Profile
Blog
Photos
Videos
Buenos dias!
Schwuuuups, u hie isch scho mi leschd Newslettre vo Costa Rica us! Ersch bini no grad dr erscht Tag hie zSan josé gsi u ha euch vo mine erschte Idrück vrzeut… Jänu, iz isches haut so, gniessi no di leschdi Wuche!
Leschd Wuche isch sträng gsi, am Mäntig hani natürlech wieder einzu Ungerricht gha mitm Luis, am Nami bini diräkt nach dr Schueu i Shop woni di vorderi Wuche scho gschaffed ha. Mäntig u Zischtig het es Träffe vo dä Indios (8 Indios vo 8 vrschidnige Komune) statt gfunde u i ha dGlägeheit gnützd u bi o mit. Mä het zäme zMittag gässe, Tamales hets gä. Es typischs Gricht vo Costa Rica, wos o zu Wiehnachte git. Mais,Fleisch u Gmües i Bananebletter igwickled. Em 2i si mir per Outo e haubstung id Bärge gfahre u imne Chiuche-Sau het di „Reunion" statt gfunde. Mä het sech lerä kennä, chli plöiderled u när het mä über ne Eröffnung vore Exposition/Museum. Dr Shop woni schaffe, gits sit sächs Mönet u zZiu isch eigentlech im Ruum näbedrann es Museum uftue wo Infos het über Indios. Mir hei usgarbeitet was aus präsentiert chönt wärde (u da isch natürlech dMeinig vore „extranjera" nid unwichtig gsi), wies gstautet söt wärde, wär wie was wo macht usw. Gred isch uf spanisch worde, drum isch mir de o gly mau dr Chopf fasch gar explodiert! Aber zwöi Indios hei nid so guet spanisch chönne u hei iri eigedi Sprach gred. Am Abe si mir i nes Backpacker ga znacht ässe u i ha de zum glück zu mire „Arbeitsgäberin" iz i ihres Huus chönne ga schlafe. Am nächschte morge isches wieder glich abgange, witeri Pünkt fürne Museumeröffnig si besproche worde, witers Vorgehe isch agluegt worde ect. Für mi isches sehr spannend gsi, zuezlose u mit denä Lüt chli zgsprächle…
Zischtig gäge Nami bini wieder heizu u am 4i mitemnä Lehrer ga jogge. Da är dSocke dahei vrgässe het u gly mau Blattere het becho, si mir de nume 40 minute gange. Am nächschte Tag het mi e Lehrerin gfragt öbi mit ihre no wöu ga jogge. Das Agebot hani doch glatt agno u ha mi gfröit uf chli lenger jogge. Mir si 45 Minute i Pampa usegfahre u si dert EINEHAUBSTUNG ga jogge! Läck du mir, aus uf Asfaut u ufe u abe u nomeh ufe u no meh abe! Het zwar guet ta, aber am nächschte Tag hättet dir mi söue gseh, fasch ufde Chnöi gloffe u bim Absitze hani mit Chüssi müesse abböuschterle… jajaja, das isch e sportstudäntin… :-)
Am Donschtig isch mi Geburi gsi! Merci für öii Glückwünsch, i hoffe dir heit mini Antworte per SMS becho, da ig dSMS vom Internet usschribe, bini mängisch nid so sicher obsi de o würklech achöme! Mi GEburi het super agfange, mis Gaschdmami het sech vrschlafe! Toll, nid mau es super zmorge hani becho, aber drfür hani schmuck becho vo mire gaschdfamily. U immerhin hei si mir ir schueu gsunge, chueche bache u em Nami bini ga schaffe u o dert hani es chüechli becho! Bi hei u ha mini Ufgabe gmacht u irgendeinisch hets zNacht gä, ha mau nid alleinig ässe, sonder mit mine Gastschwöschtere. Aber isch scho chli angers gsi aus ir schwiz geburi zha. Si hei de für mi gsunge, ha cherzli usblased wo ufdä Brownis si gsi, wo mini Gaschdschwöschter het kouft. E chli schpeter bini de i zJazzCafe, e Bar wo jede Abe e Liveband spiut u woni mi scho vrliebt ha u scho öfters dert häre bi. Mittlerwile kenni o es paar lüt wo dert schaffe. Mini Gaschdschwöschter isch o mit cho, auerdings isch si nachere haubstung scho wieder hei gange, wöu ihres Ching nid het wöue ufhöre gränne. No ne Kolleg vor schueu isch cho u de hanis mit ihm luschtig gha! dBand isch guet gsi u bi de no es Hüsli witerszoge u ha so mi Geburi i voue (Usgang)Züg chönne gniesse!
Am nächschte Abe bini ga Salsatanze, eifach herrlech über dTanzbühni schwinge! Dementsprächend hani de o chli schlafmangu gha u am Samschtig usgschlafe.
Em Samschtignami bini mit mim Gaschdmami ga ne Stierkampf luege. Zum glück wärde hie dStiere am ändi nid tötet u wie dir ufdä Föteli gsehd si viu lüt ir Arena u drdas het dr Stier dr Fokus nid uf ei Person. Es isch intressant gsi u vo mir usgseh isch dStier e arme u die Persone wo ihn „provoziere" Vrrükti. Es isch im prinzip drum gange wärsech am nechschte a stier häre wagt, u wär sogar no ungerstier chunt u vom stier id luft gschlöidered isch worde wird gfyred. Ha es paar unschöni Szene gseh. Bi aber iz wieder um nä Erfahrig richer!
Am Sunntig hani amnä Renne teilgno. Es isch intressant gsi, zerfahre wie hie zcosta Rica Loufvrastautige abloufe. ZRennä isch am 8i em morge gsi u isch 10km gsi. Anschinend hets am gliche Tag no 4 angeri Löif gä, drum isch das nid es grosses gsi, es het o kes Chip-System gha. I bi de zersch chli mitemnä Lehrer gsekkled u irgendeinisch bini de ab düsed wiene Ragede! J Natürlech isch aus dür dStadt gange u dStrasse si nid äxtra gsperrt worde. Immerhin isch dr Vrcher chli reguliert worde. U zBeschtä: Bim Ziu isch me empfange worde mitere Medaille us Houz und Schnuerr UND Frücht! Wenni das scho am Afang vom louf gwüssd hätt, hätt mi niemer meh chönne ufhaute u de hätti sicher erschd gmacht! :-D O das isch es erläbnis gsi!
Nächscht Wuche geits eher no chli ruhig zue und här. Ir schueu hets nüm so viu Studänte, mir si nume no zdritt! U schüsch muessi scho gly azAbschidnä dänke. Ev gani am Samschtig no ne Usflug az Meer ga mache, für dassi däm o no cha ade säge. U am Sunntig am 8i em morge startet mis Flugi für Richtig Schwiz u achume dueni am Mäntig em 21. März.
I wünsche euch e gueti Wuche! I due mi de us dr schwiz wieder mäude u vrblibe bis denn mit liebschte Grüess!
Häbets guet!
Tanja
- comments