Profile
Blog
Photos
Videos
Am Morge frueh simer ufem Baenkli vom Subway ufgwacht. Jetzt hemer wele Geld go abghebe und eus oeppis z'Esse chaufe. Mir sind zu de Bankomate wo de Reisefuehrer empfohle het. Leider hemer bi keim einzige Geld choene abhebe drum simer den bi de Bank agstande. E halb Stund bevor d'Bank ufgmacht het, simer bereits inere sehr lange Schlange gstande. Wo mer den dine gsi sind, hets gheisse, dass Uslaender kei Geld bezieh choend. Mir sind den is Wechselbuero und hend det euses Glueck versucht. Au det simer noed witers cho. Druf abe het eus eine agsproche und vorgschlage, das mer ihm Geld ueberwiese soelled und er eus den Bolivars geh chan. Das hemer natuerlich noed gmacht. Mit Hilf vo Iheimische hemer alles moegliche versucht aber mir sind eifach noed zu Geld cho. E bizli hilflos hemer eus druf abe uf de Bode gsetzt und hend scho im Reisebuero wele aluete zum de Flug umbueche und zrug uf Kolumbie zgo. Mir hend sit 12 Stunde nuet Trinke und Esse choene chaufe und anes witer reise ohni Geld isch au noed zdenke gsi (Kreditcharte sind det leider au noed agnoh worde). Es het eus den en sehr sympathische Reiseveranstalter agsproche und eus gholfe sodass mer usnahmsmis und mit sehr viel Ufwand (Fingerstempel, Formular, vieli Unterschrifte) zu Geld cho sind. Er het eus den au verschiedeni Usflueg/Rundreise empfohle. Es sind leider alli noed im Budget glege ussert d'Isla Margarita wofuer mir eus den au entschiede hend. Wills am guenstigste isch mit Bus und Schiff uf d'Insle z'cho, het er eus as negschti Busterminal gfahre. Es isch recht wiit weg gsi aber defuer hemer no oeppis vo Caracas gseh. Det acho isch de negschti Bus bereits usbueched gsi. So hemer eus es Hotel gsuecht und sind nochemne usgiebige Esse im Fastfood-Lade erschoepft is Bett gfalle.
- comments
Heidi Ich bin immer wieder uf eui Reisebricht gspannt. Es isch jedesmal sehr lustig und intresant....und spannend! Ihr händ i däre churze Zyt sehr viel erlebt :-) ä neui Erfahrif, gell? No viel Spass und LG Heidi