Am Morge hanis mir no nächli gmüätlich gmacht. Erschtens hani am Tag devor volls Programm gha und cha ja nöd in aller HerrGottsFrüäh am Gärtner go sägä, dass i numol ä Nacht blibe.

Es het riisig gwindet. So dass mis Zält scho wieder trochä isch trotz em nächtliche zünftigä Rägä.

Woni underwägs is 'Tal' bin, hets wieder uftuä. En Blick nach obe zeigt, dass dWulche wohl es Wettrännä machet. Die beweget sich so schnäll. Drum hani au nöd dSunnecrème füregholt. Im Abewäg hani näbschscht dä schöne Bambuswälder bsunders dRiisfeldterassene imponiert. Im Dorf han mi gfröit in Supermärt zgo. Äntli mal wieder Uswahl. Zu minere Überraschig will de erscht am 10ni ufmache. Underdesse isch aber Nüni, denn wänn die Superzenter eigentlich in Japan amigs ufmachet. Tja denn muäss es wohl glich wieder in Konbini go. Drufabe bini zum Busterminal. DBüs fahret nöd ganz so regelmässig. Somit dörfi jetzt e Stund warte und denn numol e Stund uf min Aschluss in Ogi ( Hä, isch mer grad ersch jetzt ufgfalle, dass dä Dölf da no es Hafedörfli hät). Denn hani halt die erscht Stund gnutzt zum en Termin am Nami abmache, zmorge ässe, Tagesbuspass poschte ( ja, da gits Tagespäss - nöd wie in Mutsu, Aomori). Es het underdesse grägnet. Also eigentlich ischs än Rägästurm gsi. Es het nämli glichziitig gwindet wie verruckt. Es het sogar die schwäre Schwänktüre gäge inedruckt.

Chum bini in Bus gstige het de Busfahrer scho mit mir afange schwätze. Er het es Basis Änglisch chönne und hät mi sicher nach Ogi. In Ogi hani denn es Stündli de Ziit gha und bin id Tourischtinfo ghocket um sWifi usznütze. Aber dezuä bini nöd würkli cho. Am Chef det sini Tochter goht amigs is Aikido und so hämmer relativ lang gschwätzt. Ich han em denn no versuächt es YouTube-Filmli vom Schwiizer Sumo szeige. Leider hend eifach nöd welä go. Apropos Sumo. Im Auguscht hets da en chline Wettkampf gä ufere Wasserplatform. Schad, wär sicher luschtig gsi.

De nächscht Bus het mich zum Sado Taiko Zenter bracht. Taiko heisst eigentlich grossi Trummle und isch ebe die Art vo Musig woni es Konzert im KKL gseh han. Ich han mi am Morge für e Klass agmulde oder eigentlich meh ä Einzelstund, da grad niämärt anderscht au uf diä Idee cho isch a dem Namittag. Ich han denn zersch no en Usschnitt vomene Konzert chönne luägä, bis denn dStund agfange het. Es sind öppe drissg Ein-Meter Trummle im Kreis gstande. Ich han uf jedi dörfe drufpauke und mini drü Liäblingstrummle dörfe uswähle. Denn hets ä chlini technischi Iffüährig gä und den hets dTaikoka Rythmä vorgä, wo ich dänn nachegmacht han. Es tönt grad nöd so spannend, isch aber es riise Gaudi gsi. Am Schluss hani no würkli uf de grosse grosse Trummle dörfe spile. Im Zenter hends zwei und die sind de ganz Stolz. Sie heisset Yamaimo-Kun und Butabana-Chan. Letscheres heisst Säulinase und si treit de Name will si dur dÄscht so zwei Naselöcher het. Mä gseht au würkli is Innere. De Baumstamm isch vomene 600 jährige Baum, wo ämene Taifun zum Opfer gfalle isch. Dere Taiko-Musigg zulose und zuäluägä isch interessant und schön, aber selber druf zschlo isch überwältigend. Bsundets die grosse hend so ä Schallwelle wo der entgegechunt und es sehr lange und wohlige Klang. Gigantisch.

Nach dem Abentüür het mich dLehrerin zrugg uf Ogi tuä. Han zwar demit grächnet zLaufe, aber so bini natürli flexibler. In Ogi hani de Bus Richtig Sawata gno und bin zäh Kilometer devor usgstige. Han nämli im Hiweg schös Trottoir entlang de Bucht gseh und da muäss i no es bizzeli laufe, damit i uf mis hütige Ziil chum. Zersch isch no dur es paar Wiiler gange und das a de kurveriche Strass ohni Trottoir. Defür mit grandiosem Blick über diä gelbgrüäne Riisfelder zur Meeresbucht.

Es het luut Busplan no viär Bus wo die Strecki fahret und uf de zweit möchti go. Schliässlich dörf mer ja au dRosine sprich die schön Wägstrecki usepicke. Und was mir wichtiger isch, wänni würd durelaufe, müsst i im Dunkle zum Zeltplatz ufelaufe. Nöd das woni aschtrebe. Aber zersch gnüssi die wunderschön Landschaft. Eifach toll.

Churz vo de Füfi bini denn in Toyota gsi. Es chliis Fischerdörfli miteme Tempelschrein. Natürli ischs nöd DAS Toyota. Toyota heisst so was wie grosszügiges Riisfäld. Und das gits wohl a me als eim Ort in Japan. Wemmer scho bi de Automarke sind: Daihatsu heisst grosse Motorenproduktion' oder 'Osakas Motorenproduktion' (heute Aktienmehrheit bei Toyota), Honda isch Hauptriisfäld (Name von Gründer), Subaru sind e Sterngruppe innerhalb vom Sternbild Stier, Datsun isch Zämesetzig vo de Initialen der Investoren und em englische Sunne, Suzuki isch dMeerbrasse (Name des Gründers), Nissan ist eine Abkürzung von 'Japanische Industrie', Mitsubishi isch ä Beschriibig vo Diamante und Mazda isch e verwestlichti Form vom Gründername Matsuda. Und damit zrugg zum Dörfli Toyota.

Vo Toyota us nimi de Bus, wo i 10 Minute sött cho. Nur isch er nöd cho, und nöd cho. Han zersch gmeint will halt churz nach de Füfi isch, eventuell nächli Fiirabigverchehr, aber ich glaub, das gits nöd uf dere Insle. Uf em Busplan vor Ort isch die Ziit schattiert gsi. Aber dErchlärig het nächli zvill Kanjis gha. Es isch ami sicher kein Sunntigsbus. Da er nöd cho isch, hani halt uf de nächscht gwartet. DZiit, um zur nächschte Haltestell zlaufe hetti gha, wänni gwüsst het, dass de Bus nöd chunnt. So hani schlussäntli e ganzi Stund in Toyota a de Bushaltestell gwartet. Defür hani während de Fahrt no amene Fisch chönne zuäluägä, wo wohl für de nächscht Wiitsprungwettkampf trainiert. In Sawata bini no churz in Supermärt go än zNacht hole und am halbi Sibni ischs ufwärts gange. Glichziitig dSunne abwärts und nacheme Kilometer hani dHandytaschelampe brucht. Diä paar wenige Autofahrer sind glaub nächli überrascht gsi, aber hät mi niämärt agfahre. Han ja au no dievreflektietend Sicherheitsweschte gha. All füfhundert Meter hets denn ä Strasselampe gha ussert bim letschte Teil. Es paar Mal bini verschrocke, wo en Stei plötzli sich inen Frosch verwandlet hät und weggumpet isch. Bin schlussäntlich guät im Autopark acho und han min ZNacht im Zält gnosse.

ZFuäss: 25600, 20km, Bus: 45km