Profile
Blog
Photos
Videos
De Tag isch bi mir spektakulärlos dure. Ich han mer en Megastore und 100Yen Shop, 1.5h Laufziit entfernt, usegsuächt. Unterwegs bini den im Costa Rica Sakurako- Kafi glandet und nächli verwiilt. Ganz e luschtigge Eggä. Meh es Wohnzimmer als es Kafi. DBsitzeri het mega Fröid gha a mir. Bin die erscht Nöd-Japaneri wo's Kafi gfunde het, aber si het au ersch vomene Halbjahr ufgmacht. Vorher het si mit de Famili mehreri Jahr in Kanada gläbt. Drum gits i ihrem Kafi au regelmässigi Englisch-Sprech-Treffe und so e Art Volksseminar. Es het feine Kafi ghä, huusgmachte Chuäche und no es paar Chriesi us Frankrich het si mir mitghä. Si het sich entschuldiget, dass nöd so schö rund seget, aber dFranzose hegets eifach so wachse lo. Unverständlich so öppis - diä Franzose wieder, hä?! Damit isch au de Priis erchlärt vo dene meischt sündhaft tüüre Frücht.
En 100Yen Shop isch immer gföhrlich für mich. Es goht mer weniger um de eint Franke wommer für jedes Produkt zallt, sondern irgendwie schaffets die en Lade zmache mit ALLES praktische Sache. Ich han mi dasmal au müässä wiedermal zämänä und bin mit Papierbox, Kompass, Lüchtweschte, Karabiner und en Chinderveloschutzplastik als Rägäschutz für min Rucksack de Verfüährig entfloh.
(1/2)
- comments