Holà!

Di leschdi Wuche reisle isch düre wie dr Blitz! Aber es isch schöööön gsi! Mir hei es Outo gmietet u si dr Norde vo Costa Rica ga aluege! Isch nid zvrgliche mit dr Karibische Küschte! Es isch leider die erschte drü täg rägnerisch gsi, obwou mir üs ir Trochezit befinde! Aber für üs isch das nid so schlimm gsi, mir heis glich gnosse u viu gseh!

Mir si am erschte Tag ufe Vulkan Poas, dert isch zWätter meischtens bewöukt u mä muess Glück ha, dassmä dr Krater u dLagune gsehd. Da mir am 6i em Morge gstartet si, si mir öper vo dä erschtä gsi, u mir hei dr Krater gseh, wenn o mit Wüukli näbdrann.

Witers si mir e Reptiliefarm ga bsueche, u hei üs dert chli informiert über giftigi Tierli in Costa Rica. Huffff, zum Glück bini scho die Nationaupark gsi, wöu es git viiiiu giftigi Schlangene. Naja, solang dassme nid dr Wanderwäg vrlad u dTier in Rue lad, isches kes Problem! Wie dir ufdä Föteli gsehd, ha sogar ig e Frosch uf dHäng gno. Es isch dr typisch Frosch vo Costa Rica, Red-Eye-Frog. Är isch sehr liecht gsi, u är het sech fin u gar nid gschlabberig agfüeut! Kuuls Erläbnis! ;-)

Mitm Outo hei mir ke Problem gha zum Glück. DStrasse si nid grad das Wahre, es het viu Schlaglöcher u viu Strasse si nid teered. Einisch si mir liecht ine Strassegrabe gheit, aues haub so schlimm, e chli rotiert het üse Suzuki, chli Gas gä u när isches scho wieder gange u dus si mir gsi usem Strassegrabe :-D Wie dir ufemne Föteli gseht, si dWägwiser deuwis nid guet läsbar. Mit viu Fantasi u mit guetne Ouge hei mir dr Wäg aber geng gfunge! Sogar für us San José u für zrüg hei mir dr Wäg gfunge, das isch es Abendtür gsi! :-D

Mir si ou nach Cano Negro gfahre. Das isch es härzigs chlises Dörfli wo amne Fluss ligt. Der hei mir e Guide gha u mir si mitemnä Kanu uf dene Kanau-Flüssli ga paddle u ga Tier aluege. Gseh hei mir viu Vögu, viu Kaimane, es Schiudchrötli, Iguanas, e Chue… Leider isch zWätter nid au zu guet gsi, aber villech isches besser gsi, schüsch wärs nämlech rächt heiss gsi u i wäri no uf dIdee cho mit dä Kaimane ga zschwümme…

I ha mis Glück es zwöits mau probiert füre Vulcano Arenal zluege, leider nein. Dasmau hets grägnet u mäh et gaaar nüd gseh vom Vulkan!Andrea, dir heit äuä es wahnsinns Schwein gha! Drfür si mir ufe Vulcan de la Vieja. Dr Wäg dert häre isch rächt lang gange, es isch holprig zue und här gange. Leider si mir nid ufe Krater gloffe, das wäri e 6 Stündigi Wanderig gsi, woni natürlech sehr gärn hät gmacht. Da DZyt aber knapp isch gsi, hei mir es chlises ründeli gmacht. Aber o dert hei mir di Fumarole gseh, Schlammlöcher, wo heiss si gsi u brodled hei u nach Schwefu gschmöckd/gstunke hei. Intressant gsi u zleschd hei mir üs no imne Pool-Fluss abküeled!

Am leschä Abe isch üs no öpis luschtig passiert. Mir hei scho drü Täg voräne e Haue bemerkd mit mega Party-Musig. Denn hei mir öper gfragt was dert louft u di Dame het üs ganzwortet „patinar". Mir hei dänkd, die spinne die costa ricaner. Iz hei di über 20 Grad warm u düe Schlöfle ire Haue wosi müesse abechüële, tststs. Am leschdä Abe hei mir so ne haue wieder gseh u mir si ga luege u was gseh mir: E Haue u aui si mit Rouschueu ungerwägs gsi. Nid mit Rollerblades, nei, mit vier Röueli drann, zwöi vore u zwöi hinger u vore dBräms!:-D Natürlech hei mir o gmietet für umgrächned öpe vier Franke u mir si chli ga umefrese, so luschtig gsi! So wies usgseh het, isch das dr Meeting-Point für Dates…

So dass si mini News vor leschdä Wuche. Dr Pietro isch am Samschtig gfloge richtig Mexiko, der tisch är für witeri zwöi wuche amne Projekt mitschaffe vor Schueu us. Für mi geits nächscht Wuche, das heisst morn, witers mitdr Volunteer-Arbeit. I wirde für ne Monet imne Waisehuus schaffe. I bi gspannt was mi dert erwartet u fröie mi druf.

I danke aune, wo immer ab und zue a mi dänke u mir schribe, enweder via Blog oder via Mail! Es isch schön zwüsse, dass es o weni uf dr angere site vor Wäut bi, Lüt git, wo a mi dänke us schetzä ab und zue öpis vo mir zghöre :-D

I wünsche euch aune e guete Start i di nöii Wuche u hoffe es geit öich guet! Gniessed dr Schnee we dir am Schiifahre sid, oder nämeds nid zsträng wenndir müessed schaffe!

Saludes de San José