Profile
Blog
Photos
Videos
Buenos dias!
Mini Wuche isch düre wie zBisiwätter u iz hani o Wuchenändi!:-D Am Mäntig bini iz Chinderheim ga schaffe zerscht mau. Mini Begeischterig het sech i gränze ghaute. Isch nid ganz so gsi wieni mirs ha vorgsteut. Im ganze hets vier Ching, wo super härzig si. Zwöi Giele wo 5i si, es Modi wo 2i isch u no mau e Giu wo 1,5 Jährig isch. Es het mit mir vier Voluntarier. Die einti cha ke spanisch u drum red mä mitenang änglisch. Die zwöi Vrantwortleche für dChing si nid grad fründlech. Woni bicho hei si sech nid vorgsteut u hei mir weder öpis erklärt no schüsch öpis gseit. Wemä sä öpis hei gfragt hets immer gheisse, espera, espera (wart,wart). Naja, i ha dr liebläng Tag eifach nume müesse spile. Es het weder e Tagesroutine, no schüsch e Struktur im Tag. I ha dänkd, i müess de chli mit ihne ga loufe, mit ihne znüni ässe, sä alegä, ke Ahnig was, eifach chli meh aus eifach spile. Am meischte stört mi haut, dassi nid meh spanisch lerä. Das für mi dr leschd Monet isch, merki dassi iz di Zyt no muess nütze um spanisch hablare. Drum hani mi entschiede vom Waisehuus wieder haubtags id Schueu zwächsle u haubtags e angeri Freiwilligi Arbeit zmache.
DWuche im Chinderheim isch glich schäudüre u schlimm isches ja nid gsi. Mit dr einte u de Ching hani einisch Brownis bache, zwöi mau hei mir mit Plastilin Figürli knättet. Hihihi, mir Erwachsnige hei mir fasch meh Fröid gha mit Chnätte aus dChing. Mir hei aber dä Ching Tierli, Frücht u aus angere zoubered.
Am Donnschtig Abe bini ine Tanzkurs. Leider het me ke Salsatanzed, sonder Bolero und Swing. Isch luschtig gsi, u het spass gmacht, jung und alt (!) si dert am tanze gsi. Wo dr Lehrer het vordemonstriert u e Partnerin het brucht, zack het är mi eifach fürepfiffe u i ha mit ihm müesse vorzeige…Hiiiilfe! Iz Chino bini o no die wuche, dr Fium „Enredados" (Rapunzel) ga luege. Da mir e Fium uf spanisch u nid uf änglisch hei wöue ga luege, isch das die einzigi Müglechkeit gsi… Härzig gsi. Am Fritig abe bini a nes Salsakonsärt, natürlech mit tanze :-D supidupi gsi, ha mis Tanzbei gschwunge das chöit dir öich gar nid vorsteue!
Am Samschtig morge bini mit mim Gaschdmami nach San Carlos, isch es härzigs Dörfli im Norde ufem Land. I ha nid so gnau gwüsst was mi erwartet u bi ja mau gspannt gsi. Mir si mitem Bös zwöi Stung gfahre u si när abghout worde vo irere Schwöschter. När si mir no mau es Stündli id Pampa usegfahre u si de mau bim ne Lädeli acho wo er angeri Schwöschter vo ire ghört. Mir si dert dr ganz Samschtig ghöckled,ab und zue isch wieder e angeri Schwoscht oder Brüedsch oder Frou vom Brüedsch, oder Nichte, oder schüsch no Kletti u Pletti cho… Immerhin hani chli chönne profitiere mit spanisch lose u probiere vrsta. Natürlech hei die gschnurred wie nes Buech. Ab und zue hani im Lädeli ghueufe. Einisch isch no e Manicure-Frou cho, u zTatilein het natürlech iri Füess o becho u het zwöi farbigi Negu gha mit Blüemli druf :-D U das für umgrächnet drü franke! Am nächschte Tag si mir wieder chli vorem Lädeli ghöckled i dä Schoukustüeu u irgendeinisch isches scho zrüg gange. Ufem Wäg für hei si mir a nes Konsärt im Park La Sabana. Es het rächt viu Lüt gha, aber isch supi gsi! Ha öpis hani no grad vrgässe, läck bi no nie so enttüschd gsi… Mir si ines SODA (so heisse dRestaurant hie zCosta Rica), ga öpis ässe. I ha nid so hunger gha u wie chönts o angers si luscht gha uf Frücht, auso hani e „ensalada de frutas" bsteut. U was bechumi? E Schale vou Gelatine mitere Chugle Glace, drnäbe chli Papaya u e Banane… Läck i has fasch ni chönne gloube u mini Gaschdeutere hei nume glached… Aber i has nid so luschtig gfrunge. E Fruchtsalat isch e Salat mit Frücht! Em Abe het mir de drfür mis Mami e„richtige" Fruchtsalat gmacht… :-)
Hüt morge bini wieder id Schueu. Ach hani zFrüchtebuffed vrmissd. I ha einzu Ungerricht u bi voller Elan zlerä… Am Nami bini ga schaffe ine Shop wo si Produkt hei gmacht vo Indios (Indigene Völker Südamerikas). I due dert chli mit schaffe, organisatorisches erledige u vorauem chani Spanisch redä mitem Ladebsitzer. Nächscht Wuche gits e „Reunion" vo vrschidnige Indigo-Völker. Fauses müglech isch möchti natürlech sehr gärn drbi si.
Zersch mau muessi iz no mini Ufgabe für morn mache… hani gschribe i sigi motiviert zum lerä? Huiiiii…. ;-)
I wünsche euch gueti Wuche, hebets guet u passed uf öich uf!
Un enooooorme abrazo!
öiiiii Tanchita
- comments