Profile
Blog
Photos
Videos
hola! i bi scho sit am 6h am morge wach wüui nüm ha chönne schlafe... u ds zmorge hets ersch am 8h gäh... ha immerhin gnue zyt gha zum dusche, mi alege u läsä... läsä wird ir nächschte zyt äuä zu mim nöie hobby... am 8ti bini de id chuchi u mi gaschtvater dr jesus het scho gwartet u d zytig gläse... är het mir es kafi gmacht u früschi ananas serviert u när no toastets baguette mit chäsufstrich... är het gseit dass d maria am sunnti aube lenger schlaft u de öpe uf die 9h da isch. u so het haut är müesse ds zmorge mache :-) u är müessi de no zur einte tochter öpis ga häufä bi aber nid so drus cho was genau... mir si de no chli ir chuchi gsi u hei plöiderlet, das heisst i ha versuecht sätzli zämezbrösmele, aber dr jesus het gmeint i chönn scho rächt guet spanisch redä.. wo de d cecilia isch cho hani ihre o no gseuschaft gleischtet bim zmorge u d carolina isch o no cho u de hei mir no lang gredt ir chuchi... da ig sit am samschti am abe ke sms ha chönne schribe u o ke internet ha gha hei si mir de dr code gä dassi wenigstens internet ha u scho het dwäut wider besser usgseh... am 11h bini de ufe i mis zimmer... si hei dr ober stock nume mit gäschtezimmer igrichtet... u am 12h30 isch mi d carolina cho hole zum zmittag ässe... es het fisch u ris gä u derzue avocado mit tomate... am haubi 2 isch de dr jesus mir cho d schueu zeige... u d husschlüssle hani o no grad übercho u itz weissi o wie aues uf u zue geit im huus... übrigens i das quartier chunnt nid jede, es het es igangstor wo ä securitas im hüsli hocket u luegt dass nume d awohner vom quartier ine gö... es isch auso rächt sicher u die ganzi nacht isch o ä securitas da... de hani nume ds stützli müesse ufeloufe u d böshautesteu isch grad vorem igangstor... dr securitas het aube fröid weme chli mit ihm redt, aber isch ja o längwilig so dr ganz tag allei im hüsli hocke... dr jesus het no gseit i söu aube ds gäud immer scho parat ha füre bös u das hani de o gmacht... när simer gmüetlech zur schueu gfahre u wider zrügg... es isch nid so schwirig obwou dass d strasse ke näme hei abgseh vo dä wichtigste strasse u i weiss bis itz no nid wieme sech hie orientiert, entweder chame sech schnäu dr wäg merke oder de isch me verlore mire meinig na... am nami simer de aui no ir stube ghocket u hei chli diskutiert u speter isch de no ä amerikanische studänt acho, dr nick u es isch de no rächt luschtig worde mit üsere ungerhautig u i bi widermau zur übersetzerin ernennt worde wüu dr nick wo sit 2jahr spanisch lehrt cha nid meh aus ig u d familie cha ke änglisch oder nid guet u i ha de ihne müesse erkläre was dr nick wott säge... am abe hani mitem jesus ir chuchi corrida de torre gluegt, ä komische sport oder bruch oder was o immer... es isch ä mönschemängi ir arena u dr stier geit de uf d lüt los u die wo dert mitmache si no stouz druf we dr stier sä umgrennt het u dr bescht wo am stier cha standha gwinnt de no gäud u si finge das aui so extrem luschtig, naja angers land angeri kultur... zum znacht hets fleisch gä mit zibele, ris u sones bohnemues u es git immer früschpresste fruchsaft... am 19h hei si de gseit si gönge ga schlafe wüu si immer am 21h scho im bett si... naja drum wirdi haut viu müesse läse u drum hani o schön zyt zum schribe... morn gits am 7h zmorge, kafi u früschi frücht u d cecilia bringt de dr nick u mi id schueu, auso si begleitet üs mitem bös u chunnt üs am abe o wider cho abhole.. si het scho gseit am zischti müesse mir de dr wäg kenne... mini gaschtfamilie isch doch so härzig u mega lieb... immerhin chani de während 2 wuche mitem nick id schueu ga, är blibt itz solang hie... u isch mit sire schueu vo amerika hie für sone art praktikum zmache für sis studium u vorhär si si z tortuguero gsi o z costa rica... u morn ir schueu gsehni de mini zwöi kolleginne wider woni am flughafe kenneglehrt ha... no öpis zum wätter, es isch hüt mega schön gsi, eifach chli windig u mä cha sehr guet im tshirt umeloufe :-) so, i mache itz nüme viu, no chli läse.. bis morn amigos
- comments
Lexä Das tönt ämu aus super;) bi froh geits dir guät u luägä si so zu dir u isch o gäbig das 2 Wuchä nid alleini id Schu muäsch.
Würmu Hoi Corinne! Du schriebsch interessant. Aes chunnt mir grad vor aus hätti äs déjà-gläse!!! Häbs wyterhin guet u mach vieli Entdeckige, bis aber vorsichtig derby. Liebi Grüess Würmu
antonia Hola corä das tönt spannend. Bi froh isch dini famile nett und dass d s guet hesch. Aso dis spannisch schient würk guet z si. I hät das alls gloub nid am erste tag scho uf spannisch verstande. Besos
Lexä
Lexä Du hesch ja o flissig di Kurs bsuächt gha. Kes Wunder chasch scho spanisch. Bisch äs Naturtalent.❤