Am Morge hani ziitig möge uf und bin am Sibni parat gsi zum Laufe. SWätter isch fabelhaft. Schön, windig, nöd zheiss. Uf mim hütige Wäg möchti no en Abstecher zumene Schrein mache, wo uf minere Charte iizrichnet isch. Aber zersch muäss ich wohl es wiili laufe. Han vill Schuäler troffe, won uf de Bus zur Schuäl gwartet hend und wahnsinnig guäti Sicht uf de Chokai-Berg gha. Das isch de imposantisch vo dere Region und mit 2236m.ü.M au höch für Tohoku. Au in Kisakata het mer en gseh, aber immer schön i Wulche iideckt. Da ich aber mis Natel nonig igschalte han, muäss sFöteli no warte.
Nach zäh Kilometer laufe bini vor em erschte Konbini gstande mit Wifi. Das heisst zMorge poschte, sNatel ischalte, uflade und Mails chegge. Mit Blick uf Karte hani gmärkt, dass i de Schrein scho verpasst han. Doof, aber er wär ja sowieso no zuä um die Ziit. Numol ufs Natel gluägt, hani gmärkt, dass sNatel nöd ufladet. sKabel kaputt. Naja, denn hani wohl nur no füüf Prozentli während em hütige Lauf. Drum hani bi de nächschte Glägeheit no de Chokai gfötelet. Leider wieder es bizzeli in Wulche kleidet.
Mini Route hüt isch sSibni. Es het zwar rächt Autos, aber immer es Trottoir. Ime chline Dörfli hani chöne uf e Nebetstrass usweiche. Zersch bini amene riisige Tuubeschlag verbii. Dana hani glich no min Schreinbsuäch gha. En chlinere, aber wahrschinli grad so schöne. Es het wunderschöni Schnitzereie gha vo Drachene. Im Dorf hets au no e schöni Poscht gha. So heimelig ime Holzgebäude.
Bald ischs denn wieder id Hauptroute gange. Mer isch denn en Iigang zumene Wanderwäg ufgfalle. Es het ami en Rundwäg-Wägwiiser gha, also müässti irgendwänn wieder zu dere Strass cho. De Wäg isch nöd ideal mit vill Gepäck gsi. Au sind dÄscht vill eher uf Japanische Körpergrössi abegschnitte worde. Irgendwänn bini denn zunere Parkstrass cho, anschiinend vo dem Park woni mini Pause agsetzt han. Ich bin aber nächli verwundert gsi über dGrössi oder eher wie chlii de Park gsi isch. Er het anschinend au no de Zeltplatz beinhaltet, wo ich überspringe. Jedefalls hets mi grad nöd glockt det e Pause go mache und ha ghofft i de Dorfmitti öppis zfinde. Die hets aber irgendwie nöd gä. Und dPräfekturgränze isch au ganz klanglos verloffe. Bald het sich dStrass denn teilt und ich bin weg vo de Hauptstrass uf ä ruihgiri Route, wo au am Meer entlang goht. Inere chline Bucht hani denn äs Schatteplätzli gfunde. Dana ischs öppe no vier Kilometer entlang vo chline Buchte gange, bis i anere Tourischteattraktion acho bin.
Es isch dBucht vo de sechtzäh Buddhas. Anschinend het ändi 19 Jahrhundert a dere Bucht vill tödlichi Unfäll gha und so hends mit Spändene chönne id Stei go Buddhas meisle. Es isch usserdem en schöne Ussichtsort. Ich han denn no es wili miteme Herr vo Tokyo gschwätzt. Wo grad da Feriä macht. Ich han denn verzellt, dass i go zälte go öppe en Kilometer wiiters. Er het den verdutzt gfröget, öb i denn nöd wüssi, dass de Taifun chemi. Ich ha denn verzellt, dass ichs im Fernseh gseh hegi, aber dass de 16er Taifun doch erscht so am 26./27. söll cho. Er het mer denn erchlärt, dass de 15er-Taifun en grosse Schwänker gmacht heg und jetzt i de Japanische See ufwärds gechi.
Natürli hani denn in Himmel ufegluägt und tatsächlich: es isch unterdesse fasch wieder bewölkt und de Wind isch huärä starch worde. Er het mi natürli rächt verunsicheret. Das isch ja de erscht Taifun woni so konfrontiert bin. Also bini rasch is Dorf gange und bin churz zum Zeltplatz. Det isch gar niämert gsi und no so e Baustell rundum.
Also hani denkt ich frögi am Bahnhof. Dä Bahnhof isch allerdings nöd bedient gsi, also hani e Dame det gfröget. Die het mich allerdings nöd verstande. Da de Wind underdesse stärcher isch, als ich es in Hokkaido erläbt han, hani wohl oder übel müässä en Entscheidig fälle. Mini Akita-Charte goht nöd wiiters als diä nächscht Stadt Sakata. Somit hani au kei Ahnig wo dä nächscht Zeltplatz isch. Eleige imene chline Waldstück übernachte, wo chum gstützt isch vo so starchen Wind, isch mer au nächli unwohl. Vorallem wenn i nöd weiss was no chunnt. Het nöd so Fröid wenn um mich Äscht abegheiget. So hani entschide zu dem Sakata zfahre und mir det äs Hotel zsuäche. Also sBillet poschtet und am Perron gwartet. Es isch bald au e wiiteri Dame cho, woni numol gfröget han weg äm Taifun. Si het gmeint es würdi nur nächli winde. Das het mi denn no me verwirrt. Aber ich glaub, dass ihres Verständnis vo Wind und mis wohl unterschidlich sind. Det woni de Bricht gseh han, händs öppis vo 70m/s ( 252km/h) gseit. Ich nimm mal a, dass isch nur im Taifunaug. Aber isch gwaltig gfürchig. Mir het denn im Zug no nächli gschnörret. Dummerwiis hani uf ihri Frag, öb i scho zMittag gha hegi, dWahrheit gseit. Und so het si mir am Bahnhof zSakata unbedingt no en zMittag poschte. Es isch e riise Ladig Riis gsi mit es paar Bohne drin. Wahnsinnig fein, aber eidütig zriislaschtig gsi. Ich hoffe, ich gfind öppis liächters für de zNacht.
Nach dem Mahl hani dTourischtinfo belageret. Erstunlicherwiis het si kei Charte vo de ganze Präfektur gha. Aber si het mer a verschidene Hotels aglüüte, öbs no es Zimmer frei hettet für mich. Bim erschte wo si es Zimmer gha het, hani zuägstimmt. Han den nachher erfahre, dass es wohl weder dDuschi no Bad ufem Zimmer het sondern es japanischs Bad hed - also es öffentlichs. Mir isch so zimli glich gsi zu dem Ziitpunkt, da isch ja scho 25km gloffe bin und müäd gsi bin. Usserdem chan ich mich ja nöd ewig vomene japanische Hotel drucke. DDame het mer denn no gnau erchlärt, wieni det ane chum. Also es isch scho rächt ab vom Schuss. Aber e schöni Ussicht hegs. Ich han mi denn scho uf e so e chlises gmüätlichs Ryokan igstellt.
Bin den zerscht no inen Lade go es nöis Natelkabel poschte und han mi den Richtig Hotel ufgmacht. Natürli bini zfuhl gsi gnau uf dChartene zluägä und so isch das Hotel nöd det gsi, woni gstande bin. Defür isch äs französischs Restaurant namens Pinocchio i de nöchi gsi?!
Nach sehr gnauem studiere vo de Chartene hani gmerkt, dass bim Übergang vo dene zwei Plän äs Stückli fählt. Es hät also zwei Brugge und drüü Flüss. Uf das muäss mer zersch mal cho. Die zweit Brugg isch riisig gsi. Het zwei Flüss überspannt und de grösser isch sicher fascht en halbe Kilometer breit.
Nach de Brugg isch mis Hotel scho agschribe gsi und zwei eher kuriosi Dächer hani i de Färni gse. Es wird wohl nöd so es gmüätlich, chlises Ryokan wien ich mir das dänkt han.
DAkunft hets mer bestätiget. Es isch en füfstöckige Bau, wo die meischte wohl wäg dem Bad det übernachtet. Und es Gebäude näbetra isch anschinend es Fotimiseum.
Ich han es riisigs Doppelbettzimmer mit Tatami-Ruum und chline Balkon.
Am Obig han mi denn glich i das Bad gwagt. Es isch nächli kompliziert, aber han scho so vill drüber gläse, dass ichs wohl ohni Ines Fettnäpfli zträtte sött schaffe. Es isch ähnlich wie es Thermalbad, ohni Sprudel. Gschlächtertrennt. Het vier verschideni chlini Becki gha, mit Ligene. Denn no Sauna und e Kneipp-Stei-Wäg. Ja und das ganze für üs Uslander ungwohnt nackt. Da ischs mal en Vorteil, wemmer ohni Brülle nöd so gnau gseht =)
So es Bad isch denn aber glich sehr entspannend. Es isch liächt wärmer als es Thermalbad ( so 40Grad) und bevors mer denn zvill worde isch bini denn use. Bin denn glich no ines Fettnäpfli trampet. Han min Bademantel uf die falsch Site gwicklet. Isch luschtig, will im Karate chemmt ich au nie uf dIdee de Gi uf die Arts zuä tuä wien ich de Bademantel oder Yukata zuä gmacht han. Ä älteri Dame het mi denn druf ufmerksam gmacht und mir denn de ganz gnau grichtet. Bim Gurt het wohl au eifach äs Mäscheli glanget statt en Karategurt-Chnopf. Aber ja bin zmüäd gsi zum no gnau im Internet go nacheläse. Verusse hets rächt gwindet und ich bin huärä froh gsi, nöd im Zält zligge und dSiitewänd wieder im Gsicht zha.

ZFuäss: 46100, 33km, Zug: 19km