Profile
Blog
Photos
Videos
Im Hotel Familiar hends bi de Abreis zum Tayrona Park vorgschlage das mir sgrosse Gepaeck det doerfed loh und nume de chlini Rucksack soelled mitneh. Mir hend denkt es goht scho und hend dankend abglehnt. Witer is gange mit Geld abhebe. Bi de Bank acho hemer gmerkt, dases Sunntig isch. Will me im Tayrona Park noed chan abhebe, hemer aber dringend Geld brucht. Frustriert simer aneghockt und scho ueberleit ob mer eze extra an Flughafe muend. Zum Glueck hemer den aber Polizischte gfrogt und die hend gseit, dases 5 Meter entfernt mehreri Automate het - uuups zfrueh ufgeh.. Ufem Weg zum Bus simer duren Markt gloffe und sind natuerlich hange bliebe. Mit allem Gepaeck hemer fliessig poschtet und nocher paar Kilos meh zum traege gha. Isch jo klar wen alles nur CHF 2.50 pro Kleidigsstueck choschtet! :-) Den hemer de Bus gsuecht und hend en iheimische Minibus gfunde. S'Gepaeck isch ufem Dach deponiert worde (minimal befestigt). Mir sind die einzige Tourischte gsi und sie hend ihri Freud a eus gha. Bim Nationalpark acho hemer zersch mol drue grossi Flaesche Wasser poschtet und natuerlich es Itrittsticket. De armi Hund wo det glege isch (eis Bein flach druckt) hemer grad wele mitneh - mir hend bereits Plaen gschmiede wie mir de id Schwiz bringed. Will mer aber jo no witers uf Venezuela goend, isch das leider noed gange. Bim Igang hends eus vorgschlage mit de Roessli zum Camp zritte. Mir hend aber gfunde dases bizli ztuer wird mit Hi und Rueckweg (mir heted 3 Roessli brucht wegem Gepaeck). Mit Flipflop und 20 Kilo Gepaeck pro Person usgrueschtet simer los marschiert. De Weg het sich den usegstellt als langi Wanderig ueber Stock und Stei sowie steili Stiegige. Ufem Weg hemer Kriese gschobe, de Schweiss isch nur so gloffe und de Rugge isch total verspannt gsi. Endlich acho im Camp hemer eus schnell es Zelt gmietet und eus e chueli Duschi unter freiem Himmel goennt. Leider hets den no afange Gwittere und heftig Regne sodass de Camping Platz ueberschwemmt worde isch. Bim Bettparat mache isch de Eli de Linsebehaelter abegheit und eifach devo gschwumme. Zum Glueck het sie en wieder verwuetscht. De Camping Platz isch eifach aber mega herzig und zmitzt im Jungle (kein Natelempfang & kein Spiegel). S'Esse isch sehr fein und guenstig.
- comments