En richtig schöne Tag isch. Scho am Morge am halbi Sibni woni wieder id Stadtmitti gloffe bin, isch keis Wölkli wiit und breit zgseh. Ich hoffe, da ich ja zuziit am Meer bin no nächli e Wind zieht, damit es au für mich erträglich isch. Am halbi Achti bini denn usgrüschtet mit Lachs-Onigiri (die absolut beschtä) und en Iiskafi im Bus gsässe. Dä bringt mich hüt uf Shiriya. Ä öschtlichi Halbinsel vom öschtliche Aomori-Zipfel. Distanzmässig isch es zwiit zum laufe, aber es söll dettä wildi Ross ghä. Das schinds doch wärt zsi, en Tagesusflug zmache. Au ohni Mehrtagescharte. Ich hoffe eifach, dass es nöd eso än Riifall isch wie am Vortag mit äm Äfflipark. Mär nännt die Ross Kandachime, was so was bedütet wies Ross, wo im Chalte stoht. Die Ross läbet det halt bi Wind, Taifun, Schnee, Räge und händ deshalb de Name.
DStrecki bestoht zwei Drittel us Waldtunnel und bim Reschte hends au nöd an Fuässgänger dänkt. De Bus hani bis zum Torigang vo dem Park gno. Vo da us gohts kei 5 Kilometer, so wien ich das uf de Charte anschätze. De Busfahrer het mi zersch nöd wellä useloh. Öb i sicher seg, da wellä usstiege. Er fahri no bis ufe. Het mi churz no verunsicheret, öb i ächt dDistanz underschätzt han? Nach em erschte halb Kilometer bini scho vorem Meer gstande und han de Lüüchtturm vo witem gseh. En Abstecher hani no ines chlines Graswägli gmacht woni no guäti Sicht zum Vulkan nebet de Stadt Mutsu vo hine gha han. De Vulkan (Ozorezan) isch en typische Tourischteort mit fascht emene Resort dettä. Da ich nächli usserhalb bin, hani ghofft, dRoss nächli versteckter aztreffe. Det hani zwar kein Vierbeiner gseh, aber defür bini fasch vo so vill Schmätterling umrundet gsi wie im Papillorama. Nach guät emene Kilometer bini vorem Lüchtturm gstande und näbettra graset e Herde voll wilde Ross. Ha es zersch chum chönne glaube. Die graset da, meh oder weniger, gmütlich am wohl gschäftigschte Punkt uf ihrem Revier. Bin den fasch zwei Stund im nöd störende Bereich gsässe und han si beobachtet. Ä so härzig sinds.
Es het au no vier Fülli gha. Leider sind immer wieder Tourischte nöch ane go streichle. Bsunders die chline. Die grosse hend sich den schützend dezwüschet gstellt und teilwiis au gstampfet. Nöd alli het das igschüchtetet. Wär bim einte oder ander nöd schlächt gsi, wenns sRoss es mal aknabberet het. Zum klar mache, dass es nöd sis Huustierli isch sondern immerno wild. Aber wahrschinli hets scho einiges erläbt und sich langsam dra gwöhnt.
Es Ziitli lang hani no mitemene Herr gschwätzt wo jetzt eifach nächli umereist ohni Plan. Isch pensioniert. Er het mer denn no unbedingt e SD-Speichercharte welle üüschänke. Er hegi ganz vill. Wieso hend die Lüüt non-stop zBedürfnis Sache zverschänke?
Nachem Bsuäch im Souvenirlade hanmi denn uf am Pazifik entlang zur Bushaltestell zrugg gmacht. Han no seint oder ander Umwägli gmacht, wills ja grad so schön gsi isch. Nachere Stund schländere, han mer langsam Sorge gmacht, öb i denn no rächtziitig zum Bus chen. Die Stecki isch anschiinend, rächt länger als die ander. Han denn de Verzwiiger glich no gfunde und bin pünktlich a de Station gsi. Also Schwiizergmäss e Stund früehner=) Mär macht sich mängisch eifach zvill Sorge...
Zrugg i de Stadt hani dHoffnig gha, dSchrein seget da ghöffnet. Im erschte hani Päch gha, de zweit schiinends zrenoviere und so bini wiiters zum dritte uf minere Lischte gange. Mit de Frau, wo de Schrein unterhaltet, hani denn no es Gspröch agfange. Si het mich denn no ines traditionells Zimmer zum Tee iglade. Mer hend über e Stund gschwätzt über Japan, Schwiiz, Chrischtetum, Buddhismus und Shinto. Wahnsinnig interessant gsi und da si au Zugfahre liäbt, hani grossartig vo Luzern chönne schwärme und hani au versuächt, zerchläre, was für schöni Dampfschiff es het. Dampf hani no chönne erchläre, aber bim Schufelrad bini nüm witers cho.
Han mi den irgendwänn glich no chönne losrisse und no min erschtä Goshuin vo Aomori becho. Natürli het si mir denn no es Chüächli als Gschänk mitgä.
Nach dem tolle Erläbnis bini völlig motiviert id Poscht und han wellä mini kaufte Souvenir heischicke. Ich chas ja schlächt amigs immer mit em Rucksack schleppe. Jedefalls bini wieder e ganzi Stund i dere Bude gsi. Zersch het si gmeint ich dörfi en Schlüsselahänger nöd verschicke und denn het si mir nöd wellä glaube, dass ich ohni japanische Adresse es Päckli dörf verschicke. Ich het ja immerno notfalls dAdresse vo Kyoto chönne inetuä, aber das het wohl numol e Diskussion ghä, da ich ja vorher erchlärt han, dass ich nüm det wohne. DDame het den halt no es längers Telefon müässä mache, bis si sicher gsi isch, dass ich als Usländer au dörf es Päckli verschicke. Das wär au no...komischerwiis isch das bi de vorherige Poschstellene niä zur Sprach cho.
Dana bini churz a Wifi cho und han chönne sHotel in Aomori buäche. Huärä Schwein hani gha. DStadt isch wegen Festival usbuächet und han aber no es Zimmer grad am Bahnhof gfunde. Das het dPoscht-Drama scho fasch wieder guät gmacht.
ZNacht am Camping hani den no unterhaltig gha vonere Famili vo no chliis Füürwerch ablo hend. Also hani no nächli de spärlich Sternehimmel gnosse und mis Erlebte gschribbe. Denn isch plötzli bim Sternbeobachte en 5cm-Heuschrecke i mis Sichtfeld gumpet. Guät hani sNetz dezwüschet. Bin aber huärä verschrockä. Dana hanis no ghört nebem Zält gnüsslich Gras zfrässe. Het mi scho nächli tschudderet das.

ZFuäss: 27300, 22km; dBus 56km