Eigentlich hani ziitig wellä in Tokyo si. Aber es het sich verschidenschtes verzögeret. Zersch hani en früenere Aschluss gno, wo denn aber nur bis id Hälfti vo de Strecki gfahre isch und ich denn numol zwänzg Minute han müesse warte. Defür hani no dMarathonler gseh. Ich bin am halbi elfi glich in Shin-Kobe acho und ha mi gfreut en Stund frünere Shinkansen zverwütsche, als usegschribe. Voller Stolz bini an Schalter und han min 600 Fränkige Guetschi, woni in Korea kauft han, für es Zug GA in ganz Japan welle ilöse. De Japan Rail Pass berechtigt mi zu drüü Wuche freii Zugfahrt uf fasch allne Züg. De Herr am Schalter het mi denn aber druf higwise, dass ich dazue muess anen andere Bahnhof in Kobe. Klar de Bahnhof Sannomiya isch de wichtigscht Knotepunkt in Kobe. Er het allerdings nur e U-Bahn Verbindig zu Shin-Kobe, was ja nöd vo dem Billet deckt isch. Allerdings nämmet ja die meischte Tourischte, also die wo für sones Billet berechtigt sind, de Shinkansen. Ich finds nächli unlogisch. Naja isch mer ja nüt anders übrig blibe. E Stund spöter bini wieder am gliche Ort gstande mit em Rail Pass. Ich bin denn in nächschte Hikari-Shinkansen igstige und verbii a Shin-Osaka, Kyoto und Nagoya nach Tokyo. Zwüschet de letschere Statione hani gspannt usem Fenschter gluegt. Bis jetzt hani nämli dä heilig Berg vo Japan - de Fuji - nonig live gse. Vor und dana isch prächtigs Wätter gsi. Nur zwüschet Fuji und Shinkansen isch e dicki Wulchedecki gsi. Ganz enttosche hani denn glich no es bizzeli spöter hindere gluegt. In de Ferni hani doch tatsächli de schö Vulkan chönne usmache.
Vo Tokyo bini miteme andere Zug zu mim Hotel in Akabane im nördliche Stadtteil vo Tokyo.
Tja denn wär de Tag eigentlich scho wieder ume. Im Hotel hani denn sofort min Laptop zHand gno und no eini vo de usstehende Bewerbige abgschickt.

ZFuess: 4km, 6000, Zug: 644km