Bevor de Zug abfahrt, hani no gnuäg Ziit gha für mini Liäblingsbeschäftigung: Züg beobachte. Tokyo Bahnhof isch en Traum. Soo vill verschiedeni Shinkansen, Interregio und Regio. Irgendwänn chauf i mir es Perron-Billet und gnüss en ganze Tag zwüschet de Züg =)

Mini erscht Fahrglägeheit isch en blaugrüänä Shinkansen mit laaaaanger Schnauze, wo mich in 200 Minute 713.7km in Norde söll bringe. Hayabusa heisst das Wunder der Technik. Fahrt füährt je wiiters nördlich, desto me dur wunderschöni, grüäni Landschafte. Bsunders de letscht Teil, dPräfektur Aomori gfallt mer. Aomori ( blaue Wald*) ischs japanische Moschtindie. Es söll die beschtä Öpfel vom Land ha.

De Schnellzug nach Hakodate het eidütig weniger Passagier gha. Er treit de Name wiise Schwan. Es isch aber 'en Schwan so grüän wie Gras'. Eidächsli oder Fröschli het besser passt, aber sie hend wohl öppis Eleganteres welä. De wiis Schwan het mi denn sicher dur de Seikantunnel (240m unter Meer) nach Hokkaido bracht. Hakodate heisst übersetzt Schachtelgebäude. Also de Hüüserstil isch da scho rächt andersch im Verglich zum Rescht vo Japan. Wohl au klimabedingt. Das Hafestädtli mit 270000 Iiwohner isch aber glich schnüsig. Bevor ich mich denn am Bahnhof no ganz vergässe, bini zu mim Bed & Breakfast gloffe. DBsitzeri het mi scho erwartet und isch uuu mega liäb. Sie het mer ja usserdem im Vorrus erlaubt, min Koffer en Monet det zlagere und au vom 1. Auguscht Füürwerk vorgschwärmt. Eventuell wird ich denn Endi Juli bis zu dem Aalass min Ufenthalt in Hakodate no verlängere. Will was i bis jetzt vo de japanische Füürwerch ghört han, sind wohl mini bisherige Füürwerch i de Schwiiz eher lächerlich - nöd quantitativ sondern qualitativ. Da ich bi min erschte Bsuäch in Hakodate no vill z'organisiere und z'erledige han, chan ich mich de touristische Highlights vo dem Städtli ersch spöter widme. Drum muässi jetzt grad no es paar Stündli schlafe bevor mich de Wecker denn vo mine Campingtröiiim userisst.

* DJapaner händ sgliche Wort für blau und grüän. Zum Bispil wechslet au dAmple vo rot uf blau. Im moderne Japan gits jetzt aber au es Wort für grüän, jedoch chammer au mit dem grüän nöd alles bezeichne wo mir als grüän gsend. Ja, es isch kompliziert...

(2/2)