Profile
Blog
Photos
Videos
Ich bin nur zweihundert Kilometer vo Kyoto entfernt. Aber es got hüt wieder Richtig Süde ad Weschtküschte nach Hiroshima. Mit de Bummler gohts 6.5 Stund und 300 Kilometer i die truurig berüehmt Stadt.
Erscht kurz vor 12 fahrt e relativ gueti Verbindig. Am Bahnhof hets no super Werbig fürs örtliche Sandmuseum gha. Si hend es paar Figure us dä Conan Anime in lebensächte Grössi us Sand 'bildghaueret' und nebetra no de Shinkansen in Miniatur. Mega cool. Het glich gad Luscht gha, i das Museum zgo. Han zwar zuvor scho e Plakatwerbig gseh, bi dem hets mi nöd a gmacht zgo. Naja sHotel in Hiroshima isch scho buecht, also chunnt das uf mini Japan 2020 Lischte. Natürli wirdi mis möglichschte tue, vorher wieder da zcho, oder ebe da zschaffe. Aber wills ich ja nöd gnau weiss und die olympische Spiil denn sind, hani halt jetzt e Lischte namens Japan 2020.
Mit em Bummler bini dur zimli schöni Landschafte. Nur hanis gar nöd chönne gnüsse, da dErchältig sich i Fieber entwicklet het. Bim einte Umstige han mi chum uf de Bei chönne halte. Trotzdem hani mi göttlich überd dBahnhofdurchsag gfreut. Respektive dMusigg. Die het eim so richtig ufgstellt. Aber ich nimm a es chönnt als Pendler no nerveufribend si. In Okayama acho, nach vier Reisestund, han mi entschide die reschtliche 160km mit em Shinkansen zruggzleggä. Am halbi Sächsi bini denn in Hiroshima acho und mit em Tram Richtig Hafe. Interessanterwiis isch das serschtmal, dass ich erlebt, dass Prepaid-Transport-Charte vo Kyoto akzeptiert würdi, aber die vo Tokyo nöd. Interessant.
Nach 20min bini denn churz vor em Hafe usgschtige und mich uf e Halbinsel begä. Det druf isch nämli mini hütig Unterkunft. Es isch eis vo de günschtigschte in Hiroshima, wo für vier Nächt Platz het. Da ich ja chrank bin, mag i definitiv nöd ines Hostel. Jedefalls hani glichvill für das 4* zahlt, als i für es alts 2* zahlt het. Wie sich denn usegstellt het, isch es fasch es Resort mit Läde und Konbini. Es isch ane gigantische Lag und wohl es Hochziitshotel. I de Hotellobby hets en Teich mit eme Steg und Minialtar. Und vom zweite Stock füehrt e Wendelrampe abe in erschte. Mann o Mann - ich bin wohl würkli acho japankulturalisiert. Si füehrt natürli uf guet Dütsch vom erschte Stock is Erdgschoss. Ich han es Stadtsichtzimmer im 18. Stock becho. Es het gsamt 22 Stöck, abr die obere Drü hend Restaurants und Lounges. Es isch underdesse dunkel und vomene wahnsinnig bequeme Sessel chani sLiächtermeer vo Hiroshima und dWiehnachtsbelüchtig vom Hotel gnüsse.
- comments