Hallo zäme u leider nüme buenos dias!

I mäude mi no es ledschds mau vom Blog u dasmau us dr Schwiz!

Di leschdi Wuche in San José hani no i voue Züg chönne gniesse. Mit nomau vou gas gä ir Schueu, mit schaffe im indio-Shop u am Abe isch immer öpis angers ufem Programm gsi, Chino, Usgang ect. Vor Schueu hani mi o vrabschieded, i cha sä allemal witerempfähle. Si isch sehr familiär, dementsprächend hets o nid sehr viu Schüeler. Aber mir het das super passt. U die Lüt wo dert hei gschaffed si eifach absolut lieb u hei eim immer ghueufe, auso i ha super Erfahrig vo dert mitgno!

O am Wuchenändi (Fritig u Samschtig, bevor dasi em sunntig bi gfloge) hani no Costa Rica gnosse u bi a dWeschdküschte gfahre füre Nationaupark zbsueche u zleschdmau im Meer zbade. Manuel Antonio isch eher turistisch u für ne längere Ufenthaut häts mir nid sehr gfaue, aber für nes Wuchenändi isches super gsi. Gwohnt hani bir Gaschdfamilie vomne Kolleg u o die hei mi em morge mit Gallo Pinto vrwöhnt.

Manuel Antonio isch sehr heiss u füecht. Am Abe si mir natürlech ga Salsatänzle u i ha zledschd mau zKönnen vo dä Ticos chönne usnütze! ;-)

Am Sunntig isches de so wit gsi, ab 5i em morge isch mi e Lehrer vo mir cho hole u het mi a Flughafe bracht, schwuuuuuuup u iz isch scho wieder mäntig ir Schwiz u i ha di erschti Wuche hinger mir. Das schöne Wätter wo mir hei gha leschd Wuche het mi ufgsteut! U dir chöit nech sicher dänke, dass i mitemnä grännende Oug bi heicho. Uf ei Art hani mi natürlech gfröit uf dSchwiz,uf mini Lüt uf Schoggi uf Brot :-D Uf di angeri Art, hätti no ganz guet chli lenger chönne blibe. ZSpanisch würdi sehr gärn witer vrfouge, aber hie ir schwiz isch mä so schnäu wieder im Autag, dassmä nid no jede Tag zyt het spanisch zläse, oder spanisch e Fium luege.

I weiss iz ömu, dass mir Costa Rica gfaut u i bi sicher nid zleschdmau zZentrau- oder Südamerika gsi! Fröie mi scho ufenes nächschts Abendtür… :-D

I danke aune wo mini Zyt mitvrfougt hei, mitgfiebered hei u sech über Iträg u Föteli gfröit hei! I ha gärn mini Erläbnis u Idrück euch mitteilt u hoffe dir heits chli usegspürt wies mir gange isch. I wünsche euch e ganz gueti Zyt, macheds guet u hebeds schön! Häbet sorg zu euch!

Hasta luego!

Tanja