weschte und usser i de Region Kansai, was sTor zu Weschte heisst. Aber süsch ischs halt fasch so rich a Tradition wie Kyoto.
Es interessants Festival hends da au mit Kranichkoschtüm. Und e interessanti Sportart woni zwar scho vill ghört han, aber no nie gseh. Hoch zu Ross wird da e Strecki im Galoop gritte, whärendem de Riter mit Pfiil und Boge uf mehreri nachenandfolgendi Ziilschibe ziilt. E riise Höchschtleischtig muess das si.
Tsuwano isch ebefalls Gebuttsort vomene Doktor Mori, wo dütsches Medizinalwüsse im japanische Militär vermittelt het. Drum hets teilwis so en Huch düütsch. Es Wegwiser hets mit 'Unter den Linden'. Amüsant.
Au im Dorf stoht e katholischi Chile. Grad neb de entli gäle Ginkgo-Blätter. Die gfallemer bsunders. DJapaner seget nämli, dass blondi Haar so schön wie es Ginkgoblatt isch. Wemmer weiss wie bedütigsvoll so en Ginkgobaum für sie isch, muess mer sich doch gehrt fühle. Und um einiges besser als Strohblond.
Zrugg im Hotel hani mi welle, zwar nöd so motiviert, a dBewerbige mache. Han scho befürchtet, dComputer da heget au kei Word. Obwohl sich das Hotel offiziell Business Hotel nennt, ischs doch sehr uf Tourischte usgrichtet. Es isch dasmal e jungi Dame a de Reception. Mit dem Begriff 'Business Center' het si nüt chönne afange und au woni nacheme 'Computer' gfröget han het si mich aglueget, als wäredmer no i de 80er. Ich han denn no erchlärt, dass es im Internet so stoht. Aber si schint nöd interessiert gsi si, zwüsse wo, dass mers chönnt ändere. Villicht het die Person, wo dPortal uf Trab haltet gmeint, dass Wifi scho als es Business Center giltet.
Enttosche vo mini ernöite Pleiti hani mi is Zimmer zruggzoge und unsinnig dZiit vertribe. Wenigschtens wirdi so wieder fit.
ZFuess: 4800, 4km
- comments