Profile
Blog
Photos
Videos
Hola como estan?
Mini leschdä zwöi Wuchene hie in Costa Rica si abbrocho… Di leschd Wuche isch räht sträng gsi, ha nid sehr viu chönne plöischle. Am Morge bini aube id Schueu, ha einzu Ungerricht gha. Ja bi auso Klassebeschti gsi, richtig! :-D Mini Lehrerin isch mas o menos guet gsi, e liebi, aber het mir chli zviu vo sich gred, i sött doch eigentlech zspanisch praktiziere, nid? Am Mäntig, Mittwuch u Donnschtig Nami bini ga schaffe i Shop woni mini nöii Freiwilligi Arbeit ha agfange. Bi immer no zfride hani chönne wächsle vom Chinderheim i dä Shop! Die Frou isch sehr lieb u nimmt sech sehr zHärze, dassi gärn möchte spanisch redä. Am Donnschtig hani di ganzi Story vom Chinofium „Black swan" ire vrzeut uf spanisch! Wie gloub scho gseit, dArbeit isch iz nid grad so herusfordernd, aber das suechi ja nid. Drfür hani scho glettet, Etikette gschribe, Föteli vo dä Produkt gmacht ect.Mornmorge gani id Schueu u abem 12i gits e Reunion vo dä Indios, das chani o mitga u mithäufe. Fröie mi u bi gspannt, öbi spannendi Sache wirde Erfahre vo de Uriwohner vo Centralamerica.
Ledschd Wuche hani o chli sträng gha mit Usgang… Chino, Salsakurs, Salsatanze, Konsärt ga lose… ha nid sehr viu schlafe. Geschdr Abe bini mit drüne ga Rouschuene. Ir Schwiz gits das gloub nüm, aber ganz früecher het mä so Rouschueu-Partys vrastautet. Es isch ire Haue gsi, u wie bim Schlöferle isch me Rundine gfahre. U di meischte hei nid 4 Röueli hingere nang gha, sonder old-style 2i vore u 2i hinger. Mä isch bi dä erschte Rundine no gwaggelig druf gsi u gly isches scho besser gange. Es het rächt viu Lüt gha u für di junge isches e Flirtingplatz zum Lüt lere zkenne. Ab und zue hets spezieu „Rundine" gä. Bispiuswis isch vorgä gsi, zwöi Froue u ei Mah müesse zäme fahre (Händchenhaltend). Oder de isch Wasser uf dBahn gprüzt worde, für dass me Lüt uf zFüdle gheie us chli „luschtiger" isch oder de isch ab und zue zLiecht usgange u zGekreische isch los gange… Isch luschtig gsi u Umfau hets o kenni gä!
Geschdr hani mit drü ne angerne vo mire schueu wieder e Usflug gwagt. Mir si em morge em 7.30 gstartet u ab isches gange ufe Vulkan Irazu. Mir hei super Wätter gha u mir vier spanisch lernendä hei zDurchschnittsauter so richtig abezoge. Das kenni Wueuchäne het gha, het me i Krater gsi u o dLagune het me guet chöne Fötele. E chline Spaziergang düre Nationau Park hets gä u scho isches witer gange. Mir si e Basilika in Cartago ga aluege, die 1921 boue isch worde. Witerisches gange ine Orchidee u Kaktee-Farm. Isch schön gsi u dReiseleiterin het zu jeder Pflanze u jedem Blettli u Blüemli intressanti Sache vrzeut. Am 2i si mir de ire Kaffifarm ga zmittag ässe, natürlech hets Casado gä, Riis, Bohne, Platanos, (Chochbanane), Fisch, Chäs (wie chätschgummi) u chli Gmües. Zledschd si mir no e Ruine ga bsueche wo bimne grosse Ärdbebe (gloub 1912 isch zerstört worde. Zum ärdbebe möchti no grad säge, dassi sehr dankbar bi, geits mire Schwoscht guet! Für dene wo dInformation no nid duredrunge isch, si isch zchristchurch gsi, wo vor zwöi Wuche zärdbebe gsi isch! I bi sehr froh het si das gsung überstande u hoffe si chönn ire Ufenthaut glich no i voue Züg gniesse!
Zu mim Usflug muessi säge bini positiv überraschd. Hinsichtlech dass mir dr Usflug zum vulcano Arenal überhoupt nid gfaue het, hets mir sehr gfaue. Klar isch o die Tour meh oder weniger touristisch aghuchd gsi, aber mir hei viu intressanti Sache erfahre u viu gseh!
Hüt düre Tag het mi Gaschdpapi Geburi gha. Nachdäm dassmir em morge hei Gallo Pinto zmörgeled, isches em 3 mitem zMittag witer gange. Läckbobi, hei mir wieder gässe. Irgendeinisch hets zDessärt gä u nachem Dessärt hets dGeburiturte gä u dTanja het immer schön mitgässe!:-D Was mi chli schad dünkd, was dÄss-Sitene vo Costa Rica abelangt, isch dassmä nid druf luegt, dass aui glich zitig ässe, u aui binenang sitze. Es isch es cho u ga gsi, u aui si irgendwie ghocked u gässe. Bi üs ir schwiz hingäge isches unandständig we mä scho isst bevor nid aui zÄsse hei becho. Auso fausi scho zude Centrau-Amerikanische-Ässgwohnheite mutiert bi, nämets mir nid übu, wenni am nächschte ässe di erschti bi wo afad mit ässe!:-D
So, iz bini scho chli müed, lise de no chli u när machts scho chnorzibüüüüüü…
Buena Semana y un grande besoooo!
P U R AV I D A !
- comments