Profile
Blog
Photos
Videos
Ach es het soo vill ztuä ghä am erschte Tag. Rechnige begliche, E-Mails checke, es paar Treffe mit de Kollege, min Abstecher nach Korea ( Visa-bedigt), Klassetreffe organisiere und mini nächscht Route grob plane. Und nach es bizzeli sSkype isch scho Ziit zum Schlafe gsi.
Am Fritig han mi uf dSuächi nacheme Rucksack gmacht. Leider i dere Grössi erfolglos. Aber Ziit hani schö vill brucht für das. Im 100Yen shop hani denn no gwüätet und no es paar vo mim Reiseequipement erneueret und no e Batterie für de Schrittzähler kauft. Drufabe bini wieder es Stückli im strömende Rägä dur dStadt gloffe zum en MP3-Player poschte. Das isch ziitraubender gsi, als i denkt han. Es git wohl im normale Verchauf nur no Apple und Sony Produkt. E grossi Uswahl vo Produkt cha vill meh, als i wett und sind au entsprechend tüürer, als i grechnet han. Schlussendlich bini glich no mitemene 100.- violette Wie-mer-dem-Ding-hüt-au-immer-seit usem Lade cho. Natürli bini denn wieder zspat gsi zum uf Poscht zgo und so bini zrugg zur Unterkunft. Nacheme churze skype hani no vor gha, dLuftseilbahn uf de Stadthügel znä um eini vo de schönschte Nachtasichte vo Japan zgseh. Leider isch dSpitze mit Wulche ideckt gsi und so hets halt drus en Spaziergang dur shistorische Viertel gä. Schöne Park und englisch- russischi Herrschaftsgebäudene und Chile. Isch gmüätlich gsi so idere Nachtbelüchtig, aber han mi grad nüm so zJapan gfühlt.
Am nächschte Morge bini zur Hauptposcht gloffe. Das isch die einzig, wo am Samschtig offe het. Han no wellä äs heikels Souvenir unter anderem heischicke. Bin e Stund dra gsi uszfülle, was i alles drin han und dene denn uf japanisch erchläre. Schlussändlich hani sbsundere Souvenir nonig dörfe abschicke. Si müänds zersch mit de internationale Poscht abkläre und die isch ersch am Mäntig wieder erreichbar. So wirds halt denn in Gunma numol probiert.
Drufabe hani no guäti zwei Stund dä Ziit gha, um uf de Hakodate-Berg (Hügel) zgo. Für Laufe het mer dZiit nöd glanget und es het au kein Wanderweg gha... Jedefalls isch super Wätter gsi. DSeilbahn ufe isch no drin dekoriert gsi mit Kunschtbluämä - hani au no nie gseh. Nachem Panoramaföteli und em Souvenirshop dureluägä, isch mer det zlangwillig worde und so bini halt wieder abe. Han zwar nächli schlächts gwüsse gha, aber mer cha ja nüt mache ussert no is Restaurant go. Das het mi nöd agmacht.
Zrugg im Zimmer hani no so vill Organisatorisches müässä mache und no dHotel buächä, damit mis Gepäck au irgendwo ane chan.
Eigentlich hani ja no wellä Bewerbige uselo. Leider nüm meh dezuä cho... Denn am Obig isch no sIiweihigsfürwerch vom Hakodate Matsuri agseit gsi und das hani ja unbedingt wellä gseh. Richtig spannend gsi. Diä hend öppe zwänzg verschideni Programmpünkt gha à so circa 2 Min. Meh oder weniger passend zum Thema, Liäd und/oder e Gschicht hends Füürwerch ablo. SEinte Füürwerch isch am Samichlaus gwidmet gsi und dur dLuutssprecher is Liäd 'Santa Clause is comming to town' gloffe. Denn hends Sakura, Rose, Lilie und anderi Bluämä-Forme gha. SFüürwerch uf Japanisch heisst ja au Füürbluämä und drum hanis au nöd andersch erwartet. Natürli hend au Chätzli und Härzli nöd dörfe fähle. Aber die nur zwüschedrin. Meischtens sind eifach riisigi Fürwerch nachem andere los gange. E volli Stund hani am Hafe mit zig Japaner mis disjährige Erscht-Auguscht-Füürwerch chönne gnüsse. Het scho gäre no en Schwiizer Lampion gha=)
Dana hani no letschti Planige für mini wiiteri Reis gmacht. Luut dem wirdi über Oma, Aomori, Akita nach Gunma zreise und det Mitti September zsii, bevors mi denn us Visagründe und au chli Gwunder für e Wuche nach Korea zieht. Mal luägä, öb das so klappt.
ZFuäss: 43400, 31km ,Bus: 12km, Zug: 4km
Damit isch mis Hokkaido-Abentüür scho wieder dure. Ich bin vo Wakkanai nach Hakodate 416 Kilometer gloffe ( 547000 Schritt) und han mit Bus und Zug 1170 Kilometer hindermich glo. Usserdem hani sLand vom 45.5 bis zum 41.8 Breitegrad abgreist. Höchschte Punkt isch mit 530m über Meer nöd grad sensationell dafür hani vom nördlichscht Punkt vom Feschtland Japan bis zur südlichschte Stadt vo Hokkaido einiges erlebt. Das mit meischtens em Rucksack vo 17kg.
- comments