Profile
Blog
Photos
Videos
Buenos dias!
Es si wieder es paar Täg vrgange u jede Tag erläbi wieder nöii Sache! Auso bis iz hani immer öpis angers zZmorge becho. Am Mäntig isches Toscht gsi wo irgendwie im Ei dräit isch u brätled isch worde. Am Zischig hets e Croque-Monsieur gä, am Mittwuch e Omelette, Eier, Schinke u Chäs, u am Donnschtig pintos (riiz mit bohne u ei drzue). U o am Abe wirdi geng schön fein bechoched. I isse JEDE Tag Fleisch, u zwar viu! Aber bis iz isches eigentlech immer fein gsi! Dassi nid aus Klöschen zrugchume bini am mittwuch scho grad ine Bajlar-Aerobic stund. Latinamerikanischi Rythme, tanze, dHüft schwinge… Fantastisch!
Mitem Hung geits, erstunlecherwis, obwou ig bi jedem Bäue zämezucke, wennine gseh erchlüpfi… aber er isch würklech di meischti zyt dusse u drum gsehni nä fasch nie (huff!). leider wimmleds i ganz san josé vo hüng u jedes mau wenni umne Egge loufe, machis so dassi nid grad emne hung diräkt id Arme loufe. Bis iz bini ömu non i gfrässe worde!
Mis spanisch macht Fortschritte, labbere wienes Buech ligt non i drin, aber es chunt es chunt. Immerhin chani mit mim Gaschdmami scho so ne Art wie ne Konversation füere. Obwou dassi wahrschinlech 50% fausch vrsta…. Aber immerhin het zMüsli gseit!:-D
Ir schueu louts, mini lehrerin isch geng no nätt u di 4 stung Ungerricht si asträngend, aber guet. Es fägt! Naja, usserd dass mir am Mittwuch 500 tusigi verbos irregular hei agluegt… Wo blibe da die regulare verbos? Aber es macht trotzdäm spass! U zum Glück müesse mir viu redä u vrzeue. Hätt no müesse Wörtli lerä, Nase, Ouge, Lippe, Ougsbraue, Bei, Fingernagu… Aber es paar cheibe Wörtli wie eifach nid blibe…
Föteli chöme schpeter no, i wünsche öich aune e guete Fritig, guets Fyrabe mache u de es wunderschöns Wuchenändi!
Liebe Gruess y un abrazo
Tanja
- comments