Profile
Blog
Photos
Videos
Entsprechend minere Schlafduur hani erscht uf de 10ni Zug möge. Es söll hüt zumene schöne Egge vo de Yamaguchi-Präfektur go. E Gmüetlichi Wald-Strand Gägend mitere berüehmte Brugg zunere Näbedinsle. Dummerwiis hani mich in Zug gsetzt ohni vorher dZugverbindig - respektiv mir de Aschluss in Shimonoseki zmerke. Da ich mir au de nachfolgend Umstigeort nöd gmerkt han, bini zu Unterfüehrig gloffe und han ersch det gseh, dass min Aschlusszug uf em Nebetgleis fahrt. Natürli hani denn no dZiit falsch gläse - sprich irgendwie gmeind es segi 11:15 und nöd 10:15. Irgendwie verwirrt hüt. Nachem zruggschländere zum Gleis hanis denn realisiert und mit em Internet denn feschtgstellt, dass die nächscht Verbindig drü Stund spöter isch. Fruschtriert über die Tatsach hani mi is Starbucks gsetzt und wiedermal nächli japanischi Hörbüecher glost. Aber mis Hirn nimmt wohl hüt nöd vill uf. Die ganze Verzögerige füehret dezue, dass min Spaziergang zu dere Brugg usfallt. Ich han am Vorabig es Hotel buecht. Aber da es kei Verfüegbarkeite i de verschidenschte Portal gha het, hani no es Hotel gfunde, wo über ihri eigni Website sich reserviere lot. Leider isch nonig die definitiv Buechigsbestätigung cho. So muess ich no gnueg Ziit irechne, um allefalls no ines Hostel vo de nächschte Stadt chönne zuswiche.
E richtig tolli Zugfahrt hani defür gnosse. Wunderschöni Wälder, Riisfelder, Flusslandschafte und spannendi Buchte. Anere Wegchrüzig sind mer no Trainspotter ufgfall, wo wohl uf en bsundere Gägezug wartet. Da es zu dere Ziit nur eis Gleis gha het, hani mi wieder ufs Blogschriibe konzentriert und denn natürli promt dIifahrt in Bahnhof verpasst. DLoki het nur no zur Hälfti ufs Foti möge. Interessanterwiis ischs de Twilight Express gsi. Eine woni scho in Kyoto per Zuefall gseh han. Das isch glaub eini vo sine letschte Fahrte durchs Land. Aber die nöi Version chunnt 2017 - wohl sJahr vo de nöie Züg: Voralpeexpress und Twilight Express. Projektfoto verspricht amig scho ä mysteriösi Bsunderheit.
DFrau gegenüber isch gad ufgwacht, will si ihres Buech falle lo. Churz dana isch si usgstige und e Famili mit vier Chind isch id nöchi cho. Eher selte so vill Chind. Aber die meischte fahred ja au Auto und so gsehn ichs weniger.
In Nagato hani mi zum Hotel ufgmacht. Die hend sich höflichscht entschuldiget, dass sBestätigungsmail nöd usegange isch. Han also es Zimmer becho. Interessanterwiis hani i dere Stadt kei Internetempfang. No luschtiger. S'GPS isch völlig denäbet. Es tuet mich 100km nordöschtlich ad Oschtküschte setzte. Im Fernseh lauft defür es Kabukidrama - japanischs Theater mit nur männliche Schauspieler.
Zug: 88km
- comments