Profile
Blog
Photos
Videos
Noch de erschte Nacht in Medellin hemer muesse es neus Hostel sueche. Mit Charte und Adressene usgrueschtet hemer eus uf d'Suechi gmacht. De schweri Rucksack hets nid grad eifacher gmacht und d'Waermi het au na ihren Bitrag gleischtet. Im Casa Kiwi simer fuendig worde und sind s'erschti mol uf anderi Schwizer troffe. Das Hostel isch es super Backpacker Hostel mit viel junge Luet und e super Stimmig. Nachem Zimmer bezieh simer wiiters richtig Terminal del Sur zum eusi Fahrt uf Cartagena zbueche. Leider simer ufem falsche Busterminal glandet, srichtige (Terminal del Norte) isch imne andere Teil vo de Stadt glege. Wieder eimol meh hilft es dumms dri luege und de netti Maa am Schalter het gseit es git en direkte Bus (Fahrziite unklar). S'erschti mol Bus fahre isch au es Erlebnis gsi, fuer umgrechnet ca. 80 Rappe pro Person. S'Ticket hemer erfolgrich kauft, Geld hemer aber den keis meh gha und drum muesse go wechsle. Agfange mit de Banco Bogota simer nochere halb Stund astoh ad Bancolombia verwiese worde. Mol wieder hend sich alli Choepf noch eus druellt und mir, mittlerwile biz greizt, hend chli luut diskutiert und no meh Ufmerksamkeit uf eus zoge (uups). Au det hets noch meh als e halb Stund warte, no kei Geld geh. Stattdesse hemer e Adresse becho vomne Spitol wos anschiinend Geld wechsle duend. Zfuess simer losmarschiert und hend eus prompt imne Viertel verirrt, wo mer Angscht becho hend. Schnell en andere Weg igschlage, simer den doch no nochere Stund as Ziel cho (de Banktyp het gseit, es seg nid wiit!). I de Bank im Spitol hets den theoretisch tatsaechlich Geld geh (au do mit langem Warte) aber nur mit usgfuelltem Formular. Gmuetlich hemer eus id Spitol-Kantine verzoge und probiert das spanische Formular uszfuelle. Wiit simer nocher nid cho, Bank het grad gschlosse! :( Mittlerwile liecht uf Aggro-Stimmig hemer biz Ufmerksamkeit erregt, bis en Arzt cho isch und eus e witeri Wechselstube empfohle het (Vermuetlich heter Angscht gha er muess susch Ueberstunde mache). Barfusspark und Seilbahn sowie Ussichtshuegel hemer churzerhand muesse striche, den es isch scho Abig worde und im Dunkle soetted zwei Fraue allei besser nid unterwegs si ! ;-)
- comments
Dominique Zen Melde euch per email an [email protected] , falls ihr wieder Info betr. MEDELLIN braucht. Ich wohne dort und CALI 50% meiner Zeit und euch gute tips geben! Grues Dominique
Alex&eli Hallo Dominique Vielen Dank für dein Angebot. Wir sind inzwischen in Cartagena. Liebe Grüsse Alex & Eli
Fritz Hallo Alex und Eli, mit Interesse han ich öi Reisebricht glese, han ja viel Zyt, da ich mich vom Spital mues erhole, und öppedie gschmunzlet. Kompliment, ich finds wunderbar, wie ihr öi dureschlönd nd mit dere Südamerika-Mentalität umgönd. Witerhin gueti und erläbnisrichi Reis :-)