Profile
Blog
Photos
Videos
Buenos dias.
Diä meistä heis inzwüsche erfahre: Ig ha ä Wohnig gfungä :-). Mini Gägend het auso super Strassänämä, grad umä Eggä isch Brasilie, Südamerika, Bahamas u Bermuda. I derä Eggä passi aubä ganz bsunders uf, dasi nid verlorä gangä ;-).
Dürä Tag bini jetzt aubä alleini u gseh dr Octavio ersch wenn är fertig mit schaffä isch. Mini Schueu fangt äbä ersch am 25. Januar a. Bis jetzt chami tiptop beschäftigä. I ha dWohnig vo obä bis unger gschruppet, ha ds Shopping-Center nach aune möglichä Sache durchforstet zum luegä was si so hei. Ha afa feini Sachä choche u vorgester simer bi Octavio's Eutere zum Ässä iglade gsi u i ha Öpfuströisu gmacht, wosi sehr gärn hei gha. Das zmache wär ir Schwitz ja würklich meeega eifach, aber hie isches nid sooo eifach gsi u het mi ziemlich viu Närvä kostet, aber am Schluss hani u müässä lachä ab mir. Aus het agfange das si hie keni gmahlene Mandle hei. De isch mir in Sinn cho, dasi ja ä Mixer ha u diä dert dri schmeisse chönnt. Das hani de o gmacht u het sogar ziemlich guet klappet - ja, dr Mixer läbt ono ;-). Hani scho erwähnt, das ig hie e Gas-Herd/Ofe ha...? Vor äs paar Tag hets mega nach Gas gschmöcked, wöu bi erä Platte Gas use cho isch obwouh dPlatte abgsteut gsi isch. Wo dasi dir Ofä ala hani scho gwüsst, ha dSchwo vom Octavio gfragt. Ha auso Türä ufta, Gas agla u das ding azündet. Doch, o du megagigantische Schreck, diä Flamme isch nid dert blibe wo ig dänkt ha sondern ha im Ofe inne Füür gseh. Das het mi u erschreckt u versuchet das wieder "uszblase". Ja das tönt jetzt sicher lustig, aber wemä unger Schock steit überleitmä keni 2 Meter wit. Ig ha auso nid gwüsst ob das Ding nächstens Explodiert u bi drum us dr Wohnig u gad is Vermietigsbüro wo gad näbä mire Wohnig isch. Dert hani dr Vermietigs-Assistäntin wo bekannt für ihres regigloses Gsicht isch verzeut ig hegi "Füür im Ofe" - kes Zucke i ihrem Gsicht, auso bini los grennt zrug id wohnig, si hinger här u woni zrug ir Wohnig bi gsi, het mir oscho äs Lämpli afa uflüchte: Das muess äuä so si, schüsch wird mi Chueche ja nid lind... hmmmm. Das het de o Brenda (Vermietigs-Assiständin) gmeint. Puuuhh, ha ig ä Schreck gha. Mit derä Gas-Chochete hani mi auso no nid so ganz chönnä afründe.
Was hani schüsch no so agsteut? Ahja, gester hani dänkt äs wär ä guetä Tag zum sich mau zverfahre. Auso hani mir zOuto gschnappet u mi ufä Wäg macht wo ig ä HEB (grosses Migros, wi Soriana, aber mit meh speziellä Sachä)vermuetet ha, da si bi Soriana ke Curry/Vanillezucker/Mascarpone etc. hei.
Am erste Ort hani dä nid gfunge, drfür zHus vo Verwandte vom Octavio u o ds Tanzstudio, wo mir äuä de Salsa-Ungerricht nämä (o scho nid schlächt, oder?). När bini wieder zrug u ha mau ä Strass probiert woni no nie säuber dürä gfahre bi. Voila, scho hani ä HEB gseh. Cool, hani dänkt, isch ja bubi eifach tztztzt... Hm, när hets äs Strasseschild gha mit HEB u no angerem Züg drufä. Auso hani natürlich das Schild gno, isch mir no so logisch gsi.. Numä ischmä när ine angeri Strass cho wo vom HEB wäg gfüährt het, 3-Spurig u mit ziemlich Verkehr. De bini inä Sitestrass abboge zum däm ganze äs Schnippli zschla u bi tatsächlich num öpe 5 Meter vom HEB wieder uf dStrass cho. Leider uf dr fausche Strassesite u dert hets am Bode ke Pfile gha, i weli Richtig weli Abbiegig uf diä angeri Strassesite füährt. Drum bini de när ufä 4-Spurigi Strass cho mit Betonabsperig i dr Mitti u HEB immer no uf dr fausche Site. Äs mega Theater, bis igs ändlich gschaft ha dä Igang zfingä, ha aber nid ufgäh, schliesslich ha ig ja Zyt. Het sich du de o glohnt, ha mis Curry u bi glücklich ;-). Usserdäm hätti immer am Octavio chönne alüte drmit är mi rettet. Abem 25. isch är (vorussichtlich, dr Plan het scho 2 Mau gänderet) für 1 Wuchä in Brasilie uf Montage, drum verfahri mi lieber jetzt aus denn.
Am 6. Januar isch ja 3-Königs-Tag gsi u mir si wiedrum bidä Eutere vom Octavio zum Ässe iglade gsi. Hie gseht dr Chuechä ächt angers us, aber dr Gschmack isch ändlich. http://www.google.ch/images?hl=de&biw=1276&bih=603&tbs=isch%3A1&sa=1&q=6+enero+rosca&aq=f&aqi=&aql=&oq=&gs_rfai= Statt ämä König hets i eim Ring 3 Babies dine u statt König spiele muess dä wo äs Baby het irend eis ines paar Täg Tamales zahle. http://www.google.ch/images?hl=de&biw=1276&bih=603&tbs=isch%3A1&sa=1&q=tamales&aq=f&aqi=&aql=&oq=&gs_rfai= Dr Jaime u dAmbaro mit irne King Jaime-Junior u Marco si o cho. Diä Familie isch mega nätt. Für ä Abschlussbau vor Abril sirä Usbildig wo ig u dr Octavio igladä si, ha ig mir idä USA ja äs Chleid kouft u dAmbaro hets für mi kürzt u Treger apasst, das zgross gsi isch. Jetzt gsehts mega schön us. Hinger hani wiä ä Schleppe, diä wird när zum tanze mit ärä Broschä ufä klemmt, drmit ig nid ufs Chleid stah. Hüt Abe göi mir no inä Kosmetik-Schuppe. Die löi sich aui dHaar u zMake-up la mache, drum hani mi vor Abril la überredä dert o mau inä zluegä zum mi ufzbrätzele. Bi scho gspannt. Für si isches tür, aber verglichä mit Schwitzer-Prisä isches 3-Mau nüt. Für umgrächnet 40 Franke gits äs Make-up wo Schweiss/Tränä-Resistänt söu si u dHaar wärdä ono gmacht. D'Frag isch numä wiämä när usgseht hahahaha.
Mini Wohnig wär dr Alptroum vo jedem glertä Handwärker. Drmit mä dKilmaalag cha installierä hei si äs Loch id Wang gmacht u obe u unger vor Klimaalag chani no chli usäluegä. Fixiert isch dKlimaalag mitämä Mässäer hahahahhaa. Hey de hani ämu gen früschi Luft :-). Im Momänt hei mir gad sehr warm, gester isch öpe 24 Grad gsi, was eher ämä Früähligswätter aus Winter entspricht. Da mini Wohnig "dekorations-Fänster" u ke Heizig het, bini froh, isch nid chaut. Isches dusse chaut, de isches o dine nie würklich kuschlig warm. Mini Wohnig hani scho richtig gärn becho (o wes vorhär vilich nid so tönt het). Bim Igang hets ä Paume u viu Grüän. Im EG ca. 20 m2 hani mini Wohnchuchi mit ämä Tisch/4 Stüäu u zwöi Sofas. När geits ä Träppä ufä u dert isch no ds Bad u mis Schlafzimmer mitämä riesigä Chleiderschaft. DGägend isch sicher u sisch mega eifach zum dr Wäg zum Octavio, zum Ichoufe etc. zfingeä, da ir nechi ä grösseri Verbindigsstrass isch.
So, das wärä auso diä neuste News vo mir.
Ig sände euch vili liebi Grüäss u ä dicki Umarmig.
- comments