Profile
Blog
Photos
Videos
Buenos dias!
I mäude mi wieder einisch! Isch es Zitli här, i gloub vor zwöi Wuche hani öich gschribe. Denn isch mir di leschdi Wuche Schueu bevorgstange u dr Pietro isch cho! Ha natürlech ungloublech fröid gha, dr Pietro wieder zgseh u i bine o a Flughafe ga abhole. Am Morge bini schön brav id Schueu, u dr Pietro het dr Jetläg usgschlafe u am Nami hei mir dZyt zäme gnosse. I ha geng no bi mire Gaschdfamily gwohnt u dr Pietro het iz Appartemente vo mire Schueu us chönne izie. Är het e sehr nätte u gsprächige Ami vo Alabama gha (är isch ufemne Föteli). Zfeine costaricanische Läbe hani witerhin chönne bi mim Gaschdmami dr Flor gniesse! Einisch hani u dr Pietro koched für mini Gaschdfamily, Röschti mit Zürigschnätzletem u ne Züpfe drzue! Zersch hets gheisse es chöme 10 Persone!!! Hui dr Pietro u ig si schön i Choch-Stress cho…;-) Schlussändlech si mir eifach zviert gsi u zviu zässe hei mir de o übrig gha! Aber immerhin isches guet usecho! Die Wuche isch vrbi wie dr Wind…
….u scho gly isches dr Samschtig dr 5. Februar gsi. Mir zwöi hei üs ufe Wäg gmacht für a di Karibischi Küschte, Puerto Viejo. 5 Stung isch dBusfahrt gange u mir si de üs o grad uf dSuchi nachemnä Schlafplätzli ga mache i däm härzige Karibische Dörfli. Gfunge hei mir öpis änlechs wie ne Jugendherberge mit Bungalows-Hüttli. Sehr günschtig gsi.
Di öschtlechi Küschte vo Costa Rica isch wienes angers Vöukli. Ursprünglech si dert dLüt Sklave us Jamaika. Dementsprächend isch zässe angers, dSprach angers (so ne Art Spanglisch) u dLüt si natürlech angers. Aus geit chli chilliger zue und här, überau louft Reggea musig, am Morge schmöckd mä vo näbena scho dr Marihuana-Joint u aus isch chli ire Hippi Zyt (ohni Schue ungerwägs, längi Haar, gspürsch mi Sachene…:-)) So richtig zkaribische Läbe hei mir lehrä kennä! Auso, die sächs Täg hei mir richtig gnosse!
Am Sunntig hei mir zwöi Velos gmietet u si richtig Süde gfresed. Nach 2i Stung gemütlechem Velofahre si mir zManzanillo acho, o nes härzigs Dörfli mit super Strand. Mir si natürlech no düre Urwaud für dass mir ja amnä Plätzli hei chönne dSunne gniesse, wos fasch keni Lüth et gha! Herrrrrrlech!
Zwöi mau si mir i Natinau Park Cahuita (chli nördlech vo Puerto Viejo, aber o am Strand). Fasch dr ganz Tag si mir düre Park gloffe u hei usschou ghaute nach Tierli. Wie dir uf dä föteli chöid gseh, hei mir ungloublech viu verschidnigi Tier u Pflanze gseh. Dr Pietro het sehr fröid gha a de Schlangene u ig a de Affene. Naja, bis zum zytpunkt wo üs öper isch entägecho mit bluetströmendä Arm (nume es birebitzeli übertribe),u tatsächlech amne Plätzli, wo mir hei wöue üses Sandwich ässe, si di Affe cho, sehr nöigierig u fräch. Usem nä Rucksack vomnä Typ het doch das einte Äffli e Banane klaued u sä gässe! Isch mir vorcho wie zOustralie wo mir vor dä Kängurus si wäggsekkled… hihihi :-D
Mir si einisch o no mitm Velo chli umekurved u si ga ne Kakaoplantage aluege. Mir hei chönne zueluege wie mä die Kakaobohne röschtet u natürlech hei mir o chönne knusprigi Kakaopohne u Pulve probiere. Mir si ono e Liguane-Farm ga aluege u hei dä Liguane zuegluegt wie si umespringe! :-D
Am Fritig hei mir wieder dr Bös zrüg nach San José gno. ZSan José si mir schnäu bi mire Familie vrbi ga Chleider wächsle u nöi packe. Bim ichecho, läck du mir bini erschrocke, isch dAlarmalag los gange (am Namittag am 2i…). I ha scho so viu Sache erläbt u Idrück i mim Chopf ufgno, dassi doch dä blöd Cod nüm ha gwüsst… huiuiui, dNachare sis cho cho frage, was los sig… Zum Glück hani mi Gaschdbrueder ufem Handy erreicht… Hihihi, es richtigs Tanja-Gschichtli das... :-D
Nach däm Alarm-Erläbnis si mir üses Mietouto ga abhole. Für ei Wuche kurve mir nämlech mitm Outo im Norde vo Costa Rica ume. ZOuto isch härzig chli u ne Suzuki. Bis mir us San José si dusse gsi, hajajaja, die Costa Ricaner hei chline angere Fahrstiu aus dSchwizer. Aber iz si mir dusse und fahre uf dr Outobahn richtig Alajuela. I fröie mi uf die Wuche wo iz chunt!
Wär Luscht uf meh Föteli u Idrück us Costa Rica het, söu doch uf dä Link klicke. Dert het dr Pietro e Ordner mit Föteli gmacht. Jedermann u jedefrau isch härzlech iglade die azluege!
http://www.dropbox.com/gallery/14739738/1/Costa%20Rica%202011?h=ab198c#/
Öich wünschi o ne gueti Zyt, schickenech liebi Ferie-Grüess u häbet Sorg!
Hasta Pronto!
- comments