Profile
Blog
Photos
Videos
Am 6i am Morge het de Gueggel gruefe mir hend aber trotzdem no witers pfuused. Am 10ni hemer eus uf de Weg an Strand gmacht det aber festgstellt, dass bade noed erlaubt isch, will scho ueber 100 Mensche det gstorbe sind. Ufem Weg det here hemer e Schlange, en Aff und viel farbigi Echsli gseh. Mir hend eus den de negschti Strand gsuecht und fuer das muesse huefttuef durs Wasser laufe. Am andere Ufer acho, het eini luut Achtung gruefe. Mir hend eus druf abe umkehrt und gmerkt das mir direkt nebeme riesige Krokodil gstande sind! Anstatt devo laufe hemer lieber eusi Kamera fuere gholt (bizli Abstand hemer den doch no gnoh). Bim z'Mittag esse (frische Fisch) hemer Foeteli aglueged und gmerkt, dass euse «Aff» in Wuerklichkeit es Eichhoernli gsi isch. Endlich am Badestrand acho hemer churz d'Sunne gnosse und swarmi Meer. Den hemer no chli Spagat trainiert und Krebsli mit Empanadas gfueteret. Bim Rueckweg hemer no en Schwizer kenneglernt und sind mit ihm zrug zum Camping Platz. Am Abig simer den no eis go trinke und hend fuer de Spass no muesse dur de dunkli Jungle laufe. Isch chli gruselig gsi und vo de Fledermuus hemer nume d'Auge luechte gseh.
- comments