Profile
Blog
Photos
Videos
Am Morge hani numol i mini koreanische Hörbuächer ineglost. Es isch esoooo schwirig. Ich merke wieder emol, dass ich in Sprache nöd würkli talentiert bin. Aber es sind riisig langi Wörter. Grüäzi isch Annyeonghaseyo und Danke Gamsahamnida. Unglaublich. Wie chammer nur so langi Wörter ifüähre für so wichtigi Wörter? Ich versuächs zwar, aber ich chan mer die nöd merke. Für sZmorge hets am halbi Achti ä Durchsag gä. Wieder nur e Halbstund de ziit. Dana biki wieder id Kajüte und han nunol dDöset. Es schwanket nämli ganz rächt. Mä chan nüm grad laufe. Aber wemmer liit ischs fasch wie inere Hängematte. Am 10ni hets e Durchsag gä, dass mer erscht e Stund spöter aleggät. De Usewäg isch denn rassig gange - dur dImmigration und Zoll. Interessanterwiis hends Quaratäne schö mitere Sprütze signalisiert. Hani no niä eso gse.
DFährehalle in Busan gseht scho nächli andersch us. Da hets alles vo Bank über Kafi, Konbini, Reisebüro und Tourischtinfo. Im letschere bini frächerwiis no wäg minere Hotelbuächig im Landesinnere go fröge. Ich han nämli es traditionells koreanisch Hotel buächt - alles uf koreanisch. Da ich aber kei Emailbestätigung becho han, bini unsicher gsi, öbs klappet. Es isch alles ok, aber dBsizeri macht sich Sorge öb ich ohni koreanisch uf em Land cha überläbe. Es het mer zwar nächli Angscht gmacht, aber ich muäss eifach alles schön ufschriibe. Da ich nöd campe chani mis Natel unäntlich vill bruche. Det hani mini koreanische Hörbüächer und es koreanischs Übersetzigsapp. Mini Kenntnis im Japanisch und Chinesisch sött mer au chönne hälfe. Zum Teil häts ähnlichi Wörter. DZahle sind vom Chinesisch überno und liächt abgänderet. Irgendwiä sötti da scho mich chönne zum Ziel schla. Hoffi.
Am Bankomat het denn no mini erschtä Won usgspuckt. Und zwar in chlinote. Das bringt Japan nämli nöd fertig. Mit so 20x 10000 Won-Note erschintmer sich grad rich, obwohl es nur 165.- Frankä sind.
Denn hani no churz mini Emails abgarbeitet und bin losgloffe. Südkorea heisst mi mit Rägä willkomme und mit eher chalte Temperature. Han in Japan sältä uf mine Reis dJagge müässä aleggä, wills chüäl gsi isch. Naja, liäber so als heiss=)
Die erschte drü Kilometer bini no nächli näbetusse gsi. Ich han mi richtig schlächt gfühlt, dass i zwenig Ziit investiert han mich über die Kultur zinformiere und dSprach zlerne. sDankeschön chunnt langsam. Aber ich wird definitiv niä koreanisch lernä, wänni für jedes Wort zwei Täg bruche. DSüdkoreaner schiinet weniger höflich zsi, aber glich fründlich. Die Strasse erschlönd mi aber - ich glaub han en Kulturschock. Die erschte Zäh Kilometer laufi entlang e sächs bis 10 spurige Strass. DTaxis hupet de ganz Ziit. Ich nim a das machets da zum zeige, dass frei wäret. DPrimarschuäl isch au grad a dere Hauptstrasse und dSchüäler werdet mit gälä Minibüs umegfahre. Bi de Zebraschreife wird mer fasch überfahre, au wänns für mi grüän isch. Wännd Auto wennd abbüge ine Näbetstrass, fahrets eifach vor dir dure au wenns nur 30cm isch. Die möchtet die drüü Sekunde nöd abwarte, bis i verbii bin. Churz bim Mac ufs WC, hets kei Papier me gha. Ich bin usgrüschtet, obwohl mir das in Japan no niä passiert isch - weder i gschäftige Städt no in abglägene Hüüsli, wo wahrschinli all zwei Täg öppert brucht.
Je meh ich id Innestaft cho bin, desto eher han mi a die Ubterschied gwöhnt. Aber dHochhüüser sind da vill ischüchternder als in Tokyo oder Osaka. Ich has Gfühl in Japan hets nur Gschäftswulchechratzer. Da aber zig 34stöckigi Wohnblock. Anderersits sind sich dKoreaner irgendwiä meh gwöhnt zlaufe. DTrottoir sind au mega schön, promenademässig. DSüdkoreaner sind au affiner was so die blöde Schosshünd betreffet. Jede 10. Lade isch entweder ä Tierhandlig oder Hustiärproduktlade. Erschteres dunkt mi eher tierquälerisch. Am Schaufänschter dra isch es riise Glasgstell gfüllt mit en halbe uf halbe Meter grossi Glaschäschte. In jedem isch so es 20cm chlises Hündli miteme Spilzüg. Si sind zwar schnüggig gsi, aber ich het si liäber frei umespile gseh.
Mis Hostel isch zuäfälligerwiis grad im Inn-Viärtel. Rundume 24h Reschtis, Pubs und Love-Motels. Mis Hostel isch gigantisch. Sogar es moderns Zahleschloss an Zimmer - also so en chline Bildschirm wo erschint wemmer dTür berüährt. Eigentlich bini use zum mir irgendwo no en zNacht zgönne. Ich bin aber so perplex gsi ab de Möglichkeite woni het, dass ich mich nöd han chönne entscheide und stattdesse es Sandwich im Konbini bin go hole. Es het Inder, Koreander, Japaner, Chinese, Vietname und Amis gha. Am beschte hät mer aber de türkisch Glacélade gfalle, wo sich Star Kebab nännt. Er verchauft weder Kebap no türkischs Glacé, sondern normals Softglacé. Zrugg im Hostel bini recht kaputt gsi vo all dene Iidrück, dassi recht schnäll go pfuse bin.
ZFuäss: 22.6km, 28300
- comments