Am Morge hets no en chline Spaziergang a de Uferpromenade vo Aomori ghä. Begeischteret hani sDepot vo de Nebuta gfunde. Die hend vier riisigi Zelt ufgstellt, zum jedem einzelne e Garage zbüte. Han vo öppertem ghört, die seget so 25m gross und 11 Tonne schwär. Schwärenherzens hani näbetra zuägluägt wies die Holzgrüscht grad mit em Bagger gküderet hend. So schad. Die sind sicher au so enthusiastisch bi de Sach gsi wie dLozärner Fasnächtler und fanget no die Wuche mit em nöie a.
Rechtziitig zur Tourischtinfo-Öffnig bini det gsi. Ich ha ghofft, si chönnmer nächli meh zu Zeltplatz i de Region sägä und ebeso en Rucksacklade empfehle. Si het mer denn vom grosse Chaufhuus grad nebet em Bahnhof verzellt. Die heget es Täsche-Rayon. Da die erscht Tüüre am 10ni göffnet hend, hani no sMorgetriibe imene chline Park beobachtet. Das Rayon isch schlussendlich aber nüt gsi. Eher Tussitäschli und Rucksäckli für id Stadt. Ich ha ja scho im Vorfeld usegfunde, dass es in Aomori en Mont Bell Lade git. Ich weiss isch nöd grad Mammut, aber ich cha ja schlecht uf Tokyo go für en Rucksack=). Jedefalls hani denn no mit wiiterem recherchiere es Sportgschäft grad näbetra mit Campingusrüschtig gfunde. Perfekt. Es sind circa 5 Kilometer zum Laufe gsi. Im Mont Bell acho, hetti es paar praktischi Sache entdeckt. Aber vill au nice-to-have. Es het au schöni Rucksäck gha, aber i ha no de Verglich mit andere Marke und Modell welä. Also bini zum Center näbetra. Da gseht mer wieder wieso dJapaner bi jedere Glägeheit perfekt usgrüschtet sind. Hammer Sache hets gha. Bin zersch zu de Rucksäck und bi überraschenderwiis vormene riise Gstell gstande voll vo Trekking-Rucksäck. Öppe siebe Modell hend min Aspruch betreffend Volume entsproche. Ha mi schlussändlich für äs ähnlichs Modell wie min jetztige entschide. So bini sicher gsi, ihn au zdörfe als Handgepäck heinä. Ich ha denn no bi es paarne Sache nöd chönne verbii laufe und mi im Mont Bell au no mit Luftmatratze-Flick und emene Solar-Handy-Uflader usgrüschtet. Da ich ja immernonig min bstelltä Solar-Uflader gschickt becho han. Jetzt bini hoffentlich nächli flexibler.
Retour id Stadt hanis sZügli gno. Min chline Zeihä hät afange weh tuä. Aber bin glich no churz zum Schrein gange. De isch zu mim Erstune nöd nur bedient gsi sondern au wunderschön mit Brüggli und zig Kois. Han denn entli min Reise-Glückbringer chönne poschte. Dä het jetzt no es wiili ztuä.
Im Hotel hani den de Blog updatet und süscht no mis wiitere Reisli vorplant. Mal luägä, was devo klappt.

ZFuäss: 18200, 14.5km, Zug 4km