Kingston!

Am 22.Aug bini vo Seattle via Vancouver und Toronto (miteme mega chline und aenge Flueger…) in Kingston acho. Bis am 31.Aug hani be mim Betreuer (Urs Wyss) dihei choene wohne. De haet es Huus ca. 15min (zfuess) vo de Uni entfernt. Die erschte Wuche hani v.a administrativs erledigt. Ich han mi muesse fuer Kuers entscheide (serschte Jahr isch v.a Schuel und zweite Jahr isch denn sProjekt), sowiit wie moeglich registriere, Luet kennelernee und min Arbetsplatz iirichte. Die kommend Wuche soeti na en neue PC uebercho. Richtig afange duet dUni daenn am 10.September (Kuers). Am Maentig isch na Labour Day (Tag der Arbeit) und ab em Ziischtig sind denn diversi Infoveranstaltige.

Ich wirde vo de Uni ja zahlt. Und fuer das muessi waehrend em Semester zum Teil Schuel ghae (v.a Labor und so) oder fuer de Lehrer korrigiere. Und allli Uslaender muend fuer das zerscht en Tescht mache zum luege oebs im Englisch guet gnueg sind. Wenn noed muemer en Kurs bsueche waehrend em erschte Semeschter. De Test muessi Huet au no mache.

Wasi vo de Uni gseh hang fallt mehr recht guet. Momentan isch es echli e Baustell will dHauptstrasse na ufgrisse sind. Zudem haets diversi Baustelle wos noii Gebauede git. Eis vo de Maschbau Gebaeude (doet wonich drinne bin) isch relativ alt. Si soettet irgendwenn es neois ubercho…. Zerscht muends aber alles andere fertig mache. Ich wird's emel nueme erlebe. Interessant isch dass au da wie ade ZHW dVerwaltig die schoenschte Bueros haet! Isch ueberall sgliche. De Campus isch relativ eng bebaut. Noed eso mit mega Raseflaechene wieni die USA gseh han. Aber dArchitektur vo de Geboude gfallt mer sehr guet.

Kingston haet e schoeni Altstadt und verdammt vil Chilene! Und es liit natuerli grad am See (Lake Ontario). Go bade bini nanig. Abers Wasser sig noede so speziell warm :) SWetter isch eigentlich sit letscht Wuchenend super. Immer Sunne und blaue Himmel und ca. 25C am Tag. Am Morge isch es echli chuel. Am 22. Aug woni acho bin isch es na relativ schwuel gsi… Han eigentlich gmeint das haegi hinder mir gla in Texas! Aber ich han mir saege la, dass es im Summer zimli schwuel isch da obe. Schwuel und zum Teil au ueber laengeri Ziit ueber 30C. Aber jetzt isch es wuerkli agnehm. Und zerscht chunt ja de Winter bevors denn wieder choenti schwuel werde.
Eimal bini scho chli us Kingston ussecho. DFamilie Wyss haet noerdlich vo Kingston amene See es Cottage. Doet simmer vorere Wuche anegange. Bin denn mit em Kanu churz uf de See use. Usserhalb vo Kingston haets vil Wald und mega vil Seee. Haet mer recht gfalle die Gegend.

Mit mim Zimmer bini eigentlich sehr zfriede. Es isch wuerkli mega gross. Seinzig was nanig so guet isch, isch Matraze woni han. Die isch mega weich. Es isch fascht wie wennd inne Haengematte inne lisch… Da muessi definitiv na oeppis mache! SHuus selber isch zwar wie vil Hueser da in Kingston scho relativ alt und es knarred alles echli. Aber es haet gnueg Platz und isch imene guete Zuestand. Da ich grad underem Dach bin wird mis Zimmer relativ warm. Geschter isch es recht muesahm gsi. Choenti denn im Summer chli unagnehm werde… Aber jetzt chunt ja zerscht de Winter!
Mit de Mitbewohner hanis glaubs so uf de erscht Blick au guet troffe. Eine chunt vo Victoria (British Columbia), eini vo New York, wo aber scho sit 6Jahr in Kanada laebt und de 4ti chunt vo de Arabische Emirate. Schiiened wuerkli all nett zi. De Huusbsitzer isch momentan na uf de Suechi fuer en 5te Mitbewohner.