Profile
Blog
Photos
Videos
Buenos dias!
I ha mini erschti Wuche in San José überläbt! Auso ab und zue hani zGfüeu mi Chopf explodieri iz de, mit Spanisch, Änglisch u no Hochdütsch rouchned mi Chopf am Abe nume no so! Drum bini froh gsi hani nach dene 5 Täg Schueu, 2i Täg Pouse gha! Am Fritig abe bini öpis ga trinke i ne costa ricanischi Bar wos nume Ticos (Lüt vo Costa Rica!) het. Dr Rum vo Costa Rica isch excelente! Leider haninä mit Pepsi becho u nid mit Cola, aber fein isches glich gsi! J
Am Samschtig morge bini mitemne Kolleg vor Schueu u mit mim Gaschdbrüedsch u dere sire Fründin ane Strand ar weschdküschte, ir nöchi vo Jago. Mir si ersch mau 2,5 Stung Outo gfahre u si de am haubi 11i acho. E troumhafte Strand, herrlech! Es het zwar ke Wissesang gha, drfür isch zWasser klar gsi, kenni Lüt u wit u breit keni Zivilisation! Has so richtig gnosse! U es isch o chli wermer gsi aus zSan José, öpe 33 Grad. Da San José über 100m.ü.m ligt, hani bis iz so Temperature gnosse um die 24 Grad. I meine isch o nid schlächt, wie chaut heit dirs?
Dass mi mi Gaschtbrüedsch het mit gno hani super fründlech gfunge, bis iz hani e guete Idruck vo dä Lüt zCosta rica, si eigentlech aui nätt u lieb.
Am Sunntig hani zersch mau usgschlafe, mit mine Gaschdeutere ga vrschidnigschti Ichöif erledige u chli glert u gläse u chli chilled, gschöggeled, gflonered oder wie dir das weit nenne ;-)
Da Costa Rica nach am Äquator ligt geit dSunne zganze Jahr um die glichi Zyt uf und ab, so zwüsche haubi 6i u 6i. Das denn dunku wird, sött mä ab denn nüme alleini dusse si, alleini usega oder alleini heiloufe. Isch schono rächt e ischränkig, i bi mir daheime gwöhnt, dassi mitem Velo sogar zNacht am 4i cha heiradle u nid muess angscht ha! Hie nimt mä haut zTaxi. Zum Glück isch das nid au zu tür!
Am Mäntig hani scho wieder Schueu gha. Es het e Wächsu gä vo dä Lehrer u i bi iz bim Louis, wo o lieb isch, aber strenger. Mir hei iz soooo viu Husfgabe becho, nüd vo umeplöischle! Geschdr Abe bini ane Schuttmätsch! Mit es paarne vor Schueu si mir mitm Bus 45 minute gfahre u em 8i het dr mätsch agfange. I ha mi sogar rot schwarz agleit um so chli mitzfane. Hihihihi, mir hei aber de fausche gfunge u ersch nachm Spiu usegfunge, dass rot schwarz gar nid san José isch… Intressante Mätsch isches aber glich gsi!
Morn isch wieder Tanze ir schueu agseit, am Donnschtig gits e Chochkurs (natürlech spezialitäte us Costa Rica) u Fritig chunt scho wieder zwuchenändi!
I wünsche euch aune ir schwiz e gueti Wuche, häbet Sorg zu öich u um mi müessdr nech keni Sorge mache, mir geits guet u i gniesse mini Zyt i vouuuuuuuuuuuue Züg!
Hasta luego!
Tanja
- comments