Am eis bini vom Rägä verwachet. Dasmal hani dWösch no rächtziitig chönne inenä. Am 6i hets langsam ufghellt, aber sZält isch natürli pfluschnass gsi. Da ich die Nacht nöd zälte, chas den nöd tröchne, drum hani halt müässä warte. Am 9i isch denn alles troche und parat gsi. Ich ha mi scho gfreut, wiedermal am Strand na zlaufe. Die Fröid isch mer relativ rasch vergange. De Strand het nämlu nöd nur huufe agschwämmti Sache sondern au det abgleite Müll. Ich chas sowiit verstoh, dass dJapaner sMeer nöd glich gsend wie mir. Für üs isches ja eher ä romantisch, natürliche Ort, wommer vill dSunne und sBade chan gnüssee. Sie gsend natürli die zerstörerischi Kraft dehinder. Dennoch sind dJapaner so es subers Volk und so han mi nonig a so Stränd gwöhnt. Dasmal hani au no äs Hundeskelett und en zwei Meter Thunfisch-Kadaver gseh. Letscheres het au vier Meter entfernt gstunke wie nüt. Guät hani no kei Zmorge gha. Erstunlicherwiis hend sich a dem Strand kei lebendigi Tier tummlet. Sogar de Chäie und Möve isches da verleidet. Die ganze 6 Kilometer zum nächschte Hafe, hani nüt gseh. Denn isch numol en Kilometer zum Bahnhof gange. Det hani wellä de 12.20-Zug nach Aomori nä. Nur leider hani mit Blick uf de Fahrplan feschtstelle, dass das wohl en interregio gsi wär, wo am Bahnhof vo Fukkoshi nöd ahaltet. De nächscht wär erscht am halbi drüü gfahre. Unter andere Umstände wohl ä guäti Glägeheit zum 10Kilometer wiite nächschte Bahnhof zlaufe. Au sWätter wär super agnähm chüäl. Allerdings hani no
Nachem Blick uf de Busfahrplan isch klar gsi, dass i de 13h-Bus nach Noheji nimm. Bin denn no go Brunch poschte und ha müässä feschtstelle, dass min Appetit nonig da isch.
A de Haltestell hani no es Schwätzli gha mit enere Dame wo uf Yokohama in Onsen isch. DFahrt nach Noheji isch aber eher unspektakulär gsi. Am Bahnhof hani wieder fasch es Stündli uf de Aschluss gwartet. Allerdings het i de verpasst wenni de Zug vo Fukkoshi nach Nohejo gno het. So sötti zu perfekte Check-in Ziit in Aomori acho.
Han den drüü Stund sInternet und dWöschmaschine usgnutzt. Im Fernseh hani no gseh, dass die Arme Lüüt in Tokyo 37.7Grad müänd erträge und südlicher rast grad de Taifun Nummer 13 dure. Und alli lebet im gliche Land.
Am halbi sibni Richtig Hafe bini gloffe, de Menschemängi na. Het aber liäber numol gnäuer im Internet sProgramm nachegluägt. Uf de offizielle Site stoht überall, dass ebe am leschte Tag die Nebuta-Parade am Obig seg. Ebefalls am Obig isch sFüürwerch. Das die Parade aber denn nur uf drüü Gruppene begrenzt isch und die ihres Nebuta-Kunschtwerch uf Boot verfrachtet hend, hani ersch bi de Hotelrückchehr erfahre. Ich bi nämli über e Stund am Füürwerch luägä gsi ( sisch nachher numol e Stund gange, aber dasmal mit längere Unterbrüch als in Hakodate), bis i denn öppert gfröget han, wenn denn die Nebuta id Stadt chömmet. Leider zspaat. DStadtparadene sind die letschte sechs Täg gsi und am 7. Tag isch ebe die Boot-Nebuta-Parade, wo natürli scho verbii gsi isch zu dem Ziitpunkt. Het mi riisig agsch***. Het mer doch i de letschte zwei Wuche jede gseit, de 7. Augschte seg de bescht Tag fürs Nebuta. Und alli andere Nebuta sind natürli jetzt au verbii. Enttosche und müäd bini zrugg is Hotel und han bald pfuuuset. A sFüürwerch isch schön gsi. Han nur nöd so en perfekte Platz gha.

ZFuäss: 24700, Bus: 23km, Zug: 45km