Plant isch gsi nächli früäner ufzstoh, aber janu...
Während em Zämäpacke amüsiär ich mich köschtlich über en Biitrag im Färnseh. Es zeigt, dass Volkswage en Schesäwage erfunde het, wo automatische Bremsene drin het und süsch automatisch einem folgt. DJapaner gfindet das üsserscht praktisch.
Im Konbini um de Egge gits den en Calzium-Kohlehydrat-Eiwiisriche Zmorge. Am Nüni laufi definitiv los. Bin zwar motiviert zlaufe, aber irgendwiä hani sGfühl nöd vom Fläck zcho. Nach es paar Kilometer bini den glich überrascht gsi, dass i hüt füf Kilometer pro Stund schnell laufe. Aber villicht liits dra, dass mini Strecki hüt us 18km uf de gliche Strass bestoht. Die erschte Zäh Kilometer hets super Trottoir. Ich han eigentlich scho wellä äs super Lob a die Präfektur gä als sTrottoir sich denn wieder nächli rar gmacht het. SWätter isch defür prima. Es isch wieder uf Normalgschwindigkeit abe und git es agnähms Laufklima. Es isch bewölkt, aber han denn glich imene parkähnliche Ding Pause gmacht, um Sunnecrème izschtriche.
Da ufem Bänkli näbetra grad drüü älteri Quatschtantene gsässe sind, hani no es willi gschnörret.
Nach knapp witere 10 Kilometer hani e grössers Dörfli Yunohama erreicht. Ich han scho de Konbini agstüret, alsi voller Fröid en Farmer's Marché gsichtet hat. Genial. DHälfti isch en Lade mit Saisonale Produkt und de ander Teil es Kafi. DProdukt sind vomene Riisegmüässabauer, woni vorher bi sine Fälder verbiigloffe bin. Dä isch berüähmt für sini Tomate und so isch i dem Lade 90% Tomateprodukt. Es het au no selbschtgmacht Brot gha, also ebe richtigs Brot. Da hani natürli eis poschtet und no Tomätli. Zur Pause hets es Cappucino gä und es Tomateglacé. Genau. Zu minere überraschig isches no fein gsi. Halt nöd so süäss, aber fein. Ich han den dä Saisonkalender bestuhnet, als ä nöi Chundin inecho isch. E Dame woni im Vordorf grüässt han. Si het denn praktisch diä ganz Brotuslag leerkauft und het denn mit mir no Käfelet. Sie chengi au nüt mit dene Toaschtpampe i de andere Läde afange. Mir hend denn no es wili plauderet und si het mer gäre no es paar rohi Eier mitgä. Ich ha denn aber wohl glich no guäti Gründ gha, leider müässe zpasse. Si isch denn wieder mit em Bus zrugg und mich hets wiiters szoge. Es isch scho halbi Zwei gsi und ich han wohl no zäh Kilometer vor mir. Ach übrigens es Tomate-Curry hettets au gha und ich ha widerstande.
De Wäg isch ab da wieder am Meer entlang, aber immer schön mit Trottoir. Dä Wällegang isch jetzt rächt gross, wird wohl em Taifun zverdanke si, vo jetzt am andere Ändi vor Japanische See si wird. Es git e richtig schöni Grüschkulisse ab. Da ich relativ ziitlich guät tra bin und grad Luscht han, isch no es Bsuäch im Aquarium agseit.
Es isch no interessant gsi. Also es isch praktisch alles japanisch agschribe gsi und somit ischs meh e Tiärschau gsi, als e Wüssenserwiterig. Aber han glich es paar Mal gstuunet. DTintefisch ( jetzt hani mi grad vertippt gha und Tuntefisch gschribe, guät ischs kei Schribmaschine) hend mi riisigi dunkt. Und de Papageiefisch segets au Papagei, obwohl ja im Änglische dä Fisch gar nüt mit Papagei ztuä het. Ich ha gwüsst, dass die so flach sind, aber nöd dass die siteärts schwümmet. Den dSpezialisierig vo dem Aquarium sind Quallene. Die sind richtig schön gsi und villsittig. Chlini, grossi, eleganti, Einzeller-förmig, blinkendi, und und und. Denn häts no Seelöie und Robbene gha. E Seelöi-Show au, aber die chönnt da au nöd meh als die im Knie Kinderzoo. Nachere Stund bini wieder dusse gsi. Da es nöd emol Tiärposchtchartene gha het, isch mini Souvenirusbüüti chlii.
Denn sind no die letschte füf Kilometer Meersichtstrass agstande. Alles entlang Buchtene und Kurverich. Es het au vill Tunnels gha, aber immer alles au mit Trottoir.
Churz vor de Füfi bini denn im Dorf Yura ( wie üses Jura usgsproche) acho. Wiit und breit kein Plan oder Schild, wo de Zeltplatz isch. Det wo dStrecknadle uf Google Maps isch, isch eifach Strand und en Strandwäg. Ich bin drum im Hotel näbetra go fröge. De Consierge het mer erchlärt, dass dZältsaison am 16. Augschte färtig gsi seg. Es seg jetzt zchalt. Er het mi denn wellä zumene Zeltplatz i de Värge verwiise. Dä seg e Autostund ewäg. Nachdem i erchärt han, dass ich zFuäss unterwägs bin, bini wieder e Attraktion gsi.
Er het denn wahrschinli mit em normale Betriber vom Zältplatz gredt, jedefalls hani denn dErlaubnis becho, mis Zält dörfe ufstelle. Zuädem hani no sWC im Hotel dörfe bruche und het sogar au da is Bad dörfe oder mich i de Lobby ufwärme. Die letschtere Bede hani dankend abglehnt. Schliesslich möchti nöd zvill Umständ mache. Inzwüsche hani au mini Lavabo-Wäschkultur scho fascht uf em Level vo de japanische Badekultur bracht.
Tja denn het die normal Routine gfolgt: Zält ufstelle, zNacht ässe, Wäsche, Wösche, Bischele, Sunneuntergang gnüsse und Blog schriibe. Ich befürchte fasch, dass das mit dene Zältplätz öfters so wird cho. Drum isch wahrschinli niemert bi de letschtä zwei Zeltplätz gsi. De ganz Ziit go Bittibätti mache, nimmt mer denn nächli de Spass... mal luägä, was mich erwartet.

ZFuäss: 38800, 31km