Am Morge woni verwache windets immerno fesch. Luut Wätterbrichts sinds 30km/h mit Böene bis zu 42km/h. Rägewulche hets nöd also gohts mit liächtem Gepäck id Stadt. Mit em Zmorge hets mi zersch Richtig Hafe inen Park zoge. Det bini es Stündli im Schatte gsässe, vorallem aber Windschatte, und han no nächli für de Blog gschribe. Mir gfallt ja Wind, aber dä isch nächli starch um gmüätlech zii. Im Park hets au en chline Teich miteme Schiff drin. Nächli luschtig.
Im Hafe näbetra hani au no luschtigi Fischerboot gseh. Die gönd wahrschinli au go Nachtfische. Die hend es ganzes Seil uf em Schiff mit Laterne gfüllt.
Trotz em Windschatte hani scho rächts Chopfweh becho. Medis hani natürli im Hotel, aber glaub nöd, dass die hälfet..
Ich han den en Schrein-OL zersch im Park und denn dur dStadt gmacht. Es het wahnsinnig vill, würd bhaupte jetzt da i de Innestadt grad so vill wiä zKyoto. Praktisch alli hend dDracheschnitzereie. Ich nimm drum a, das die es Wahrzeiche vo da sind. Wahrschinli irgend ä Legende. Ein Tempel isch no luschtig gsi. Isch wohl sit jeher au e Primarschuäl. Es isch en Mix zwüschet Spillplatz und historische Tempelbaute. Es het au no en riiisige Buddha. Die chline Buddhas sind mehrheitlich au die wo Chind-Mutter-Beziehig oder sChind sälber schützet. Underwägs bini denn glich no amene iiheimische Lade verbi cho und han mer no dTruube poschtet. Die Präfektur wär zwar für ihri Chriäsi berüähmt, aber die Ziit isch ja verbi. Uf em Rückweg zum Hotel bini einersits numol en Schrein go aluägä und denn no zum Warehuus vo da.
Sakata isch berüähmt sit jeher als Handelsstadt. Drum au das Schiff vorher im Teich und ebe au die Warehüüser. Es isch glaub au es Museum und het Verchaufslade.
En Bsuäch bi de Souvenirabteilig bestätigt mini Vermuätig vo vorher bi de Schreins. Es het e hufe Drachesujets in alle mögliche Forme.
Ich gnüsse denn min ZMittag mitere feine Summer-Udon-Suppe und schlafe fascht i...
Im Hotel retour heissts mini Reis wiiters plane und skype.
Am halbi Zähni bini denn numol is Bad. Dasmal sind dBäder vertuscht. Also dFraue sind hüt im geschtrige Mannebad. Ich weiss, dass das oft isch. Meischtens da es es grössers und es chliners het. Aber da wärs eigentlich unnötig, da es genau die gliche sind. Ich han überrascht usegfunde, dass sviärte Bad ischalt isch. Defür hanis i de Sauna kei Minute usghalte. 90Grad isch diä gsi. Unglaublich. Defür hani no so e luschtige Wasserstahl gnosse. De wird für e halbi Minute vomene Meter oberhalb abeglärt. Das hetti definitiv bi mine alte Rucksacktage chönne bruche. Aber het au jetzt guät tuä. Dana bini denn zimli kaputt is Bett.

ZFuäss: 24400, 16km