Profile
Blog
Photos
Videos
Kunchi ischs berüähmtischst Festival vo Nagasaki. Es Erntedankfescht, wo au Kulturteil vo China und Holland integriert het. Ursprünglich aber au es Anti-Christianisierigsevent gsi. DHauptshow findet in es paar Arene statt, aber me sött au öppis i de Strass gseh. Ich bin zersch es Kafi go näh und han mer denn usegsuecht, wo die Paradene chönntet si. E Dame het sich überschwänglich defür bedankt, dass ich ihri han welle sTablett an Platz trägä, dass si mir Guätsli poschtet het.
Ich wär wohl an falsche Ort anegloffe, wänn i nöd Polizischte gseh hetti, wo sich für dAbsperrige parat gmacht hettet. Uf mim Plan stoht nämli nur de Stadtteil. Ich bin denn no es Viertelstünli in en Park ghöcklet, bis ich mich wieder ad Strass gstellt han. Es paar Meter näbeme Fotograf zstoj isch immer guet und so hani abgwartet. Inzwüsche hend sich no anderi Schauluschtigi nebet öis gstellt. Au es älters Päärli vo Kyoto. Lang ischs nöd gange und e chlini Gruppe hets sich langsam uf de Strass ufgstellt. Ich hans anschinend grad breicht, de Startpunkt zfinde.
Es het verschidenschti Gruppe gha. Agfange hets mit zwei Jungs, wo 20Kilo-Bambusrohr nachegschleipft hend. Es tuet liecht schäddere, da es une es bizzeli igritzt worde isch. Dana isch de Tengu - äs japanischs Fabelwese, cho mit sine Begleitschaft. Er isch die wichtigscht Person vom Festival und treit als einzige e Larve. Grundsätzlich isch es i die drü Schrein uftreilt. Rund 16 Manne hend de Hauptschreinstück, das wommer susch nur vo witem gseht, wemmer nöd grad hüratet oder dSchreinverwalteri kennt. Zu allem übel sind dManne während ihrem Chraftakt no vo Münz beworfe worde. Hend halt nöd alli eso guet troffe mit ihre Spend. Dana isch jewils e grossi Gruppe a ältere Herre in traditionelle Kimono-Hakamachleidig cho. Entweder sind das die ehemalige Schreinträger oder süsch ehrenswerti Mitglieder. Es paar hend sich miteme chline Holzchischtli um dSpende kümmeret. Vereinzelt hets Fähnrich, Hauptma hoch zu Ross, Herre und Frauegruppe in spezieller Tracht gha. Die gröscht Gruppe het jedoch us Vorschuälchind und ihrne Väter respektiv Müäter bestande. DMeitli in Wiis-rote-Schreinchleidig und dJungs in türkis-violett. DEltere sind in traditionelle Kimonos oder im Azug.
Nachdem die Truppe dure isch, hend sich witer vorne e typischi Attraktion vom Nagasakikunchi parat gmacht. Es isch es Kegelförmigs Teil, überdeckt mitere kunschtvoll kreierte und gschticktes Tuech. Underem Tuech versteckt isch de Träger wo das ganze per Bambusstamm vorwärts bewegt het. ZOberscht isch au mit Figure verziert gsi. SMeischte im Erntedanksujets und e Schelle schint no drin versteckt zsi. Will die het tönt, wenn de Träger schön gloffe isch. Mer het druf gwartet, dass die jewills churz ahaltet und sKunschtwerk mit Drähige bsunders zur Gältig bringet. Jedes Werk het drüü Wechselträger und no eine wo de Träger, wo ja nüt gseht, i die richtig Richtig füährt. Denn isch die Parade vo de Mondgruppe fertig gsi.
Kunchi wird vom Wort für 'neunter Tag' hergeleitet. Es wird am 9. Tag vom 9. Lunarmonet gfäschtet. Nebscht de Mondgruppe isch no dBluämägruppe underwägs luut mim Plan. Also bini es paar Quartier wiiters.
De Bluämägruppe ihri Tradition het mi überrascht. Dass mer so öppis herzlichs inere Milionestadt het chönne biibhalte isch göttlich. Die machet nämli kei Parade, sondern hend sich i füf Teilgruppe unterteilt. Ei Teilgruppe bestoht us zwei Manne, wo das ganze Tätschmeischteret. Die hend e riisigi Adresslischte zum abhöggle. Vor de entsprechende Hushält und Betrieb markierets mit Chride. Denn folget öppe sibe Helferinne mit Nummerelanze, wo vorzuä bi dene Markierige wartet. Die erschte dönd amigs no luägä, dass öpert ume isch. Danach wartets bis si vo de nidrigere Nummere abglöst werdet. Bi de nächschte Markierig stellt es sich bim Husbsitzer vor: Hallo, ich bin sNummer Füfi. Es isch bald sowiit, viele Dank fürs Warte. Nachem 4, 3, 2, 1 chömmet no zwei männlichi Vorbote bevor denn dKerngruppe chunnt. DAttraktion vo dem Chern sind drü Tänzerinne. DUfmachig isch entweder als Maiko ( Geisha-Lehrling) oder als Holländische Clown/ Pantomim. Es git den vor jedere Hustüür es eiminütigs Tänzli begleitet vo Gsang, chline Gong, Flöte und chlini Trummle. Umgä sind die drü vo mindeschtens sechs Damene im schlichtem Kimono und mit allem usgrüschtet - vo Papiersunneschirmli bis zu Nachschminki für dTänzer. Denn hets natürli no dMusiker. Die traditionell Flöte het mir natürli bsunders imponiert.
Nacheme grosse Dankeschön und e tüüfe Verbügig isch zur nächte Türe gange. Die Husierete machet drüü Täg, vom 10ni bis 8i am Obig mitere zweistündige Pause. Das i dene Holzschuäh und i dere Hitz. Aber so herzig, wies vor Gschäfter, Klinike oder au für einzelni Persone a de Huustür dtanzet und sich bedankt hend.
Ich bin churz no abglänkt gsi, ab e wiitere Zueschaueri. Die het e Stofftäsche gha mit de Ufschrift: Drug store's - It's a name for girls loved by all (Drogerie, das isch en Name für Meitli wo vo allne gliebt werdet). Ich nime fescht a, dass die Dame kei Änglisch cha. Aber wer chunnt au scho uf e so absurdi Idee, sowas zproduziere.
Ich bin jedefalls no dur es paar Gasse gloffe, um no die andere Gruppene ugseh. Am Vieri bini Richtig Hafe. Det wär am Morge i de Arena öppis gloffe. So wini vom Schuälkolleg ghört het muess er au die Idrückliche Schiff gseh ha. Aber als 1.90m-Ma gseht mer natürli au perfekt über die japanische Schauluschtige.
Die Schiff werdet au vo e Horde Manne treit. Sind 20 Tonne mit öppe vier Lüt druf wo entweder tanzet oder ufs Taiko schlönd. SSchiff wird fürschi, hinderschi und um die eiget Achse drähit. Und uf drü wird das ganze Gstell en guätä Halbe Meter id Luft grüährt (samt Lüt an Bord) und wieder ufgfange. Das hetti gärn gseh. E chlinere Version hani gseh zur Arena schiebe, aber das wars dann auch. Bide Arena sind unterdesse die drü Schreinhüüsli vo de Mondparade und werdet in Masse abätet. Ich hammer det no es bsunders Goshuin gholt und mich denn dur Marktschtändgetümmel zum Hostel durekämpft. Uf die sechsi bini wieder los, um no sKunchi bi Abig zgseh. Es sind jedoch dBluämägruppene gsi, woni scho gseh han. Underdesse sinds mit Lampione statt Sunneschirm usgrüschtet gsi. Ich han glich no churz zuegluegt und bin nachem Curryässe zrugg is Hostel go pfuse. Unterdesse sind dJungs wiiters und es korsisches Päärli het sich igrichtet. Natürli hemmer französisch gredt. Zuminderscht mit dem wo mir no übrig blibe isch. Ich weiss nöd, öb i Japanisch afange lerne het, wänni gwüsst het, wie sehr mis Franz drundert leidet. Steckt mer dHälfti vo sim Lebe is Lerne vonere Sprach und verlüürts innert so churze Ziit. Sogar sWort 'aber' isch met nöd in Sinn cho. Deprimierend so was. Muess wohl mis Level im Lebenslauf wieder uf Beginner setzte. Richtig truurig.
ZFuäss: 14700, 10km
- comments