Am Morge hemer eus drei Roessli bstellt (eis fuers viele Gepaeck) zum usem Park useztritte, de langi Fuessmarsch hemer nueme wele uf eus neh. De Ritt isch recht speziell gsi, die Ross sind ueber Stock und Stei sehr trittsicher. Nochem ca. halb stuendige Ritt simer den mitem Bus an Flughafe vo Santa Marta gfahre. Det acho hemer festgstellt, das mer eis Gepaeck zwenig hend! Mir hend natuerlich grad an Inhalt denkt: s*** usgrechnet d'Jesus-Decki und Kleider vo de Alex sind det drin. Zersch hemer bi de Fluggsellschaft agfroged, ob Sie im Tayrona-Park aluete choend, will das en Bus vom Tayrona Park gsi isch. Leider simer so noed witers cho und die netti Frau am Schalter het eus ad Polizei verwiese. Schnell hemer eine gfunde und ihm eusi Gschicht verzellt. Dank em Foti uf eusere Camera het de Polizischt es liechts Spiel gha und dene schnell agluete. Er het eus den mitgnoh i sin Polizeiposchte zum warte. Det simer mol wieder d'Attraktion gsi und au fuer eus is e luschtigs Erlebnis gsi. Nochdem mir sGepaeck den wieder gha hend het de Fahrer Geld defuer wele, de Polizischt het sich aber den grad fuer eus igsetzt und gmeint mir doerfed nuet zahle. De Flug uf Venezuela hemer jo nonid gha, drum hemer eus wieder zum Schalter begeh. Negschts Problem: Es het kei direkti Flueg uf Caracas und de vorgschlageni Flug wer ueber Lima oder Santiago de Chile gsi fuer CHF 2'200! Schnell simer zu de negschte Fluggsellschaft womer den tatsaechlich en Flug via Bogota ueber cho hend. Es isch aber bereits chli knapp gsi mitem Ichecke so hemer schnell eusi Sache abgeh und sind richtig Gate. Leider isch det usecho, dass Sackmesser no im Handgepaeck verbliebe isch. Schnell Sackmesser gno und mitem Handgepaeck zrug go ichecke. Im Flueger isch chalt gsi und den hemer gmerkt, dass eusi gliebti Jesus Decki dankem Sackmesser im Frachtrum. In Bogota hemer no wele die reschtliche Pesos los werde und hend eus drum uf Shopping Tour begeh (3 Stunde soettet jo lange). 10 Minute bevor de Flug witers gange isch, hemer gmerkt das mer viellicht eus au mol richtig Gate bewege soettet. Pesos simer noed alli losworde so hemer denkt, mir trinked en Wii ufem Flug. Leider hets kei Wii gha, drum hemer eus denkt mir nehmed de Rum (het so usgeh wie Rum). D'Stewardess het den verwirrt gmeint es hegi kei Rum und isch scho witers gloffe. Den hemer luut gruefe: Whiskey?! und sie isch zrug cho den de Rum het sich tatsaechlich als Whiskey usegstellt. De jungi Maa vor eus het nur glachet, au grad eine bstellt und mit eus agstosse. Wo mir in Caracas am Flughafe acho sind, simer vo mehrene Luet agsproche worde, weg Taxis, Geld wechsle und Hotel. Sisch aber zNacht am 1 gsi, mir hend eus sehr unwohl gfuehlt und nur no ines Hotel bim Flughafe wele. Leider hemer keis gfunde und sind den bim Subway ufes Baenkli glege, hend eusen Schlofsack fuere gholt sowie d'Jesus-Decki wills dank Klimaalag sehr chalt gsi isch. D'Nacht hemer einigermasse guet ueberstande.