Gschluchet vom wenige Schlaf hani am Morge min ambitionierte Plan für hüt gchürzt. Ich bi zersch wieder id Stadtmitti und han mich bime Kafi entschide, was ich hüt nöd mache. Es het en schöne Wasserfall, aber das in Kombination mit Rege het mer bis jetzt nöd vill Glück bracht. Also wird de Kafi so richtig gnosse und im Sessel fasch idöset. Ich bin denn mal bald zum einte Schrein gloffe. Det isch nächli für Schrein ungwöhnlichi Musig gloffe und no zwei Mänsche i Disneyartige Vollkoschtümierig. Danach bini zumene andere Schrein gloffe. De het zu minere Überraschig inere Vitrine es paar käuflichi Figure usgstellt. SEinte isch 800 Stutz und da die Vitrine kei Räder het, nimmi a die lönds eifach so verusse stoh. Das Schreinareal loot sich zwar usnahmswiis abschlüsse, aber öbs die alte Holztoor allabig zue machet?
Ich bin zum Bahnhof und inen Vorort gfahre. Dett hets numol zwei Schrein. Im erschte hani aber zwersch uf e Reisegruppe müesse warte und nachher bini no ines Gspröch mit em Schreinverwalter vertüft worde. Er het mer denn verzellt, dass i de, jetzt weissi nüm wenn, aber irgendwänn lang her, da i de nöchi vom Schrein en Schwiizer gläbt hegi. Ich meini de Herr heg öppis vo 1920 gseit, aber denn müsst er ja um die 100erti si. Dä Zürcher muess so öppis wie Jean Rutz gheisse ha.
Unterdesse isch scho halbi Füfi gsi und da ich für de ander Schrein sowieso zspat gsi wär, bini no mit em Zug retour zum Hostel bevor Rush Hour.
Im Hostel bini churz anegläge und denn ad Takoyaki-Party. Also Tintefischstückli in Onelettechugle und Sake. Susch, es richtigs Nationalitäte und Sprachwirrwar. Drü Koreaner wo nur die eint als Fremdssprach es bizzeli Japanisch het chönne, sechs Japaner , wo öppe zwei Änglisch verstande hend und no en Türk, wo änglisch gredt het. Ich han somit de Abig meischtens mit ihm gredet. Da er sich mit chum öppert andersch het chönne unterhalte. Mer hend hauptsächlich über die Sache gredt, wommer eigentlich nöd sött rede, da es zheikel isch. Also Religion und Politik. Er isch de Meinig gsi - respektiv er heg ghört, dass dSchwiiz en Meerminischter heg, obwohl mir ja keis Meer heget. Ich han em denn üses System erchlärt, aber peinlicherwiis bini nur uf sechs Bundesämter (exklusiv BK) cho. Wär denkt denn scho as Bildigs und Forschigsamt=）Denn hets in no wundergno wie mir Istanbul gfalle het. Irgendwenn bini denn totmüed gsi vom schnorre oder villicht au zleid vo sinere Art zrede.

ZFuess: 9.5km, 12800, Zug: 48km