Profile
Blog
Photos
Videos
Fasch en halbe Monet nöd brichtet. Sorry. Dasmal liits aber nöd a mine fählende Disziplin, sondern dadra, dass ich dur e Fählkonfiguration vom Natel mini Notize verlore han. Sprich mehreri Stunde zämäschriibete und drum schiissst mi grad nächli a. Glücklicherwiis hani zwei Stund vorher no dFöteli uf de Computer kopiert, süsch wäred die au Wäg.
Ich bin am 25.9. mit em Tragflügelboot vo Busan in Fukuoka acho. Das isch e Stadt uf de drittgröschte Insle vo Japan namens Kyushu. DImmigrationsbehörde het es längers Schwätzli mit mir ghalte. Hä scho demit grächnet, dass i muäss bewiese, dass i nöd schaffe, aber glich no usreichend Gäld uf de Site han. Wos mi denn wiiters loo hend, hend dZolllütlis no mega Fröid a mim Pass gha. Die hend nöd welä wüsse, was i importiere sondern eher numol Immigratinsfrage gstellt. Speziell gsi. Sie hend usserdem müässe uf mich warte. Bin nämli unterdesse no die einzig vo de Passagier gsi, wo im Gebäude gsi isch.
Per Bus und U-Bahn isch inmitte em Pendlerstrom zume Vorort gange, wo mis Hostel isch. Det bini denn drüü Täg dra gsi, alles wieder à jour zbringe und Bewerbige zschriibe. Dank de Leischtig vom Laptop und de Benutzerfrüüntlichkeit vo es paar Onlineformular bini chum vorwärts cho. Defür hets no es paar Skypes nach hei gä. Ich han mi im Hostel in gmixte Schlafsaal lo tuä, damit i nöd das chigimigi-Gschnäder han. Defür meh Schnarchler. Mä cha nöd alles ha... Aber luschtig isches gsi mit es paar Koreaner, aber dSake trunkete am zwei am Morge hend min Tagesrhythmus nächli erschütteret. Ich han au äntli wieder Glägeheit gha, richtig zWösche und has gschafft, au mim Schrittzähler e Wasserkur zgönne.
Hüt schaffis äntli au no dStadt go azluägä. Nacheme Bsuäch im Hello Kitty Lade, ime wunderschöne Bahnhofshopping Areal mit Kappa-Brunnen, isch Charteschribe agseit gsi. Da ich mis Goshuin-Buäch vergässe han, ischs nöd zu de Hauptattraktione vo de Stadt gange ( das würd drü Schrein beinhalte) sondern in die entgägegsetzti Richtig. Es isch zume riisige Sport und Freizitpark gange, wo no es paar Ruine vom Fukuoka Schloss het. Underwägs zumene andere Park ischs no churz ines Shoppingzenter gange, zum es paar Gebruchsartikel zernöiere. De Yusentei Park oder eher ehemalige Privatgarte isch mega schön gsi. Ich han mi no blamiert, woni interessiert zweine Jungs bi irgendeme Ölpendel-Experiment zueglueget han, bini fasch in Garte inegheit. Im Parkhend mi dMugge attackiert und usere chline Pause isch nüt worde. DKoi im See sind defür mega luschtig gsi. Me hets scho vo wiitem a de Wasseroberflächi gse, wänds adüüset sind. Dana ischs uf en fasch zweistündig Spaziergang dur Wohnquartier is Hostel gange. Underwägs vorallem vo Schüäler begrüässt worde und binere Schuäl hends grad no Kendo-Stund gha. Wär wahnsinnig gärn go innegügsle, aber wär wohl nächli komisch gsi.
Zrugg im Hostel hani min Ufenthalt im gliche Hostel in drü Wuche organisiert und han drum de Koffer chönne dalo. Am Obig hani natürli no so guät wie mögli de Compi usgnützt.
ZFuäss: 23700, 20km, Metro: 10km
- comments