Hüüt fangt mis Reiseabentüür a. Fasch än Monet dörf ich dur Hokkaido reise. Mini erscht lang Reise, wo ohni irgendwelchne zuäsätzliche Verpflichtigä wie Schaffe oder Sprach lerne ztuä het. Bsundes nervös bini vor em gplante Campe. Nebscht es paar Lager mit Schuäl und Blauring isch au das e Première. Zuädem füährts mi ja au ines Gebiet mit Bäre. Es söll an die 2000 Hokkaidobäre gä (Schwarzgrizzly). Dummerwiis isch bi de interessante Fakte au no gstande, dass es jährlich drüü Attacke git und eini devo ändet jewils tödlich für de Mensch. Ich wird mi sicher no unterwägs nächli umhöre, wie ich, bi aller Tierliäbi, am Meischter Pelz nöd begegne. Nebscht dem gfürchige Teil büütet Hokkaido än unglaubliche Naturschatz, woruf ich mich fröie. Mit em Zelte erhoff ich nebscht de koschtegünstigere Methode au dKultur vo d Japaner besser kännezlerne und natürli isch es in Hokkaido nöd so e Hitz wie in Kyoto.

Mini erscht Etappe füährt mi mit em Zug vo Tokyo nach Hakodate. E südlichi Hafestadt in Hokkaido, wo dur de Isebahn- Seikan-Tunnel mit de Hauptinsel verbunde isch. Zerscht heissts für mich mal zum Bahnhof zcho. Da ich mich für längeri Ziit in Japan igrichtet han, isch au mis Gepäck entsprechend riisig. So bini wohl die morgentlichi Attraktion gsi im Gschäftsviertel, als zweibeinige Packesel. (Wahrschinli hettets au bimen vierbeinige blöd gluägät) Zum Glück hani vorahnend es nöchs Hotel gwählt. Denn mitemene 30kg+ Koffer, en gschätzte 15kg Rucksack und no e Iichaufstäsche wär snöd agnehm gsi im morgentliche Pendlerstrom vo Tokyo zsi. Also eigentlich unmögli.

Dä erscht Zug nach Shin-Aomori isch nur mit Reservation mögli. Drum hani entgege min Plan erscht dMittagsverbinding chönne nä. Mit Blick uf mis Gepäck, het mich dä Bähnler höflich druf higwise, dass die Verbindig sehr gschäftig seg. Während minere drüüstündige Warteziit hani also de Lieferdienscht ufgsuecht. Möglichkeit A : Ich lagere de Koffer zTokyo bis Ändi Monet für 240.- oder Möglichkeit B: DLieferig Express nach Hakodate für 40.-. Da isch also dEntscheidig nöd schwär gfalle. Vor allem will ich ja mini Gepäcklagerig im B&B zHakodate scho organisiert han. Nach de Unterschrift het met dDame erchlärt, dass das Gepäck ja per Flugzüg gschickt wird und ich drum no allfälligi gföhrlichi Gegeständ us em Koffer müäss nä. Das hani i dem Moment nöd erwartet. Bin überzoge gsi, dass Gepäck geng denn mit em Zug det ufe. Hend ja über 24h de Ziit gha für dLieferig. Da bini uf eimal Stolz uf üses SBB Gepäckservice System und mini umweltschonendi Vorstellig vo Japan bröcklet wieder es bizzeli. Druf abe hani dörfe en Blick uf e Lischte mit de verbotene Gegeständ werfe. Die übliche Sache wie Waffe, Sprechstoff, Chemikalie,...,Deo-Spray. Deo?!!

Ja, anschiinend isch das im Japaner Luftruum verbote. Sparadoxe aber, dass 90% vo de Deo wommer zJapan cha poschte Sprays sind. Also Deo füresuäche und umpacke.

(1/2)