Nach füf Stund Schlaf het sich min Natelwecker wieder gmeldet. Ich ha dörfe mit de erschte Zugverbindig mal quer durchs Land in Weschte. Mis Ziel isch de Shikotsu See. Das isch eine vo füf Ort wo ich no in Hokkaido bsuäche. Am Bahnhof bim Billet poschte, hani no de letscht reservierti Platz becho. Ich dörf 3.5 Stunde im SuperOzora durchs Land flitze. Zersch aber no äs Stündli abwarte. Kushiro isch e Stadt woni nöd würkli cha iordne. Sie isch nöd schön, aber es het es paar pflegti Eggä. Irgendwie hani i dere Stadt zwei rächti katholischi Chile gseh, aber kei einzige Schrein oder Tempel. Nöd mal so en chline Wägschrein. Touristisch hends än Hafe und es Kunschtmuseum, beides woni jetzt nöd unbedingt apeile. Drum ziehts mich ja au wiiters.

DUssicht vom Zug isch naja relativ eisitig gsi. Schnell bini halt idööst und han no Sudoku gmacht. Schliesslich hani ja äxtra Sudokubuächli mit uf Hokkaido gno. Am Zwölfi bini in Süd-Chitose acho. Bim Rucksack abenä, ischmer än grad numol amene Ort grisse. Vo da us söll 2.5 Stund spöter Bus zum See fahre. Ich bi jetzt gand i de nöchi vo Sapporo und grad nebet emene nöie Flughafe. 200m wiiters isch no es riise Markeoutlet. Da det ja sicher en Bankautomat und es Kafi het hani mi halt det ane gwagt. Süsch hets nämli nüt gha a den Bahnhof. Alle seich hets gha vo Gucci zügs und so. Allerdings au en outdoor lade mit MAMMUT-Sache. Bi denn nöd det ine - süsch hetti ja no öppis poschtet. So wiit i gseh han, hends nur chlineri Rucksäck gha und wäge Chleider muäss i gar nöd luägä - sie höret bi S uf. Also zum Bankautomat. Us irgendwelche Gründ het de mir aber kei Geld wellä gä. Ich hoffe, dBank in Kyoto het nöd gmerkt, dass i nüm in Kyoto wohne und mers Konto gsperrt oder so. Sött allerdings nöd si. Schliesslich hani no dAdresse vo Mukomachi drin und det chennt mer ja mini Gaschtmuätter erreiche. Aber nöd so schlimm, ha mer nur vorrätig welle Gäld useloo...falls ich wieder länger im Nirgendwo lande. Also denn hets no äs laaaaangs Kafi gä. Churz hani no chönne sWifi da nutze, aber nur ziitwiis Empfang gha. Defür sind Flüger prächtig über die Shoppingmall gfloge und sogar au en Militärdüsejet.

Also irgendwänn hani mi wieder zur Bushaltestell gmacht. Es het mi nächli verunsicheret, dass nüt vo dem See stoht, aber es isch diä einzig Haltestell woni gse... also warti und warti. Denn isch no e chinesischi Famili mit Koffer cho. Ha denkt die gönd sicher au det ufe - richtig tippet. Nur hend die en Privat-Shuttle-Car gha vo ihrem Hotel am Shikotsu-See us. Ich ha druf abe de Carfahrer gfröget, öb de ander Bus au grad chem. Er het denn gmeint ich müässi zum Flughafe. Han no zwänzg Minute gwartet, will de Fahrer nöd grad en allwissende Iidruckt gmacht het. Aber de Bus isch nöd cho. Also mit em Zug zum Flughafe. Vo dett hani au dBushaltenummere im Internet. Alles gseht perfekt us - sogar de See stoht uf de Haltestell. No zur Sicherheit a de Info fröge. Alles perfekt. Nach numol e guäti Stund warte, bini äntli im Bus gsäase - nächli gnervt über mini verlorni Ziit. Vorallem hani vill zwenig Infos vo dem See, da ich ja vorher zfescht im Oschte gsi bin. Ich weiss es het drüü Zeltplätz - de eint isch allerdings am andere Seeendi. Nöd ganz in Laufdischtanz. Ich cha nur hoffe, die andere zwei sind nöcher. De Bus fahrt denn no schön an Süd-Chitose Bahnhof ane - aber am Südusgang. Also diä ganz Warterei umsuscht. DStrecki isch übere Halbstund Fahrt im tüüfschte Wald drin. Was mi überrascht, es het e chlini Strass wo meh oder weniger parallel isch für dFuässgänger und Velofahrer. Leider teert und es het immerwieder Bär-Warnigstafle. Und zwar nöd so härzige Schnüggel wie susch amigs - sondern en gfürchige. Denn hani gad min Plan begrabe, da denn retour zlaufe. Will hüüfig driftet de Wäg no meh ab in Wald und denn gsehsch dHauptstrass für es paar Kilometer nüm.

Churz nach de halbi Sächsi bini am See acho. Alli Läde sind gschlosse und au Tourischtinfo het churz vor de Busakunft zuägmacht. Richtig toll. Also han mi halt uf em grosse Ortsplan orientiert. Zwei Campingplätz sind am andere Ändi und eine zum Glück nöcher. Er isch sogar mit emene Wanderwäg erreichbar. Dä wo i vorher scho im Internet gseh han und unter anderem drum, mich für dä See entschide han. Öppe 1.5 Stund Laufziit zum Zeltplatz - das isch machbar. Also bini rassig los, um no vor em Iidunkle dettä zsi. Es isch zuäsätzlich no so dunschtigs Wätter, das machts au nöd grad heller. DPromenade gseht sehr schön us. Es het au no e alti Iisebahnbrugg wos ganz schön zunere Fuässgängerbrugg gmacht hend. Nacheme halb Stund Lauf, bini wieder vomene Waldplan gstande. Zuäfälligerwiis hani druf gluägt bim verbiihusche. Wunderbari roti Chrüzli hends uf dä Wanderweg kläbet. Dä Wanderwäg woni han wellä go. Gschlosse wäge Steibruch. TOLL. Mann, han ich hüt es Glück. Also bini halt grad richtig Hauptstrass abboge, wo aber rächt en Boge macht und ich wohl dörf im Dunkle dur de Wald laufe. Eigentlich keis Problem - bin ja grundsätzlich kein Schisshaas. Nur isch mer denn grad wieder die Vorsicht-Bär-Tafle in Sinn cho. Mmm. Grad nämetra hets so es hotelartiges Gebäude gha. Also bini churz go fröge, öb de Wanderwäg würkli gsperrt seg und wie lang dHauptstrass rundume wär. Tja, 10km het er gseit. Also 10 Strassekilomenter im Dunscht und Dämmerig dur en rächt dichte Wald. Jetzt isch mers scho nächli unwohl worde. Aber gross e anderi Wahl hani nöd gha. Da het mer de Receptionischt gseit, ich sell dusse warte, er deg mich churz zum Campingplatz. (Natürli uf Japanisch=) ) Voll coool. Hani nöd erwartet. De het mich den würkli mit em Hotelbus det ane gfahre. Voll liäb. Und das obwohl ich kein Hotelgascht bin.

Am Zeltplatz acho...isch nüm vill los gsi. Also en Asiat isch grad no am Film luägä gsi. Ich han en grüässt und uf Japanisch afange schnörre. So wie ich es mir halt vorgno han... und denn wieder voll denäbe griffe. Es Chinesli isch es gsi. Tja. S'Erscht mal, dass ich anem Zeltplatz anderi Natione triffe. Da chammers fasch no verzeihe, oder?

Zält hani schnäll ufgstellt. SErschtmal uf Sand isch nächli gspässig. Öb die Hering hebet?Und denn hani für dä Tag gnuäg Päch kha und han sVernäihe vo Hose und Rucksack uf de nächscht Tag verschobe und no nächli Sudoku glöst. Guät Nacht am 9ni=)

ZFuäss 12300, 10.8km, Zug 243km, Bus 35km